ദുബൈ: വ്യാജ ലിങ്കുകള്‍ വഴി വ്യക്തികളുടെ ബാങ്ക് വിവരങ്ങള്‍ ചോര്‍ത്തിയ ശേഷം അക്കൗണ്ടിലെ പണം കവര്‍ന്ന സംഘത്തെ പിടികൂടി ദുബൈ പൊലിസ്. റെസ്റ്റോറന്റുകള്‍, ഡെലിവറി കമ്പനികള്‍ എന്നിങ്ങനെയുള്ള സ്ഥാപനങ്ങളില്‍ നിന്നാണ് വിളിക്കുന്നതെന്ന് ആളുകളെ ബോധ്യപ്പെടുത്തിയ ശേഷമാണ് ഇവര്‍ തട്ടിപ്പ് നടത്തിക്കൊണ്ടിരുന്നത്.

ALSO READ: യുഎഇ മധ്യാഹ്ന വിശ്രമ നിയമം ഇന്നു മുതല്‍ പ്രാബല്യത്തില്‍; വിശ്രമസമയത്ത് തൊഴില്‍ പാടില്ല, ലംഘിച്ചാല്‍ പിഴയടക്കം ശിക്ഷ; അറിയേണ്ടതെല്ലാം | UAE Mid-day Break

മികച്ച കമ്പനികളില്‍ നിന്നാണെന്ന് തോന്നിപ്പിക്കുന്ന എസ്എംഎസ് സന്ദേശങ്ങള്‍, ഇമെയിലുകള്‍, ഓണ്‍ലൈന്‍ ലിങ്കുകള്‍ എന്നിവ അയച്ചുകൊണ്ടാണ് കുറ്റവാളികള്‍ പണം തട്ടിക്കൊണ്ടിരുന്നതെന്ന് അധികൃതര്‍ പറഞ്ഞു. ആളുകളുടെ വിശ്വാസം നേടിയെടുക്കുന്നതിനായി തട്ടിപ്പുകാര്‍ ജനപ്രിയ സംഘടനകളുടെ പേരുകള്‍ ചൂഷണം ചെയ്തതായി ദുബായ് പൊലിസ് വെളിപ്പെടുത്തി.

യഥാര്‍ത്ഥമായി തോന്നിക്കുന്ന ലിങ്കുകളില്‍ ക്ലിക്ക് ചെയ്ത് ബാങ്കിംഗ് വിവരങ്ങള്‍ നല്‍കുന്നതോടെ അവര്‍ വഞ്ചിതരാകും. 'ഒരു ഇര ലിങ്കില്‍ ക്ലിക്ക് ചെയ്ത് അവരുടെ ബാങ്കിംഗ് വിവരങ്ങള്‍ നല്‍കിക്കഴിഞ്ഞാല്‍, സംഘം ഫണ്ട് പിന്‍വലിക്കാന്‍ ആ ഡാറ്റ ഉപയോഗിക്കും,' പൊലിസ് കൂട്ടിച്ചേര്‍ത്തു.

ദുബൈ പൊലിസിലെ ആന്റിഫ്രോഡ് സെന്ററിലെ പ്രത്യേക സംഘങ്ങള്‍ മറ്റ് അധികാരികളുമായി സഹകരിച്ച് പ്രവര്‍ത്തിക്കുകയും, വഞ്ചനാപരമായ സന്ദേശങ്ങളുടെ ഘടന വിശകലനം ചെയ്യുകയും സംശയാസ്പദമായ ഓണ്‍ലൈന്‍ പ്രവര്‍ത്തനങ്ങള്‍ ട്രാക്ക് ചെയ്യുകയും ചെയ്തു. ഈ ശ്രമങ്ങളുടെ ഫലമായി ദുബൈ പൊലിസിന് സംഘാംഗങ്ങളെ തിരിച്ചറിയുന്നതിനും അറസ്റ്റ് ചെയ്യുന്നതിനും കുറ്റകൃത്യങ്ങള്‍ക്ക് ഉപയോഗിച്ച ഇലക്ട്രോണിക് ഉപകരണങ്ങള്‍ പിടിച്ചെടുക്കുന്നതിനും കഴിഞ്ഞു.

ALSO READ: ഇസ്‌റാഈല്‍- ഇറാന്‍ സംഘര്‍ഷം: അടിയന്തര യാത്രാ മുന്നറിയിപ്പുമായി യുഎഇ  | Travel Advisory

ആധികാരികമല്ലാത്ത ഉറവിടങ്ങളില്‍ നിന്ന് ലിങ്കുകള്‍ ലഭിക്കുമ്പോള്‍, അവ പ്രശസ്ത പേരുകളില്‍ നിന്നാണെന്ന് തോന്നുകയാണെങ്കില്‍ പോലും, ജാഗ്രത പാലിക്കണമെന്ന് ദുബൈ പൊലിസ് പൊതുജനങ്ങള്‍ക്ക് മുന്നറിയിപ്പ് നല്‍കി. സംശയാസ്പദമായ ലിങ്കുകള്‍ അടുത്തുള്ള പൊലിസ് സ്റ്റേഷനിലോ ദുബൈ പൊലിസ് ആപ്പിലെയും ഇക്രൈം പ്ലാറ്റ്‌ഫോമിലെയും 'പൊലിസ് ഐ' ഫീച്ചര്‍ വഴിയോ റിപ്പോര്‍ട്ട് ചെയ്യാം.

Dubai Police have dismantled a cybercrime gang that sent fake links to victims, stole their banking credentials, and drained their accounts. Investigations are ongoing to trace all involved.