അജ്മാന്‍: 40 വര്‍ഷത്തിലേറെ മുമ്പ് ജോലി ചെയ്തിരുന്ന ഇമാറാത്തി കുടുംബവുമായി വീണ്ടും ഒന്നിക്കാനുള്ള ശ്രീലങ്കന്‍ യുവതിയായ റോജിനയുടെ സ്വപ്‌നം സാക്ഷാത്കരിച്ച് അജ്മാന്‍ പൊലിസ്. 'എ ടച്ച് ഓഫ് ലോയല്‍റ്റി' സംരംഭത്തിന്റെ ഭാഗമായി നടന്ന ഈ പുനഃസമാഗമം സന്തോഷത്തിന്റെയും ഓര്‍മകളുടെയും കണ്ണീര്‍ നിറഞ്ഞ വൈകാരിക നിമിഷമായി മാറി.

ALSO READ: പുതിയ വിദേശ വ്യാപാര മന്ത്രാലയം സ്ഥാപിച്ചു; സാമ്പത്തിക മന്ത്രാലയത്തിന് പുതിയ പേര് നൽകി; മാറ്റങ്ങളുമായി യുഎഇ

1982 മുതല്‍ 1987 വരെ അജ്മാനിലെ അലി അബ്ദുല്ല സനാന്‍ അല്‍ ഷെഹിയുടെ കുടുംബത്തില്‍ വീട്ടുജോലിക്കാരിയായി റോജിന പ്രവര്‍ത്തിച്ചിരുന്നു. സ്വന്തം നാട്ടിലേക്ക് മടങ്ങിയെങ്കിലും, ആ കുടുംബത്തിന്റെ സ്‌നേഹവും ബഹുമാനവും അവരുടെ ഹൃദയത്തില്‍ എന്നും നിലനിന്നിരുന്നു. 2025ല്‍ മകളുടെ വിവാഹത്തിനായി യുഎഇ സന്ദര്‍ശിച്ചപ്പോള്‍ ജോലിസമയത്ത് തന്നോട് സ്‌നേഹത്തോടെ പെരുമാറിയ കുടുംബത്തെ വീണ്ടും കാണാനുള്ള ആഗ്രഹം റോജിനയില്‍ ശക്തമായി. 40 വര്‍ഷത്തിനിപ്പുറവും അവരെ കണ്ടെത്താനുള്ള ശ്രമം അവര്‍ ഉപേക്ഷിച്ചിരുന്നില്ല. അജ്മാന്‍ പൊലിസിന്റെ ഇന്‍സ്റ്റാഗ്രാം അക്കൗണ്ടില്‍ തന്റെ കഥ പങ്കുവെച്ച് റോജിന സഹായം അഭ്യര്‍ത്ഥിക്കുകയായിരുന്നു.

റോജിനയുടെ ഹൃദയസ്പര്‍ശിയായ അഭ്യര്‍ത്ഥനയോട് അജ്മാന്‍ പൊലിസ് ഉടന്‍ പ്രതികരിച്ചെന്ന് ഇന്‍വെസ്റ്റിഗേഷന്‍ ആന്‍ഡ് ക്രിമിനല്‍ റിസര്‍ച് ബ്രാഞ്ച് മേധാവി ക്യാപ്റ്റന്‍ സുല്‍ത്താന്‍ ബിന്‍ മുഹമ്മദ് അല്‍ നുഐമി വ്യക്തമാക്കി. പൊലിസ് സംഘം പ്രൊഫഷണലായി പ്രവര്‍ത്തിച്ച് കുടുംബത്തെ കണ്ടെത്തി. തുടര്‍ന്ന് പൊലിസ് റോജിനയ്ക്ക് കുടുംബത്തെ കാണാന്‍ വഴിയൊരുക്കുകയായിരുന്നു. ഇമാറാത്തി കുടുംബത്തിന്റെ വീട്ടില്‍ നടന്ന പുനഃസമാഗമം സ്‌നേഹവും സന്തോഷവും നിറഞ്ഞതായിരുന്നു.

ALSO READ: മയക്കുമരുന്ന് കള്ളക്കടത്ത്, അന്താരാഷ്ട്ര മയക്കുമരുന്ന് ശൃംഖലയുമായും ബന്ധം; രണ്ട് അറബ് പൗരൻമാർ അറസ്റ്റിൽ

ഈ അവിസ്മരണീയ നിമിഷം സാധ്യമാക്കിയ അജ്മാന്‍ പൊലിസിനോട് റോജിനയും കുടുംബവും നന്ദി രേഖപ്പെടുത്തി. സമൂഹത്തിന്റെ സേവനത്തിനും മനുഷ്യത്വത്തിന്റെ മൂല്യങ്ങള്‍ ഉയര്‍ത്തിപ്പിടിക്കുന്നതിനും അജ്മാന്‍ പൊലിസിന്റെ പ്രവര്‍ത്തനങ്ങള്‍ മാതൃകയാണെന്ന് അവര്‍ പറഞ്ഞു.

Ajman Police helped reunite a Sri Lankan woman with her family, turning her long-cherished dream into reality. The emotional reunion highlights the humane side of law enforcement in the UAE.