ഗസ്സ സിറ്റി: വെള്ളിയാഴ്ച പുലർച്ചെ മുതൽ ഗസ്സ മുനമ്പിലുടനീളം കുറഞ്ഞത് 34 ഫലസ്തീനികളെ ഇസ്‌റാഈൽ കൊലപ്പെടുത്തിയതായി  ഫലസ്തീൻ ഇൻഫർമേഷൻ സെന്റർ റിപ്പോർട്ട് ചെയ്തു. സെൻട്രൽ നുസൈറത്തിലെ സലാ അൽ-ദിൻ റോഡിൽ ഭക്ഷണം ഉൾപ്പെടെയുള്ള സഹായങ്ങൾ സ്വീകരിക്കാൻ എത്തിയവർക്ക് നേരെയുണ്ടായ വെടിവെപ്പിലാണ് ഇരുപത്തിമൂന്ന് സാധാരണക്കാർ വെടിയേറ്റ് മരിച്ചത്. ഇതിന് അടുത്തുള്ള ദെയ്ർ അൽ-ബലയിൽ, ഒരു ജനവാസ മേഖലയിൽ ഇസ്രായേലി വ്യോമാക്രമണം ഉണ്ടായതായും നിരവധി പേർക്ക് പരിക്കേറ്റതായും റിപ്പോർട്ടുകളുണ്ട്. 

വടക്കൻ ഗസ്സയിൽ, ജബലിയയിൽ ഇസ്‌റാഈലി ഡ്രോണുകൾ ബോംബാക്രമണം നടത്തി. ഇസ്‌റാഈലി ഗ്രൗണ്ട് യൂണിറ്റുകൾ നടത്തിയ പൊളിക്കൽ പ്രവർത്തനങ്ങൾക്കിടയിൽ ബെയ്റ്റ് ലാഹിയയിൽ കനത്ത സ്ഫോടനങ്ങൾ ഉണ്ടായതായി ഫലസ്തീൻ മാധ്യമങ്ങൾ റിപ്പോർട്ട് ചെയ്തു. ഇതിനിടെ, ഗസ്സ സിറ്റിയിൽ, അൽ-ഷുജയ്യ, അൽ-തുഫ പ്രദേശങ്ങളിലെ മുഴുവൻ റെസിഡൻഷ്യൽ ബ്ലോക്കുകളും ആക്രമണങ്ങളിൽ തകർത്തു.

മാനുഷിക മേഖലകൾ എന്ന് വിളിക്കപ്പെടുന്ന സഹായം വിതരണം ചെയ്യുന്ന കേന്ദ്രങ്ങളെ ഇസ്‌റാഈൽ ആവർത്തിച്ച് ലക്ഷ്യം വയ്ക്കുന്നതിനെതിരെ വർധിച്ചുവരുന്ന പ്രതിഷേധത്തിനിടയിലാണ് ഏറ്റവും പുതിയ ആക്രമവും ഉണ്ടായത്. മെയ് 27 മുതൽ, സഹായ വിതരണം നൽകുന്നതിനുള്ള യുഎസ്-ഇസ്‌റാഈൽ സ്ഥാപനമായ ഗസ്സ ഹ്യുമാനിറ്റേറിയൻ റിലീഫ് ഇൻസ്റ്റിറ്റ്യൂഷനുമായി ബന്ധപ്പെട്ട പ്രദേശങ്ങളിൽ നടന്ന വെടിവെപ്പിൽ 420-ലധികം ഫലസ്തീനികൾ കൊല്ലപ്പെടുകയും 3,000-ത്തോളം പേർക്ക് പരുക്കേൽക്കുകയും ചെയ്തു. 

ഗസ്സയിലെ ആരോഗ്യ മന്ത്രാലയത്തിന്റെ കണക്കനുസരിച്ച്, 2023 ഒക്ടോബർ 7 മുതൽ, ഇസ്‌റാഈൽ സൈനിക നടപടികളിൽ 55,706 ഫലസ്തീനികൾ കൊല്ലപ്പെടുകയും 130,000 ത്തിലധികം പേർക്ക് പരിക്കേൽക്കുകയും ചെയ്തു.