വാഷിംഗ്ടൺ: സായുധ സംഘർഷം, ഭീകരവാദം, ആഭ്യന്തര കലാപം എന്നിവയെ തുടർന്ന് ഇസ്റാഈലിലേക്കുള്ള യാത്രാ മുന്നറിയിപ്പ് ഏറ്റവും ഉയർന്ന തലമായ ലെവൽ 4ലേക്ക് ഉയർത്തി യുഎസ് സ്റ്റേറ്റ് ഡിപ്പാർട്ട്മെന്റ്. യുഎസ് പൗരന്മാർ ഇസ്റാഈലിലേക്ക് യാത്ര ചെയ്യരുതെന്ന് വകുപ്പ് കർശന മുന്നറിയിപ്പും നൽകി. 

ടെൽ അവീവ്, ജറുസലേം ഉൾപ്പെടെയുള്ള ഇസ്റാഈലിലെ സുരക്ഷാ സാഹചര്യം പ്രവചനാതീതമാണ്. മോർട്ടാർ, റോക്കറ്റ് വെടിവയ്പ്പ്, സായുധ ഡ്രോൺ ആക്രമണങ്ങൾ, മിസൈൽ ആക്രമണങ്ങൾ എന്നിവ മുന്നറിയിപ്പില്ലാതെ സംഭവിക്കാം. യുഎസ് പൗരന്മാർ ജാഗ്രത പാലിക്കണം," സ്റ്റേറ്റ് ഡിപ്പാർട്ട്മെന്റ് മുന്നറിയിപ്പിൽ വ്യക്തമാക്കി. വെസ്റ്റ് ബാങ്കിലേക്ക് "ഭീകരവാദവും ആഭ്യന്തര കലാപവും" കാരണവും, ​ഗസ്സയിലേക്ക് "ഭീകരവാദവും സായുധ സംഘർഷവും" കാരണവും യാത്ര ചെയ്യരുതെന്ന മുന്നറിയിപ്പാണ് വകുപ്പ് പൗരൻമാർക്ക് നൽകിയത്.

ഹമാസ് നിയന്ത്രണത്തിലുള്ള ​ഗസ്സ മുനമ്പിലേക്ക് യാത്ര ചെയ്യാൻ തീരുമാനിക്കുന്നവർ, ഇസ്റാഈലിന്റെയും ഈജിപ്തിന്റെയും അതിർത്തികൾ അടച്ചിരിക്കുന്നതിനാൽ ഭക്ഷണം, മരുന്ന്, മറ്റ് അവശ്യവസ്തുക്കൾ എന്നിവ ദീർഘകാലത്തേക്ക് സുരക്ഷിതമാക്കണമെന്നും വിൽപത്രം തയ്യാറാക്കണമെന്നും ഉപദേശം നൽകി. ഗസ്സയിൽ യുഎസ് പൗരന്മാർക്ക് പതിവ് അല്ലെങ്കിൽ അടിയന്തര കോൺസുലാർ സേവനങ്ങൾ നൽകാൻ യുഎസ് സർക്കാരിന് കഴിയില്ല. യുഎസ് സർക്കാർ ജീവനക്കാർക്ക് ഗസ്സയിലേക്ക് യാത്ര ചെയ്യാൻ അനുമതിയില്ല," അഡ്വൈസറി വ്യക്തമാക്കി.
 
മേഖലയിലെ സുരക്ഷാ സാഹചര്യം അതീവ അപകടകരവും അസ്ഥിരവുമാണെന്നും, ഇസ്റാഈൽ, വെസ്റ്റ് ബാങ്ക്, ഗസ്സ എന്നിവിടങ്ങളിൽ മുന്നറിയിപ്പില്ലാതെ അക്രമം ഉണ്ടാകാമെന്നും സ്റ്റേറ്റ് ഡിപ്പാർട്ട്മെന്റ് മുന്നറിയിപ്പ് നൽകി. ഭീകര ഗ്രൂപ്പുകളും ഒറ്റപ്പെട്ട ഭീകരരും വിനോദസഞ്ചാര കേന്ദ്രങ്ങൾ, ഗതാഗത കേന്ദ്രങ്ങൾ, മാർക്കറ്റുകൾ, ഷോപ്പിംഗ് മാളുകൾ തുടങ്ങിയ ജനസമ്മർദമുള്ള സ്ഥലങ്ങൾ ലക്ഷ്യമിട്ടേക്കാമെന്നും അവർ ചൂണ്ടിക്കാട്ടി. ശനിയാഴ്ച, "അസ്ഥിരവും പ്രവചനാതീതവുമായ" സുരക്ഷാ സാഹചര്യം കണക്കിലെടുത്ത്, സർക്കാർ ജീവനക്കാരുടെ കുടുംബാംഗങ്ങൾക്കും അടിയന്തരമല്ലാത്ത ജീവനക്കാർക്കും മേഖല വിടാൻ സ്റ്റേറ്റ് ഡിപ്പാർട്ട്മെന്റ് അനുമതി നൽകിയിരുന്നു. എല്ലാ യുഎസ് സർക്കാർ ജീവനക്കാരോടും അവരുടെ കുടുംബങ്ങളോടും അഭയം തേടാൻ യുഎസ് എംബസി നിർദേശിച്ചു.

കഴിഞ്ഞ ആഴ്ച അവസാനം ഇസ്റാഈലിന്റെ സൈനിക, ആണവ സൗകര്യങ്ങളെ ലക്ഷ്യമിട്ട് ഇറാൻ നടത്തിയ വ്യാപക ആക്രമണങ്ങൾക്ക് പിന്നാലെ, ഇരു രാജ്യങ്ങളും തമ്മിലുള്ള പ്രത്യാക്രമണങ്ങളുടെ നാലാം ദിനത്തിലാണ് ഈ മുന്നറിയിപ്പ്. വെള്ളിയാഴ്ച മുതൽ നടന്ന ആക്രമണങ്ങളിൽ 224 പേർ കൊല്ലപ്പെട്ടതായി ടെഹ്റാൻ അറിയിച്ചു. ഇസ്റാഈലിന്റെ വ്യോമ പ്രതിരോധ സംവിധാനങ്ങളെ മറികടന്നെത്തിയ ഇറാനിയൻ ബാലിസ്റ്റിക് മിസൈലുകൾ മൂലം ഇസ്റാഈലിൽ 24 പേർ മരിച്ചതായി സൈന്യം വെളിപ്പെടുത്തി.

ഇന്ന്  ഇസ്റാഈലിലിലെ യുഎസ് എംബസി അടച്ചിട്ടതായി യുഎസ് അംബാസഡർ മൈക്ക് ഹക്കബി അറിയിച്ചു. ഇറാനിയൻ മിസൈൽ ആക്രമണത്തിൽ ടെൽ അവീവിലെ അമേരിക്കൻ കോൺസുലേറ്റിന് "നിസ്സാര കേടുപാടുകൾ" സംഭവിച്ചെങ്കിലും യുഎസ് ഉദ്യോഗസ്ഥർക്ക് പരിക്കേറ്റിട്ടില്ലെന്ന് അദ്ദേഹം സോഷ്യൽ മീഡിയയിൽ വ്യക്തമാക്കി.