ദുബൈ: വിവാഹമോചിതയായ ഭാര്യയെ ജീവിതത്തിലേക്ക് തിരിച്ചുകൊണ്ടുവരാന്‍ മന്ത്രവാദത്തിനായി 30,000 ദിര്‍ഹവും ഭാര്യയുടെ സ്വകാര്യ ഫോട്ടോകളും നല്‍കിയ യുവാവിന് ഫുജൈറ അപ്പീല്‍ കോടതി ആറ് മാസം തടവ് ശിക്ഷ വിധിച്ചു. സ്വകാര്യതാ ലംഘനം, സൈബര്‍ കുറ്റകൃത്യം, വഞ്ചന എന്നീ കുറ്റങ്ങള്‍ ചുമത്തിയാണ് വിധി.

ALSO READ: പാഴ്‌സൽ തട്ടിപ്പുകൾ വർധിക്കുന്നു: വ്യാജ സന്ദേശങ്ങൾ എങ്ങനെ കണ്ടെത്താമെന്ന് ഉപഭോക്താക്കളെ പഠിപ്പിക്കാൻ AI ഉപയോഗിച്ച് അരാമെക്‌സ്

ഭര്‍ത്താവ് തനിക്കും കുട്ടികള്‍ക്കും ബന്ധുക്കള്‍ക്കും എതിരെ മന്ത്രവാദം നടത്തിയെന്ന് ആരോപിച്ച് വിവാഹമോചിതയായ ഭാര്യ പൊലിസില്‍ പരാതി നല്‍കിയിരുന്നു. ഒരു മന്ത്രവാദിയുമായി ഭര്‍ത്താവ് നടത്തിയ വാട്ട്‌സ്ആപ്പ് ചാറ്റും മന്ത്രവാദിക്ക് അയച്ചുനല്‍കിയ ഫോട്ടോകളും ലഭിച്ചതോടെയാണ് യുവാവിനെ പൊലിസ് അറസ്റ്റു ചെയ്തത്.

എമറാത്ത് അല്‍ യൂം റിപ്പോര്‍ട്ട് പ്രകാരം, യുവാവ് ഓണ്‍ലൈന്‍ വഴി 'പ്രിയപ്പെട്ടവരെ തിരിച്ചുകൊണ്ടുവരുന്ന' വിദഗ്ധയെന്ന് അവകാശപ്പെട്ട മറ്റൊരു അറബ് രാജ്യത്തെ സ്ത്രീയെ പരിചയപ്പെട്ടിരുന്നു. 20,000 ദിര്‍ഹം വാഗ്ദാനം ചെയ്ത് ഭാര്യയുടെ ഫോട്ടോകള്‍, വീഡിയോ, ഫോണ്‍ നമ്പറുകള്‍ എന്നിവ അയച്ചു. പിന്നീട് 25,000 ദിര്‍ഹം കൂടി ആവശ്യപ്പെട്ടപ്പോള്‍ ഇത് നല്‍കാന്‍ യുവാവ് തയ്യാറായില്ല. തുടര്‍ന്ന്, മന്ത്രവാദിയായ യുവതി ഇതെല്ലാം യുവാവിന്റെ മുന്‍ഭാര്യക്ക് അയക്കുകയായിരുന്നു. യുവാവ് പിന്നീട് മറ്റൊരു മന്ത്രവാദിനിക്ക് 10000 ദിര്‍ഹം നല്‍കി മുന്‍ഭാര്യയെ തിരികെ കൊണ്ടുവരാന്‍ ശ്രമിച്ചിരുന്നു. ഇതിനിടെയാണ് പൊലിസ് ഇയാളെ അറസ്റ്റ് ചെയ്തത്.

തുടര്‍ച്ചയായ പീഡനം കാരണമാണ് യുവതി ഇയാളില്‍ നിന്നും വിവാഹമോചനം നേടിയത്. ഭാര്യയെ തിരികെ കൊണ്ടുവരാമെന്ന് ഏറ്റ മന്ത്രവാദിനി ചതിച്ചതാണ് യുവാവിനെ കുടുക്കിയത്.

ALSO READ: ഇസ്റാഈൽ - ഇറാൻ സംഘർഷം; വിസ കാലാവധി കഴിഞ്ഞും യുഎഇയില്‍ തങ്ങുന്ന ഇറാന്‍ പൗരന്മാര്‍ക്ക് പിഴയില്‍ ഇളവ്

നാല് കുറ്റങ്ങളാണ് യുവാവിനെതിരെ പബ്ലിക് പ്രോസിക്യൂഷന്‍ ചുമത്തിയത്. വഞ്ചന, സ്വകാര്യത ലംഘനം, അനധികൃതമായി വ്യക്തിഗത വസ്തുക്കള്‍ കൈവശം വയ്ക്കല്‍, മറ്റുള്ളവരെ അപകടത്തിലാക്കല്‍ എന്നീ കുറ്റങ്ങളാണ് യുവാവിനെതിരെ ചുമത്തിയത്. യുവാവിന് ആറ് മാസം തടവുശിക്ഷ വിധിച്ച കോടതി പിടിച്ചെടുത്ത വസ്തുക്കള്‍ നശിപ്പിക്കാനും ഉത്തരവിട്ടു.

A man has been sentenced to six months in prison for using sorcery in an attempt to make his divorced wife return to him. Authorities deemed the act a criminal offense.