അടുക്കളയിലെ ഏറ്റവും വലിയ ടാസ്‌കാണ് പാത്രം കഴുകല്‍. മറ്റു ജോലി ഒക്കെ പെട്ടെന്നു തീര്‍ത്തു കഴിഞ്ഞാലും പാത്രം കഴുകല്‍ എന്ന വലിയൊരു പണി അവിടെ ബാക്കിയാവും. എന്നാല്‍ ഡിഷ്‌വാഷര്‍ വന്നതോടെ പാത്രം കഴുകുന്ന ജോലി ഏറക്കുറേ എളുപ്പമായിട്ടുണ്ട്. ഇതിനോടകം അടുക്കളയിലെ അവശ്യവസ്തുവായി തന്നെ ഈ ഉപകരണം മാറിക്കഴിഞ്ഞു.  ശരിയായ രീതിയില്‍ ഇത് ഉപയോഗിച്ചില്ലെങ്കില്‍ ഡിഷ് വാഷറിന് കേടുപാടുകള്‍ സംഭവിക്കാം. ഡിഷ് വാഷര്‍ ഉപയോഗിക്കുമ്പോള്‍ ഈ തെറ്റുകള്‍ ഒഴിവാക്കേണ്ടതാണ്.

 

ഈ പാത്രങ്ങള്‍ ഇടരുത്

എല്ലാം കൊണ്ടു പോയി ഡിഷ് വാഷറില്‍ ഇട്ടേക്കരുത്. എല്ലാത്തരം പാത്രങ്ങളും ഡിഷ് വാഷറില്‍ കഴുകാന്‍ സാധിക്കുന്നതല്ല. പ്ലാസ്റ്റിക്, ക്രിസ്റ്റല്‍ തുടങ്ങിയവ ഡിഷ് വാഷറില്‍ കഴുകാനിടുന്നത് ഒഴിവാക്കാം. ഇത്തരം പാത്രങ്ങള്‍ കൈകള്‍ ഉപയോഗിച്ച് വൃത്തിയാക്കുന്നതാണ് നല്ലത്. 

ഡിഷ് വാഷറില്‍ പാത്രങ്ങള്‍ കഴുകാനിടുമ്പോള്‍ ഓരോ പാത്രവും അതത് സ്ഥലത്ത് തന്നെ വയ്ക്കാന്‍ ശ്രദ്ധിക്കണം. കണ്ടെയ്‌നറുകള്‍, ഗ്ലാസ്, മഗ്ഗ് തുടങ്ങിയവ ഏതൊക്കെ സ്ഥലത്താണ് വയ്‌ക്കേണ്ടതെന്ന് മനസിലാക്കിവേണം ചെയ്യാന്‍. അല്ലെങ്കില്‍ മെഷീന് കേടുപാടുകള്‍ സംഭവിക്കാം.

 

സോപ്പ് പൊടി 

പാത്രങ്ങള്‍ നന്നായി വൃത്തിയാകാന്‍ വേണ്ടി അമിതമായി സോപ്പ് പൊടി ഡിഷ് വാഷറില്‍ ഇടുന്നവരുണ്ട്. ഇങ്ങനെ ചെയ്യാന്‍ പാടില്ല. ഇത് നിങ്ങളുടെ പാത്രങ്ങള്‍ വൃത്തിയാക്കുന്നതിന് പകരം മെഷീനില്‍ സോപ്പ് പൊടി അടിഞ്ഞുകൂടുകയാണ് ചെയ്യുക. ഇത് ഡിഷ് വാഷറിന്റെ പ്രവര്‍ത്തനത്തെ ബാധിക്കുകയും ചെയ്യും.

വൃത്തിയാക്കി സൂക്ഷിക്കാം

ഡിഷ് വാഷര്‍ ഉപയോഗിച്ചു കഴിഞ്ഞാല്‍ അവ കൃത്യമായ ഇടവേളകളില്‍ കഴുകി വൃത്തിയാക്കാന്‍ ശ്രദ്ധിക്കണം. പ്രത്യേകിച്ചും ഡിഷ് വാഷറിന് ഫില്‍റ്റര്‍ ഉണ്ടെങ്കില്‍ അതും ഇളക്കിമാറ്റി വൃത്തിയാക്കേണ്ടതുണ്ട്. ഭക്ഷണാവശിഷ്ടങ്ങള്‍, അഴുക്ക് എന്നിവ അടിഞ്ഞുകൂടുന്നത് മെഷീന്റെ പ്രവര്‍ത്തനത്തെ ബാധിക്കുന്നതാണ്.

