ജനീവ: ഇറാൻ-ഇസ്‌റാൽ സംഘർഷം പശ്ചിമേഷ്യയിൽ യുദ്ധ ഭീതി ശക്തമാക്കിയ സാഹചര്യത്തിൽ ചർച്ചക്ക് മുൻകൈ എടുത്ത് ബ്രിട്ടനും ഫ്രാൻസും ജർമ്മനിയും. ജനീവയിൽ നാളെ നടക്കുന്ന നിർണായക യോഗത്തിൽ മൂന്ന് രാജ്യങ്ങളുടെയും വിദേശകാര്യമന്ത്രിമാരാണ് പങ്കെടുക്കുന്നത്. യോഗത്തിൽ പങ്കെടുക്കാമെന്ന് ഇറാൻ അറിയിച്ചിട്ടുണ്ട്.

വിദേശകാര്യ മന്ത്രി അബ്ബാസ് അരാഗ്ചിയാണ് ഇറാൻ പ്രതിനിധിയായി യോഗത്തിൽ പങ്കെടുക്കുക. അബ്ബാസ് അരാഗ്ചി പങ്കെടുക്കുന്ന കാര്യം ഇറാനിയൻ വാർത്താ ഏജൻസിയായ ഐ.ആർ.എൻ.എ റിപ്പോർട്ട് ചെയ്തു. മൂന്ന് യൂറോപ്യൻ രാജ്യങ്ങളുടെ അഭ്യർത്ഥന പ്രകാരമാണ് കൂടിക്കാഴ്ച നടക്കുന്നതെന്നും അരാഗ്ചി വ്യക്തമാക്കിയതായി റിപ്പോർട്ടിൽ പറയുന്നു. 

സംഘർഷം ലഘൂകരിക്കാൻ യൂറോപ്യൻ രാജ്യങ്ങൾ ആഹ്വാനം ചെയ്യുന്നതിനിടയിലും ഇറാനെതിരായ ആക്രമണങ്ങളിൽ പങ്കുചേരണോ വേണ്ടയോ എന്ന് ആലോചനയിലാണ് യുഎസ് പ്രസിഡന്റ് ഡൊണാൾഡ് ട്രംപ്. ഇതിനിടെയാണ്  ഈ കൂടിക്കാഴ്ച എന്നതാണ് ശ്രദ്ധേയം.

ALSO READ: ഖാംനഇയെ വധിക്കുക തന്നെ ചെയ്യുമെന്ന് ഇസ്‌റാഈല്‍,  അതാണ് യുദ്ധത്തിന്റെ പരമലക്ഷ്യമെന്ന് ഇസ്‌റാഈല്‍ പ്രതിരോധമന്ത്രി; വധഭീഷണി വെറും വിഢിത്തമെന്ന് ഹിസ്ബുല്ല

അതേസമയം, ബ്രിട്ടീഷ് വിദേശകാര്യ സെക്രട്ടറി ഡേവിഡ് ലാമി യു.എസ് സ്റ്റേറ്റ് സെക്രട്ടറി മാർക്കോ റൂബിയോയുമായി ചർച്ച നടത്താൻ തീരുമാനിച്ചിട്ടുണ്ട്. വാഷിങ്ടണിൽ വെച്ചാണ് ചർച്ച. മിഡിൽ ഈസ്റ്റിലെ സ്ഥിതിഗതികലാണ് ചർച്ചയിൽ പ്രധാന വിഷയമെന്ന് യു.കെ വിദേശകാര്യ ഓഫിസ് വ്യാഴാഴ്ച സി.എൻ.എന്നിനോട് പറഞ്ഞു.

ഇതിനിടെ അമേരിക്കക്ക് പരോക്ഷ താക്കീതുമായി ചൈന രംഗത്തെത്തിയ ഇസ്‌റാഈലിനു മേൽ സ്വാധീനമുള്ള രാജ്യങ്ങൾ പക്ഷം ചേർന്ന് പ്രകോപനം സൃഷ്ടിക്കരുതെന്നാണ് പ്രസിഡന്റ് ഷിൻജിൻ പിങ് നൽകിയ താക്കീത്.  ഇറാനെതിരായ നടപടിയെ ന്യായീകരിക്കുന്നത് പരിഹാസ്യമാണെന്ന് റഷ്യയും ഓർമിപ്പിച്ചു. 

ഇസ്‌റാഈലിനെതിരേ ഔദ്യോഗികമായി യുദ്ധം പ്രഖ്യാപിച്ചിരിക്കുകയാണ് ഇറാൻ. പരമോന്നത നേതാവ് ആയത്തുല്ല അലി ഖാംനഇ ആണ് രാഷ്ട്രത്തെ അഭിസംബോധന ചെയ്യവെ യുദ്ധം തുടങ്ങിയതായി പ്രഖ്യാപിച്ചത്. ചെയ്ത തെറ്റിന് ഇസ്‌റാഈൽ ശിക്ഷിക്കപ്പെടുമെന്നും ഇറാൻ ആർക്കു മുന്നിലും കീഴടങ്ങില്ലെന്നും ഖാംനഇ പറഞ്ഞു. ഇറാൻ നിരുപാധികം കീഴടങ്ങണമെന്നും ഇറാന്റെ ആകാശം തങ്ങളുടെ നിയന്ത്രണത്തിലാണെന്നും കഴിഞ്ഞ ദിവസം യു.എസ് പ്രസിഡന്റ് ഡൊണാൾഡ് ട്രംപ് ഭീഷണി മുഴക്കിയിരുന്നു. ഇത് ഇറാൻ തള്ളി.

