തിരുവനന്തപുരം: വൈദ്യുതിവേലി നിര്‍മാണത്തിന് പ്രത്യേക അനുമതി നിര്‍ബന്ധമാണെന്ന് കെ.എസ്.ഇ.ബി. വൈദ്യുതി വേലിയില്‍ നിന്ന് ഷോക്കേറ്റ് അപകടങ്ങള്‍ വര്‍ധിക്കുന്ന സാഹചര്യത്തിലാണ് കെ.എസ്.ഇ.ബി നിർദേശം.
കഴിഞ്ഞ രണ്ടുകൊല്ലത്തിനിടെ 24 പേരാണ് ഇത്തരത്തില്‍ മരിച്ചത്. അടുത്തിടെ രണ്ട് കുട്ടികളുള്‍പ്പെടെ ഷോക്കേറ്റ് മരിക്കുന്ന സ്ഥിതിയുണ്ടായി. പലപ്പോഴും കെ.എസ്.ഇ.ബിയുടെ വൈദ്യുതിലൈനില്‍ നിന്ന് അനധികൃതമായി വൈദ്യുതി മോഷ്ടിച്ചോ, വീട്ടിലെ കണക്ഷനില്‍ നിന്നോ വേലികളിലേക്ക് വൈദ്യുതി കടത്തിവിടുന്നതാണ് ഇത്തരത്തില്‍ അപകടത്തില്‍ കലാശിക്കുന്നതെന്നാണ് കെ.എസ്.ഇ.ബിയുടെ വാദം. 

വന്യജീവി ആക്രമണത്തെയും വിളനാശത്തെയും ചെറുക്കാന്‍ വൈദ്യുതി വേലികള്‍ സ്ഥാപിക്കുന്നതിന് ഇലക്ട്രിക്കല്‍ ഇന്‍സ്‌പെക്ടറേറ്റില്‍ നിന്നുള്ള പ്രത്യേക അനുമതി ആവശ്യമാണ്. ഒരു കാരണവശാലും കെ.എസ്.ഇ.ബി ലൈനില്‍ നിന്നുള്ള വൈദ്യുതി നേരിട്ടോ, അല്ലാതെയോ ഇത്തരം വൈദ്യുതി വേലികളിലേക്ക് പ്രവഹിപ്പിക്കാന്‍ പാടില്ല. വൈദ്യുത വേലികള്‍ക്കുവേണ്ടി അനധികൃതമായി വൈദ്യുതി ഉപയോഗിക്കുന്നത് മൂന്നുവര്‍ഷം വരെ തടവും പിഴയും അല്ലെങ്കിൽ രണ്ടും കൂടിയോ ചുമത്താവുന്ന ക്രിമിനല്‍ കുറ്റവുമാണ്. 

ALSO READ: ആണവപദ്ധതി ഉപക്ഷിക്കില്ല, കടുപ്പിച്ച് ഇറാന്‍; നയതന്ത്രദൗത്യം തുടര്‍ന്ന് യൂറോപ്യന്‍ ശക്തികള്‍; തെഹ്‌റാനിലെ ജനവാസ കേന്ദ്രങ്ങളെ ആക്രമിച്ച് ഇസ്‌റാഈല്‍; ഇറാന്‍ ആക്രമണത്തില്‍ വീണ്ടും വിറച്ച് തെല്‍ അവീവ്  

പൊതുജനങ്ങളുടെ സഹകരണത്തോടെ മാത്രമേ ഇത്തരം അപകടകരമായ കുറ്റകൃത്യങ്ങള്‍ക്ക് പൂര്‍ണമായും തടയിടാനാകൂവെന്നും വൈദ്യുതിയുടെ ദുരുപയോഗം ശ്രദ്ധയില്‍പ്പെട്ടാല്‍ കെ.എസ്.ഇ.ബി സെക്ഷന്‍ ഓഫിസിലോ, 9496010101 എന്ന എമര്‍ജന്‍സി നമ്പരിലോ അറിയിക്കണമെന്ന് കെ.എസ്.ഇ.ബി അറിയിച്ചു.

In the past two years, 24 people have died due to electrocution from electric fences.