ഡിഷ്‌വാഷര്‍ ഉപയോഗിക്കുമ്പോള്‍ വെള്ളം കൂടുതല്‍ പാഴാകുമോ ?

 
കൈകള്‍ ഉപയോഗിച്ച് കഴുകുമ്പോള്‍

കൈകളുപയോഗിച്ചും ഡിഷ് വാഷറുപയോഗിച്ചും പാത്രങ്ങള്‍ കഴുകുമ്പോള്‍ വെളളം കുറച്ചു ചെലവാകുക തന്നെ ചെയ്യും. കൈകള്‍ ഉപയോഗിച്ച് പാത്രങ്ങള്‍ കഴുകുന്നതാണ് നല്ലത്. ഇത് പാത്രങ്ങള്‍ കേടുവരാതിരിക്കാന്‍ സഹായിക്കും. കൂടുതല്‍ പാത്രങ്ങളുണ്ടെങ്കിലും പെട്ടെന്നു തന്നെ കൈകള്‍കൊണ്ട് കഴുകി എടുക്കാവുന്നതാണ്. 

ഇനി പാത്രങ്ങളില്‍ എന്തെങ്കിലും കറകളൊക്കെ ഉണ്ടെങ്കില്‍ കൈകൊണ്ടാണെങ്കില്‍ നമുക്കത് പെട്ടെന്ന് കഴുകി വൃത്തിയാക്കി എടുക്കാന്‍ സാധിക്കും. അതുപോലെ തുരുമ്പെടുക്കാന്‍ സാധ്യതയുള്ള കുക്ക് വെയര്‍ പോലുള്ള സാധനങ്ങളും കൈ കൊണ്ട് കഴുകുന്നതാണ് നല്ലത്.

എന്നാല്‍ കൈകള്‍ കൊണ്ട് കഴുകി വൃത്തിയാക്കുന്ന പാത്രങ്ങള്‍ക്ക് കുറച്ചധികം വെള്ളവും വേണ്ടിവരും. സ്‌പോഞ്ച് ഉപയോഗിച്ച് കഴുകുന്ന പാത്രങ്ങളില്‍ അണുക്കളും അഴുക്കും പറ്റിപ്പിടിക്കാനും സാധ്യതയുണ്ട്. ഇത് ചൂടുവെള്ളത്തില്‍ കഴുകിയാലും പോകണമെന്നില്ല. 

 

ഡിഷ് വാഷറില്‍ കഴുകുമ്പോള്‍

പാത്രങ്ങള്‍ ഡിഷ് വാഷറിലിടുമ്പോള്‍ പെട്ടെന്നു തന്നെ കഴുകാന്‍ സാധിക്കും. ഉയര്‍ന്ന മര്‍ദത്തില്‍ പ്രവര്‍ത്തിക്കുന്നതിനാല്‍ പാത്രങ്ങള്‍ നന്നായി വൃത്തിയാവുകയും അണുവിമുക്തമാവുകയും ചെയ്യുന്നു. കൈകള്‍ ഉപയോഗിച്ച് കഴുകുന്നതിനേക്കാള്‍ വളരെ കുറച്ചു വെള്ളം മാത്രമേ ഡിഷ് വാഷറിന് വേണ്ടൂ.

കുറച്ചു പാത്രങ്ങളാണുള്ളതെങ്കില്‍ ഡിഷ് വാഷര്‍ ഉപയോഗിക്കാതിരിക്കുന്നതാണ് നല്ലത്. ഇതിന്റെ അറ്റകുറ്റപ്പണികള്‍ക്കു തന്നെ ചെലവ് കൂടുതലായിരിക്കും. കുക്ക് വെയര്‍ പോലുള്ള വലിയ പാത്രങ്ങള്‍ ഡിഷ് വാഷര്‍ ഉപയോഗിച്ചു കഴുകാന്‍ പാടില്ല. ഇവയൊക്കെ കൈകൊണ്ടാണ് കഴുകേണ്ടത്. പ്ലാസ്റ്റിക്, ക്രിസ്റ്റല്‍ തുടങ്ങിയവ ഡിഷ് വാഷറില്‍ കഴുകുന്നതും ഒഴിവാക്കാം.