കടലക്കറി മിക്ക വീടുകളിലും ഉണ്ടാക്കുന്ന ഒരു കറിയാണ്. പ്രത്യേകിച്ച് പുട്ടിന് ഇത് നല്ലൊരു കോമ്പിനേഷന്‍ കൂടിയാണ്. കടലക്കറി ഉണ്ടാക്കണമെങ്കില്‍ കടല തലേദിവസം തന്നെ കുതിര്‍ത്തു വയ്ക്കണം. മറന്നുപോയാല്‍ പിന്നെ ഒരു രക്ഷയുമില്ല. എന്നാല്‍ ഇനി മറന്നു പോയാല്‍ ചെറിയൊരു ട്രിക്കുണ്ട്. ഇതു പ്രയോഗിച്ചാല്‍ നമുക്ക് കുതിര്‍ക്കാന്‍ മറന്നു പോയ കടലയെ പെട്ടെന്നു തന്നെ വേവിച്ചെടുക്കാനും സാധിക്കും. 

 എങ്ങനെയെന്നു നോക്കാം. ഒരു കുക്കര്‍ എടുക്കുക. അതിലേക്ക് കുറച്ച് ഐസ്‌ക്യൂബ്‌സ് ഇട്ടു കൊടുക്കുക. ഇതിലേക്ക് കഴുകിയെടുത്ത കടലയും ആവശ്യത്തിനു ഉപ്പും ചേര്‍ത്ത് കുക്കറില്‍ വേവിച്ചെടുക്കാം. മൂന്നോ നാലോ വിസില്‍ വരുന്നതു വരെ തീയൊന്നു കുറച്ചു വയ്ക്കുക. ശേഷം പെട്ടെന്നു വേവുന്ന കുക്കറാണെങ്കില്‍ അതിനനുസരിച്ച് വിസില്‍ എണ്ണം കൂട്ടുകയും കുറയ്ക്കുകയും ചെയ്യേണ്ടതാണ്. അടിപൊളിയായി  കുതിര്‍ത്തുവച്ച കടല പോലെ തന്നെ നന്നായി വെന്തു വരും.

ഉണ്ടാക്കാം അടിപൊളി കടലക്കറി; പുട്ടിനും ചപ്പാത്തിക്കുമൊക്കെ സൂപ്പറാണ്

കടല - 250 ഗ്രാം
സവാള- 2
ഇഞ്ചി വെളുത്തുള്ളി - ചതച്ചത് ഒരു ടേബിള്‍സ്പൂണ്‍
ഗരം മസാല- ഒരു ടീസ്പൂണ്‍
മഞ്ഞപൊടി- കാല്‍ ടീസ്പൂണ്‍ 
മല്ലിപ്പൊടി - രണ്ട് ടേബിള്‍സ്പൂണ്‍



മുളകു പൊടി -  ഒരു ടേബിള്‍ സ്പൂണ്‍
തക്കാളി -2
കറിവേപ്പില-രണ്ട് തണ്ട്
തേങ്ങ ചിരകിയത് - ഒരുകപ്പ് 

ഉണ്ടാക്കുന്ന വിധം

കുക്കര്‍ ചൂടാകുമ്പോള്‍ അതിലേക്ക് വെളിച്ചെണ്ണ ഒഴിച്ച് കടുക് ഇട്ട് പൊട്ടിക്കുക. ഇതിലേക്ക് സവാള ഇട്ട് വഴറ്റുക. വഴന്നുവരുമ്പോള്‍ ഇഞ്ചി, വെളുത്തുള്ളി ഇട്ടു കൊടുക്കുക. അതിലേക്ക് തക്കാളിയും കൂടെ ചേര്‍ത്ത് നന്നായി വഴറ്റുക. ശേഷം കറിവേപ്പിലയും മല്ലിപ്പൊടിയും മഞ്ഞള്‍ പൊടിയും മുളകുപൊടിയും ചേര്‍ക്കുക. ഇതിലേക്ക് കടല ഇട്ടു കൊടുക്കാവുന്നതാണ്. കുറച്ചു വെള്ളമൊഴിച്ച് നന്നായി മിക്‌സ് ചെയ്ത ശേഷം കുറച്ച് ഗരംമസാല കൂടി ചേര്‍ത്ത് അടച്ചു വച്ചു വേവിക്കുക. കിടിലന്‍ കടലക്കറി റെഡി. (വേണമെങ്കില്‍ തേങ്ങ വറുത്തരച്ചത് ഇതിലേക്കൊഴിച്ച് ഒന്നു തിളപ്പിച്ചെടുക്കാവുന്നതാണ്).