ALSO READ: ഇസ്‌റാഈലില്‍ അല്‍ജസീറയുടെ പ്രക്ഷേപണം അനുവദിക്കില്ല, കാണുന്നവരെ കുറിച്ച് പൊലിസില്‍ റിപ്പോര്‍ട്ട് ചെയ്യണമെന്ന് ആഭ്യന്തര സുരക്ഷാ മന്ത്രി

ഇസ്‌റാഈലിന് നേരെ ആക്രമണം ശക്തമാക്കിയിരിക്കുകയാണ് ഇറാൻ. സയണിസ്റ്റ് നഗരങ്ങൾ ലക്ഷ്യമാക്കി നൂറുകണക്കിന് മിസലുകളാണ് ഇറാൻ അയച്ചത്. ആക്രമണങ്ങളിൽ കനത്ത നാശമുണ്ടായെന്നാണ് റിപ്പോർട്ട്. നിരവധി പേർക്ക് പരുക്കേറ്റിട്ടുണ്ട്. 50 ലേറെ പേർക്ക് പരുക്കേറ്റതായി ഇസ്‌റാഈൽ മാധ്യമങ്ങൾ റിപ്പോർട്ട് ചെയ്യുന്നു. തെൽ അവീവ്, രാമത് ഗാൻ, ഹൂളൻ തുടങ്ങിയ സ്ഥലങ്ങളിലാണ് കനത്ത നാശമുണ്ടായത്.

ബീർബെഷയിൽ സുറോക്ക ആശുപത്രിയിലും ഇറാൻ മിസൈൽ പതിച്ചതായി ഇസ്‌റാഈൽ മാധ്യമമായ ടൈംസ് ഓഫ് ഇസ്‌റാഈൽ റിപ്പോർട്ട് ചെയ്തു. ആശുപത്രിയിൽ നിന്നും ഉടൻ രോഗികളെ മാറ്റുകയാണെന്നും റിപ്പോർട്ടിൽ പറയുന്നു. ആക്രമണത്തിൽ 20 പേർക്ക് പരുക്കേറ്റതായി മെഡിക്കല് സെന്റർ അറിയിക്കുന്നു. ഇതിൽ മൂന്നു പേരുടെ നില ഗുരുതരമാണ്.ആശുപത്രിയിൽ വിഷവാതകം ചോർന്നതായും സംശയമുണ്ട്. അതിനാൽ രേഗികളെ ഒഴിപ്പിക്കുകയാണ്. ആശുപത്രിക്ക് കനത്ത് നാശനഷ്ടമുണ്ടായതായി സൊറോക്ക് മെഡിക്കൽ സെന്റർ വക്താവ് പ്രതികരിച്ചു. ആശുപത്രിയിൽ ചികിത്സ തേടി ആരും വരരുതെന്ന് അറിയിപ്പ് നൽകിയിട്ടുണ്ട്. ഇസ്‌റാഈലിനെതിരെ പന്ത്രണ്ടാമത് റൗണ്ട് ആക്രമണത്തിൽ കഴിഞ്ഞ ദിവസം രാത്രി ഇറാൻ ദീർഘദൂര മിസൈലായ 'സിജ്ജീൽ' പ്രയോഗിച്ചിരുന്നു. ഇറാൻ ഇതുവരെ 400 മിസൈലുകളും നൂറുകണക്കിന് ഡ്രോണുകളുമാണ് ഇസ്‌റാഈലിന് നേരെ തൊടുത്തത്. ഇസ്‌റാഈലിൽ 24 പേർ കൊല്ലപ്പെടുകയും നൂറിലേറെ പേർക്ക് പരിക്കേൽക്കുകയും ചെയ്തു.

അതേസമയം, ഇറാനിലെ അരാകിൽ ഇസ്‌റാഈൽ ആക്രമണം നടത്തി. ഇവിടത്തെ ആണവറിയാക്ടറിന് സമീപത്തെ വാട്ടർ പ്ലാന്റിന് നേരയാണ് ആക്രമണമുണ്ടായത്. പ്രദേശത്ത് ആണവചോർച്ചയുണ്ടായിട്ടില്ലെന്നാണ് റിപ്പോർട്ടുകൾ.തെഹ്‌റാനിൽ ബുധനാഴ്ച പുലർച്ച ശക്തമായ സ്‌ഫോടനമുണ്ടാായി. ഇസ്‌റാഈൽ ആക്രമണത്തിൽ 224 പേർ കൊല്ലപ്പെട്ടതായും 1277 പേർക്ക് പരിക്കേറ്റതായും ഇറാൻ സ്ഥിരീകരിച്ചു.