അബൂദബി: ഇസ്‌റാഈല്‍ ഇറാന്‍ സംഘര്‍ഷം എട്ടാം ദിവസത്തിലേക്ക് കടന്നതിന്റെ പശ്ചാത്തലത്തില്‍ ഇറാനില്‍ നിന്നും നിരവധി പൗരന്മാരെയും താമസക്കാരെയും യുഎഇ  സുരക്ഷിതമായി തിരിച്ചെത്തിച്ചു. ജൂണ്‍ 13ന് ഇസ്‌റാഈല്‍ ഇറാനെതിരെ നടത്തിയ വ്യോമാക്രമണത്തിനു ശേഷം ഇരു രാജ്യങ്ങളും തമ്മിലുള്ള ആക്രമണങ്ങള്‍ ശക്തമായി തുടരുകയാണ്.

ALSO READ: മയക്കുമരുന്ന് കള്ളക്കടത്ത്, അന്താരാഷ്ട്ര മയക്കുമരുന്ന് ശൃംഖലയുമായും ബന്ധം; രണ്ട് അറബ് പൗരൻമാർ അറസ്റ്റിൽ

ഇറാന്‍ അധികൃതരുമായും ബന്ധപ്പെട്ട അധികാരികളുമായും സഹകരിച്ചാണ് യുഎഇ പൗരന്മാരെയും താമസക്കാരെയും തിരിച്ചെത്തിച്ചത്. സംഘര്‍ഷം അവസാനിപ്പിക്കാന്‍ നയതന്ത്ര ചര്‍ച്ചകളും ബന്ധപ്പെട്ട കക്ഷികളുമായുള്ള ആശയവിനിമയവും ആവശ്യമാണെന്ന് യുഎഇ വ്യക്തമാക്കി. മേഖലയില്‍ സ്ഥിരത, നീതി, സമൃദ്ധി എന്നിവ ഉറപ്പാക്കുന്ന സമഗ്രമായ നയതന്ത്ര സമീപനത്തിനാണ് മുന്‍ഗണനയെന്നും യുഎഇ കൂട്ടിച്ചേര്‍ത്തു.

ചൊവ്വാഴ്ച, യുഎഇ പ്രസിഡന്റ് ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍, ഇറാന്‍ പ്രസിഡന്റ് മസൂദ് പെഷേഷ്‌കിയനുമായി ഫോണ്‍ സംഭാഷണത്തില്‍ ഇറാനോടും ജനങ്ങളോടും ഐക്യദാര്‍ഢ്യം പ്രകടിപ്പിച്ചിരുന്നു. സംഘര്‍ഷം മൂലം പ്രാദേശിക സമാധാനത്തിലും സുരക്ഷയിലും ഉണ്ടാകുന്ന ഗുരുതര പ്രത്യാഘാതങ്ങള്‍ ഇരു നേതാക്കളും ചര്‍ച്ച ചെയ്തിരുന്നു.

ALSO READ: പുതിയ വിദേശ വ്യാപാര മന്ത്രാലയം സ്ഥാപിച്ചു; സാമ്പത്തിക മന്ത്രാലയത്തിന് പുതിയ പേര് നൽകി; മാറ്റങ്ങളുമായി യുഎഇ

ഇസ്‌റാഈലില്‍ സൈനിക നടപടി ആരംഭിച്ച് ഒരാഴ്ച പിന്നിട്ടപ്പോള്‍, മിസൈല്‍ നിര്‍മാണ കേന്ദ്രങ്ങള്‍, തെഹ്‌റാനിലെ ആണവായുധ ഗവേഷണ സ്ഥാപനം, പടിഞ്ഞാറന്‍, മധ്യ ഇറാനിലെ സൈനിക കേന്ദ്രങ്ങള്‍ എന്നിവ ഉള്‍പ്പെടെ ഡസന്‍ കണക്കിന് സ്ഥാപനങ്ങള്‍ ഒറ്റ രാത്രിയില്‍ ആക്രമിച്ചതായി ഇസ്‌റാഈല്‍ അവകാശപ്പെട്ടിരുന്നു. ഇതിനു പിന്നാലെ, വെള്ളിയാഴ്ച പുലര്‍ച്ചെ ഇറാന്‍ വീണ്ടും ടെല്‍ അവീവിലും പരിസര പ്രദേശങ്ങളിലും മിസൈല്‍ ആക്രമണം നടത്തിയിരുന്നു. ബീര്‍ഷെബയിലെ റെസിഡന്‍ഷ്യല്‍ അപ്പാര്‍ട്ട്‌മെന്റുകള്‍, ഓഫീസ് കെട്ടിടങ്ങള്‍, വ്യാവസായിക കേന്ദ്രങ്ങള്‍ എന്നിവയ്ക്ക് സമീപവും ഇറാന്‍ ആക്രമണം നടത്തിയെന്നാണ് പുറത്തുവരുന്ന റിപ്പോര്‍ട്ടുകള്‍.

As regional tensions escalate, the UAE has initiated the evacuation of its citizens and residents from Iran. Authorities are taking precautionary measures to ensure their safety.