ഇന്ത്യ-ഇംഗ്ലണ്ട് അഞ്ച് ടെസ്റ്റ് മത്സരങ്ങളുടെ പരമ്പരയ്ക്ക് നാളെയാണ് തുടക്കം കുറിക്കുന്നത്. രോഹിത് ശർമ, വിരാട് കോഹ്‌ലി എന്നീ പ്രധാന താരങ്ങൾ വിരമിക്കൽ പ്രഖ്യാപിച്ചതിന് പിന്നാലെ യുവതാരം ശുഭ്മൻ ഗില്ലിന്റെ നേതൃത്വത്തിലാണ് ഇംഗ്ലണ്ടിനെതിരെ ഇന്ത്യ കളത്തിറങ്ങുന്നത്. ഇപ്പോൾ ഈ പരമ്പരയിൽ ഏത് താരത്തെയാണ് ഇന്ത്യ ഏറ്റവും കൂടുതൽ മിസ്സ് ചെയ്യുകയെന്ന് തുറന്നു പറഞ്ഞിരിക്കുകയാണ് മാസ്റ്റർ ബ്ലാസ്റ്റർ സച്ചിൻ ടെണ്ടുൽക്കർ. എല്ലാ ആളുകളും രോഹിത്തിനെയും വിരാടിനെയും കുറിച്ച് മാത്രമേ സംസാരിക്കുന്നുള്ളൂവെന്നും എന്നാൽ ആർ അശ്വിന്റെ അഭാവം ഇന്ത്യയിൽ നിറഞ്ഞുനിൽക്കും എന്നുമാണ് സച്ചിൻ പറഞ്ഞത്.

"ഇന്ത്യൻ ക്രിക്കറ്റിന് ഇതൊരു പരിവർത്തനത്തിന് കാലമാണ്. ഒരുപാട് യുവതാരങ്ങൾ ടീമിലേക്ക് കടന്നു വരുന്നുണ്ട്. ടീമിൽ നിങ്ങളെ പ്രചോദിപ്പിക്കുന്ന ആളുകളെയാണ് ആവശ്യം. രോഹിത്, വിരാട്, അശ്വിൻ ഇവർ ഇല്ലാതെ ഈ കാര്യങ്ങൾ എളുപ്പമാകില്ല. എല്ലാവരും രോഹിത്തിനെയും വിരാടിനെയും കുറിച്ചാണ് സംസാരിക്കുന്നത്. എന്നാൽ ധാരാളം യുവതാരങ്ങളെ പ്രചോദിപ്പിക്കുന്നതിൽ അശ്വിനും ഒരു വലിയ പങ്കു വഹിച്ചിട്ടുണ്ട് എന്ന് ഞാൻ കരുതുന്നു. അവരില്ലാതെ ഇന്ത്യ കളിക്കാൻ ഇറങ്ങുന്നത് വെല്ലുവിളി നിറഞ്ഞതായിരിക്കുമെന്ന് എനിക്ക് തോന്നുന്നു" സച്ചിൻ സ്കൈ സ്പോർട്സിന് നൽകിയ അഭിമുഖത്തിൽ പറഞ്ഞു.

കഴിഞ്ഞ വർഷത്തെ ബോർഡർ ഗവസ്‌കർ ട്രോഫിയിൽ ആണ് അശ്വിൻ ഇന്റർനാഷണൽ ക്രിക്കറ്റിൽ നിന്നും വിരമിക്കൽ പ്രഖ്യാപിച്ചത്. ഇന്ത്യ- ഓസ്‌ട്രേലിയ ബോർഡർ ഗാവസ്‌കർ ട്രോഫിയിലെ മൂന്നാം ടെസ്റ്റ് മത്സരത്തിനിടെയാണ് അശ്വിൻ വിരമിക്കൽ തീരുമാനം പുറത്തുവിട്ടത്. നീണ്ട 13 വർഷക്കാലം ഐതിഹാസികമായ ക്രിക്കറ്റ് കരിയറാണ് അശ്വിൻ കെട്ടിപ്പടുത്തുയർത്തിയത്. റെഡ് ബോൾ ക്രിക്കറ്റിൽ 106 മത്സരങ്ങളിൽ ഇന്ത്യക്കായി കളിച്ച താരം 537 വിക്കറ്റുകളും നേടിയിട്ടുണ്ട്. ടെസ്റ്റ് ക്രിക്കറ്റിൽ ഇന്ത്യക്കായി ഏറ്റവും കൂടുതൽ വിക്കറ്റുകൾ നേടിയ താരങ്ങളുടെ പട്ടികയിൽ രണ്ടാം സ്ഥാനത്തുമാണ് അശ്വിൻ ഉള്ളത്.

വേൾഡ് ടെസ്റ്റ് ചാമ്പ്യൻഷിപ്പിൽ 41 മത്സരങ്ങളിൽ നിന്നും 195 വിക്കറ്റുകളും അശ്വിൻ നേടിയിട്ടുണ്ട്. ഇന്ത്യക്കായി 116 ഏകദിനമത്സരങ്ങളിൽ പന്തെറിഞ്ഞ അശ്വിൻ 116 വിക്കറ്റുകൾ നേടിയിട്ടുണ്ട്. 65 ടി20 മത്സരങ്ങളിൽ നിന്നായി 72 വിക്കറ്റും നേടി. ബൗളർ എന്നതിനപ്പുറം ബാറ്റർ എന്ന നിലയിലും അശ്വിൻ ഇന്ത്യൻ ടീമിന് ഒരുപാട് സംഭാവനകൾ നൽകിയിട്ടുണ്ട്. ടെസ്റ്റ് ക്രിക്കറ്റിൽ 14 അർദ്ധ സെഞ്ചുറികളും ആറ് സെഞ്ചുറികളുമാണ് അശ്വിൻ നേടിയത്. 

Sachin Tendulker Talks About R Ashwin Absence in Indian Cricket Team