ഫിഫ ക്ലബ്ബ് ലോകകപ്പിലെ രണ്ടാം മത്സരത്തിൽ പോർട്ടോക്കെതിരെ ഒന്നിനെതിരെ രണ്ട് ഗോളുകൾക്കായിരുന്നു ഇന്റർ മയാമി വിജയിച്ചത്. ഒരു ഗോളിന് പിന്നിൽ നിന്ന ശേഷം രണ്ട് ഗോൾ തിരിച്ചടിച്ചാണ് ഇന്റർ മയാമി വിജയിച്ചത്. 8ാം മിനിറ്റിൽ സാമു അഘഹോവ നേടിയ പെനൽറ്റി ​ഗോളിലൂടെ പോർട്ടോ ലീഡെടുക്കയായിരുന്നു. തുടർന്ന്, ഉണർന്നു കളിച്ച മെസിയും സംഘവും 47ാം മിനിറ്റിൽ ടെലാസ്കോ സെഗോവിയയിലൂടെ സമനില നേടി. തുടർന്ന് മത്സരം പുരോ​ഗമിക്കവെ 54 മിനിറ്റിൽ പോർട്ടോ ബോക്സിനു പുറത്തു നിന്ന് ഇന്റർ മയാമിക്ക് ലഭിച്ച ഫ്രീകിക്ക് ​ഗോളാക്കി മാറ്റി മെസി മത്സരത്തിൽ മയാമിക്ക് വിജയം നേടിക്കൊടുക്കുകയായിരുന്നു.

ഈ ഗോളോടെ ഫുട്ബോളിൽ മറ്റൊരു തകർപ്പൻ നേട്ടമാണ് മെസി സ്വന്തമാക്കിയത്. ഫിഫയുടെ ടൂർണമെന്റുകളിൽ ഏറ്റവും കൂടുതൽ ഗോളുകൾ നേടുന്ന താരമായി മാറാനാണ് മെസ്സിക്ക് സാധിച്ചത്. 25 ഗോളുകളാണ് മെസി ഫിഫ നടത്തുന്ന ടൂർണമെന്റുകളിൽ അടിച്ചു കൂട്ടിയിട്ടുള്ളത്.

മത്സരത്തിൽ ഷോട്ടുകളുടെ എണ്ണത്തിലും ബോൾ പൊസഷനിലും പോർച്ചഗീസ് ക്ലബ്ബായിരുന്നു ആധിപത്യം പുലർത്തിയത്. 51 ശതമാനം ബോൾ കൈവശം വെച്ച പോർട്ടോ 14 ഷോട്ടുകളാണ് ഇന്റർ മയാമിയുടെ പോസ്റ്റിലേക്ക് ഉതിർത്തത്. ഇതിൽ മൂന്ന് ഷോട്ടുകളും ഓൺ ടാർഗറ്റിലേക്ക് ആയിരുന്നു. മറുഭാഗത്ത് ആറ് ഷോട്ടുകളിൽ നിന്നും അഞ്ചു ഷോട്ടുകൾ ലക്ഷ്യത്തിലേക്ക് എത്തിക്കാൻ മെസിക്കും സംഘത്തിനും സാധിച്ചു. 

വിജയത്തോടെ ഗ്രൂപ്പ് എയിൽ രണ്ട് മത്സരങ്ങളിൽ നിന്നും ഒരു വിജയവും ഒരു സമനിലയും അടക്കം രണ്ട് പോയിന്റോടെ രണ്ടാം സ്ഥാനത്ത് എത്താനും ഇന്റർ മയാമിക്ക് സാധിച്ചു. രണ്ട് മത്സരങ്ങളിൽ നിന്നും ഓരോ വീതം സമനിലയും തോൽവിയുമായി ഒരു പോയിന്റോടെ മൂന്നാം സ്ഥാനത്താണ് പോർട്ടോ. 

ടൂർണമെന്റിലെ ആദ്യ മത്സരത്തിൽ ആഫ്രിക്കൻ ക്ലബ് അൽ അഹ്‌ലിക്കെതിരെ സമനില നേടിയാണ് ഇന്റർ മയാമി രണ്ടാം മത്സരത്തിന് ഇറങ്ങിയത്. ആദ്യ മത്സരത്തിൽ ഇരു ടീമുകളും ഗോൾ രഹിത സമനിലയിൽ പിരിയുകയായിരുന്നു. മറുഭാഗത്ത് പോർച്ചുഗീസ് ക്ലബും ആദ്യ മത്സരത്തിൽ സമനില വഴങ്ങിയിരുന്നു. ബ്രസീലിയൻ ടീമായ പാൽമിറാസ് ആയിരുന്നു പോർട്ടോയെ സമനിലയിൽ തളച്ചത്.

അടുത്ത റൗണ്ടിലേക്ക് മുന്നേറാൻ പോർട്ടോക്ക് അവസാന മത്സരത്തിൽ വിജയം അനിവാര്യമാണ്. മാത്രമല്ല മറ്റ് ടീമുകളുടെ ഫലങ്ങളും പോർച്ചുഗീസ് ക്ലബിന് അനുകൂലമാകേണ്ടതുണ്ട്. ജൂൺ 24ന് അൽ അഹ്ലിയെയാണ് പോർച്ചുഗീസ് ക്ലബ് നേരിടുക. അന്നേദിവസം തന്നെ നടക്കുന്ന മത്സരത്തിൽ ബ്രസീലിയൻ ക്ലബ്ബ് പാൽ മിറാസിനെതിരെയാണ് ഇന്റർ മയാമിയുടെ അടുത്ത മത്സരം.

Lionel Messi Create a Historical Record Fifa Tournaments