അബൂദബി: അഴിമതിക്കേസില്‍ ഇന്റര്‍പോള്‍ മുന്‍ ഉദ്യോഗസ്ഥനും മാള്‍ഡോവന്‍ പൗരനുമായ വിറ്റാലി പിര്‍ലോഗിനെ അറസ്റ്റ് ചെയ്തതായി യു.എ.ഇ ആഭ്യന്തര മന്ത്രാലയം അറിയിച്ചു. ഫ്രഞ്ച് അധികൃതരുടെ അഭ്യര്‍ത്ഥന പ്രകാരമാണ് ഇയാളെ അറസ്റ്റ് ചെയ്തത്. ഇന്റര്‍പോള്‍ റെഡ് നോട്ടിസിന് വിധേയനായ പിര്‍ലോഗിനെ ജൂണ്‍ 15ന് അറസ്റ്റ് ചെയ്തു. ഇന്റര്‍പോളിന്റെ ഫയല്‍ നിയന്ത്രണ കമ്മീഷന്റെ ചെയര്‍മാനായിരുന്ന പിര്‍ലോഗിനെതിരെ വ്യാജരേഖ ചമയ്ക്കല്‍, കൈക്കൂലി, പ്രേരണ, വഞ്ചന എന്നീ കുറ്റങ്ങള്‍ ചുമത്തുകയും റെഡ് കോര്‍ണര്‍ നോട്ടിസ് പുറപ്പെടുവിക്കുകയും ചെയ്തിരുന്നു.

ഇക്കാര്യത്തില്‍ യു.എ.ഇ ആഭ്യന്തര മന്ത്രാലയം സ്വീകരിച്ച നടപടികളെ ഫ്രഞ്ച് ഉദ്യോഗസ്ഥര്‍ അംഗീകരിച്ചു. അതിര്‍ത്തി കടന്നുള്ള കുറ്റകൃത്യങ്ങള്‍ക്കെതിരെ സംയുക്ത അന്താരാഷ്ട്ര നടപടി അനിവാര്യമാണെന്ന് ഫ്രഞ്ച് സംഘം വ്യക്തമാക്കി. കുറ്റകൃത്യങ്ങളില്‍ ഏര്‍പ്പെട്ട അന്തര്‍ദേശീയ കുറ്റവാളികളെ യു.എ.ഇ മുന്‍പും അറസ്റ്റ് ചെയ്തിട്ടുണ്ട്. ഫെബ്രുവരിയില്‍ മയക്കുമരുന്നുമായി ബന്ധപ്പെട്ട കുറ്റകൃത്യങ്ങളുടെ പേരില്‍ കുറ്റം ചുമത്തിയ ഫ്രഞ്ച് കുറ്റവാളി മെഹ്ദി ചരഫയെ ഫ്രാന്‍സിന് കൈമാറിയതായി യു.എ.ഇ അറിയിച്ചിരുന്നു.

ഫിലിപ്പീന്‍സില്‍ 100ലധികം കുട്ടികളെ ലൈംഗികമായി ചൂഷണം ചെയ്ത കേസിലെ പ്രതിയായ ഫിലിപ്പീന്‍സ് സ്വദേശിയെ കഴിഞ്ഞ വര്‍ഷം യു.എ.ഇയില്‍ അറസ്റ്റ് ചെയ്യുകയും പിന്നീട് നാടു കടത്തുകയും ചെയ്തിരുന്നു.

Vitalie Pirlog, former Minister of Justice and ex-head of the Information and Security Service of the Republic of Moldova, was detained in the city of Dubai, United Arab Emirates, on June 15, following a red notice issued by INTERPOL