പാരീസ്: ഇറാന്റെ ആണവ, മിസൈൽ പദ്ധതികളുമായി ബന്ധമില്ലാത്ത സ്ഥലങ്ങൾക്കെതിരായ ആക്രമണങ്ങൾ അവസാനിപ്പിക്കണമെന്ന് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ഇസ്റാഈലിനോട് ആവശ്യപ്പെട്ടു. ഇറാനും ഇസ്റാഈലും തമ്മിലുള്ള സംഘർഷം അവസാനിപ്പിക്കാൻ ചർച്ചകളിലൂടെ പരിഹാരം കാണാൻ യൂറോപ്യൻ പങ്കാളികളുമായി ചേർന്ന് സംരംഭം ആരംഭിക്കുമെന്ന് മാക്രോണിന്റെ ഓഫീസ് അറിയിച്ചു.

ദേശീയ സുരക്ഷാ കൗൺസിൽ യോഗത്തിൽ, വിദേശകാര്യ മന്ത്രി ജീൻ-നോയൽ ബാരറ്റിനോട് അടുത്ത ദിവസങ്ങളിൽ യൂറോപ്യൻ പങ്കാളികളുമായി ചേർന്ന് ഒരു പരിഹാര പദ്ധതി തയ്യാറാക്കാൻ മാക്രോൺ നിർദേശിച്ചു. എന്നാൽ, പദ്ധതിയുടെ വിശദാംശങ്ങൾ വെളിപ്പെടുത്തിയിട്ടില്ല.

ഇറാന്റെ ആണവ, ബാലിസ്റ്റിക് മിസൈൽ പദ്ധതികളുമായി ബന്ധമില്ലാത്ത ലക്ഷ്യങ്ങൾക്കെതിരെ ഇസ്റാഈൽ ആക്രമണം ശക്തമാക്കുന്നതും, ഇറാനിലും ഇസ്റാഈലിലും സിവിലിയൻ ഇരകൾ വർധിക്കുന്നതും മാക്രോൺ ആശങ്കയോടെ ചൂണ്ടിക്കാട്ടി. "പ്രാദേശിക സുരക്ഷയ്ക്ക് ഗുരുതരമായ ഭീഷണി ഉയർത്തുന്ന ഈ സൈനിക നടപടികൾ അടിയന്തരമായി അവസാനിപ്പിക്കണം," എലിസി കൊട്ടാരം പ്രസ്താവനയിൽ വ്യക്തമാക്കി.

ഇസ്റാഈലിലോ ഇറാനിലോ ഉള്ള ഫ്രഞ്ച് പൗരന്മാർക്ക് രാജ്യം വിടാൻ ആഗ്രഹമുണ്ടെങ്കിൽ സഹായം നൽകാൻ വിദേശകാര്യ മന്ത്രാലയത്തോട് മാക്രോൺ നിർദേശിച്ചു. ഇതുസംബന്ധിച്ച കൂടുതൽ വിവരങ്ങൾ നൽകിയിട്ടില്ല.