കാലിഫോർണിയ: ഫിഫ ക്ലബ് ലോകകപ്പിൽ നാളെ നടക്കുന്ന മത്സരത്തിൽ ഇന്റർ മയാമി പോർച്ചുഗീസ് ക്ലബ്ബായ പോർട്ടോ എഫ്സിയെയാണ് നേരിടുന്നത്. ആദ്യ മത്സരത്തിൽ ആഫ്രിക്കൻ ക്ലബ്ബായ അൽ അഹ്‌ലിക്കെതിരെ സമനില നേടിയാണ് ഇന്റർ മയാമി രണ്ടാം മത്സരത്തിന് ഇറങ്ങുന്നത്. ആദ്യം മത്സരത്തിൽ ഇരു ടീമുകളും ഗോൾ രഹിത സമനിലയിൽ പിരിയുകയായിരുന്നു. മറുഭാഗത്ത് പോർച്ചുഗീസ് ക്ലബും ആദ്യ മത്സരത്തിൽ സമനില വഴങ്ങിയിരുന്നു. ബ്രസീലിയൻ ടീമായ പാൽമിറാസ് ആയിരുന്നു പോർട്ടോയെ സമനിലയിൽ തളച്ചത്. അതുകൊണ്ടുതന്നെ ഇരുടീമുകളും ജയം ലക്ഷ്യം വെച്ചായിരിക്കും രണ്ടാം മത്സരത്തിൽ കളത്തിൽ ഇറങ്ങുന്നത്. ഈ നിർണായകമായ മത്സരത്തിൽ ഇന്റർ മയാമി നായകൻ ലയണൽ മെസിക്ക് ഒരു തകർപ്പൻ റെക്കോർഡ് സ്വന്തമാക്കാനുള്ള അവസരവുമുണ്ട്.

ടൂർണമെന്റിന്റെ ചരിത്രത്തിലെ ഏറ്റവും മികച്ച ഗോൾ വേട്ടക്കാരനാവാനുള്ള അവസരമാണ് മെസിക്കുള്ളത്. മൂന്ന് ഗോളുകൾ കൂടി നേടിയാൽ മെസിക്ക് ഈ റെക്കോർഡ് സ്വന്തമാക്കാൻ സാധിക്കും. ഏഴ് ഗോളുകൾ ഈ ടൂർണമെന്റിൽ നേടിയ ക്രിസ്റ്റ്യാനോ റൊണാൾഡോയാണ് ഈ പട്ടികയിൽ ഒന്നാം സ്ഥാനത്തുള്ളത്. മെസി അഞ്ചു ഗോളുകളാണ് നേടിയിട്ടുള്ളത്. ഈ സീസണിൽ റൊണാൾഡോ കളിക്കാത്തതിനാൽ മെസിക്ക് ഈ നേട്ടം വളരെ എളുപ്പത്തിൽ തന്റെ പേരിൽ എഴുതിച്ചേർക്കാൻ സാധിക്കും. കരിം ബെൻസിമ, ഗാരത് ബെയ്ൽ എന്നിവർ ആറ് ഗോളുകളും ഈ ടൂർണമെന്റിൽ നേടിയിട്ടുണ്ട്. 

ഇത്തവണ പുതിയ രൂപത്തിലും ഭാവത്തിലുമാണ് ക്ലബ് ലോകകപ്പ് ഒരുക്കിയിട്ടുള്ളത്. ഒരുമാസത്തോളം നീണ്ടുനിൽക്കുന്ന ടൂർണമെന്റിൽ ആറ് വൻകരകളിൽനിന്ന് 32 ടീമുകളാണ് പങ്കെടുക്കുന്നത്. അമേരിക്കയിലെ 11 നഗരങ്ങളിലെ 12 വേദികളിലായിട്ടാണ് മത്സരങ്ങൾ. ജൂലായ് 13നാണ് കിരീടപോരാട്ടം. 32 ടീമുകളെ എട്ടു ഗ്രൂപ്പുകളായി തിരിച്ചാണ് മത്സരം. 

ഗ്രൂപ്പിലെ ആദ്യരണ്ട് സ്ഥാനക്കാർ പ്രീക്വാർട്ടറിലെത്തും. 2021 മുതൽ 2024 വരെയുള്ള ക്ലബ് ഫുട്‌ബോളിലെ പ്രകടനത്തിന്റെ അടിസ്ഥാനത്തിൽനിന്നാണ് ആറ് ടീമുകളെ തിരഞ്ഞെടുത്തത്. യൂറോപ്പിൽനിന്ന് 12 ടീമുകളും തെക്കേ അമേരിക്കയിൽനിന്ന് ആറ് ടീമുകളുമുണ്ട്. ആഫ്രിക്ക, ഏഷ്യ, കോൺകകാഫ് എന്നിവിടങ്ങളിൽനിന്ന് നാലു ടീമുകൾ വീതവും ഓഷ്യാനിയയിൽനിന്ന് ഒരു ടീമും കളിക്കും.

Lionel Messi Need Three Goals to create a new record in Fifa Club World Cup