വാഷിങ്ടൺ: ഇറാനെതിരായ ഇസ്റാഈൽ ആക്രമണത്തിൽ അമേരിക്കയുടെ പങ്കാളിത്തത്തിനെതിരെ വൈറ്റ് ഹൗസിന് മുന്നിൽ പ്രതിഷേധക്കാർ റാലി നടത്തി. ട്രംപ് ഭരണകൂടം ഇറാനിൽ ഇസ്റാഈലിന്റെ യുദ്ധത്തിൽ കൂടുതൽ ഇടപെടൽ പരിഗണിക്കുന്നതിനിടെ, യുദ്ധത്തിൽ നേരിട്ട് പങ്കാളിയാകരുതെന്ന് ആവശ്യപ്പെട്ടാണ് പ്രകടനം.

ഇറാനിലെ ഇസ്റാഈൽ ബോംബാക്രമണത്തിനും, ഇസ്റാഈലിന് കോടിക്കണക്കിന് ഡോളർ സൈനിക സഹായം നൽകുന്ന അമേരിക്കൻ നയത്തിനുമെതിരെ പ്രതിഷേധക്കാർ രംഗത്തെത്തി. മിഡിൽ ഈസ്റ്റിൽ നിലവിൽ മൂന്ന് അമേരിക്കൻ വിമാനവാഹിനിക്കപ്പൽ സംഘങ്ങൾ സ്ഥാപിച്ചിട്ടുണ്ട്. ഇവ പ്രതിരോധ ആവശ്യങ്ങൾക്ക് മാത്രമായി തുടരണമെന്ന് പ്രകടനക്കാർ ആവശ്യപ്പെട്ടു.

ഇറാനിൽ ഒഴിപ്പിക്കൽ മുന്നറിയിപ്പ്

ഇറാന്റെ വടക്കുപടിഞ്ഞാറൻ മേഖലയിലെ അരക്, ഖൊണ്ടാബ് നഗരങ്ങൾക്ക് സമീപമുള്ള പ്രദേശങ്ങളിൽ താമസിക്കുന്നവരോട് ഇസ്റാഈൽ സൈന്യം ഒഴിഞ്ഞുപോകാൻ ആവശ്യപ്പെട്ടു. "സൈനിക അടിസ്ഥാന സൗകര്യങ്ങൾ" ലക്ഷ്യമിട്ടുള്ള ആക്രമണം നടത്തുമെന്നും, അല്ലാത്തപക്ഷം ജീവൻ അപകടത്തിലാകുമെന്നും ഇസ്റാഈൽ മുന്നറിയിപ്പ് നൽകി. ലക്ഷ്യപ്രദേശത്തിന്റെ ഉപഗ്രഹ ഭൂപടം പ്രസിദ്ധീകരിച്ച സൈന്യം, "ഈ മേഖലയിലെ സാന്നിധ്യം ജീവന് ഭീഷണിയാണ്" എന്ന് വ്യക്തമാക്കി.

ഇസ്റാഈലിൽ യുദ്ധത്തിന് പിന്തുണ

ഇസ്റാഈലിൽ 83% ജനങ്ങളും സർക്കാരിന്റെ ഇറാൻ വിരുദ്ധ യുദ്ധത്തെ പിന്തുണയ്ക്കുന്നതായി റിപ്പോർട്ട്. ​ഗസ്സയിലെ യുദ്ധം മൂലം അന്താരാഷ്ട്ര-ആഭ്യന്തര സമ്മർദ്ദം നേരിട്ടിരുന്ന പ്രധാനമന്ത്രി ബെഞ്ചമിൻ നെതന്യാഹുവിന്റെ ശ്രദ്ധ ഇപ്പോൾ ഇറാനിലേക്ക് തിരിഞ്ഞിരിക്കുന്നു. ഇതോടെ അദ്ദേഹത്തിന്‌ മേലുള്ള സമ്മർദ്ദം കുറഞ്ഞതായാണ് വിലയിരുത്തൽ.

2018ൽ മന്ത്രിസഭയിൽനിന്ന് രാജിവച്ച വലതുപക്ഷ നേതാവ് അവിഗ്‌ഡോർ ലീബർമാൻ, നെതന്യാഹു ശരിയായ നടപടിയാണ് സ്വീകരിക്കുന്നതെന്ന് അഭിപ്രായപ്പെട്ടു. ഗാസയിലെ യുദ്ധത്തെ തുടർന്ന് മന്ത്രിസഭ വിട്ട ബെന്നി ഗാന്റ്സ്, "ഇറാന്റെ കെണിയിൽ വീഴരുത്, വലതോ ഇടതോ ഇല്ല, ശരിയും തെറ്റും മാത്രം, നമ്മൾ ശരിയാണ്" എന്ന് പ്രതികരിച്ചു.