കോഴിക്കോട്: നിലമ്പൂർ ഉപതെരഞ്ഞെടുപ്പ് ഫലം കോൺഗ്രസ് നേതൃത്വത്തിന് നിർണായകമാവും. 5,000ത്തിനും 10,000 ത്തിനുമിടയിൽ ഭൂരിപക്ഷം നേടി ആര്യാടൻ ഷൗക്കത്ത് നിയമസഭയിൽ എത്തുമെന്നാണ് തെരഞ്ഞെടുപ്പിന് ശേഷമുള്ള യു.ഡി.എഫിന്റെ അന്തിമ കണക്കുകൂട്ടൽ. എന്നാൽ ഫലം മറിച്ചായാൽ പ്രതിപക്ഷ നേതാവ് വി.ഡി സതീശനും സണ്ണി ജോസഫിന്റെ നേതൃത്വത്തിലുള്ള  പുതിയ കെ.പി.സി.സി നേതൃത്വത്തിനും തിരിച്ചടിയാവും. ജയിച്ചാലും തോറ്റാലും പലതരത്തിലുള്ള ചലനങ്ങൾ കോൺഗ്രസിൽ ഉണ്ടാവുമെന്ന് ഉറപ്പാണ്. 

മികച്ച വിജയം ലഭിച്ചാൽ തദ്ദേശ, നിയമസഭാ തെരഞ്ഞെടുപ്പുകളിൽ യു.ഡി.എഫിനും കോൺഗ്രസിനും ഇത് ഊർജമാകും. ഭരണമാറ്റം ഉണ്ടാകുമെന്ന പ്രതീതി ജനങ്ങൾക്ക് നൽകാനുമാവും. ഷൗക്കത്ത് മികച്ച ഭൂരിപക്ഷത്തിന് ജയിച്ചാൽ വി.ഡി സതീശന്റെ നിലപാടുകളുടെ വിജയം കൂടിയായി ഇത് വ്യാഖ്യാനിക്കപ്പെടും. 

സ്ഥാനാർഥി നിർണയ ഘട്ടത്തിൽ വി.എസ് ജോയിക്കുവേണ്ടി കരുനീക്കം നടന്നെങ്കിലും സതീശൻ ഷൗക്കത്തിനൊപ്പം ഉറച്ചുനിൽക്കുകയായിരുന്നു.അൻവറിനെ അപ്രസക്തമാക്കുന്ന തരത്തിലാണ് വോട്ടുകളുടെ കണക്കെങ്കിൽ അതും സതീശന്റെ കരുത്ത് കൂട്ടും. പിണറായിക്കൊപ്പം സതീശനെയും മുഖ്യ എതിരാളിയാക്കിയുള്ള അൻവറിന്റെ  പ്രചാരണം സതീശന്റെ ഗ്രാഫ് ഉയർത്തുകയാണ് ചെയ്തത്. തോറ്റാൽ ഉത്തരവാദിത്തം തനിക്ക് എന്ന സതീശന്റെ പ്രസ്താവനയിൽ ജയത്തിന്റെ ഉത്തരവാദിത്തവും തനിക്കാണെന്ന സന്ദേശം ഒളിഞ്ഞിരിപ്പുണ്ടായിരുന്നു. 
ALSO READ: നാളെ മുതല്‍ വീണ്ടും മഴ; ന്യൂനമര്‍ദ്ദവും ഒപ്പം ചക്രവാതച്ചുഴിയും സജീവം; മുന്നറിയിപ്പ് 

 കെ.പി.സി.സി പ്രസിഡന്റ് സണ്ണി ജോസഫും വർക്കിങ് പ്രസിഡന്റുമാരായ എ.പി അനിൽകുമാറും ഷാഫി പറമ്പിലും പി.സി വിഷ്ണുനാഥും നിലമ്പൂരിൽ ക്യാംപ് ചെയ്താണ് തെരഞ്ഞെടുപ്പ് പ്രവർത്തനങ്ങൾക്ക് നേതൃത്വം നൽകിയത്. ഇവർക്കൊപ്പം രാഹുൽ മാങ്കൂട്ടത്തിൽ ഉൾപ്പെടെയുള്ള യുവനിരയും സജീവമായി രംഗത്തുണ്ടായിരുന്നു. വലിയ ഭൂരിപക്ഷത്തിലുള്ള വിജയം നേടുകയാണെങ്കിൽ ഇവരുടെ പ്രവർത്തനങ്ങൾക്കുള്ള അംഗീകാരം കൂടിയാവും അത്. യു.ഡി.എഫ് കൺവീനർ അടൂർ പ്രകാശിനും ആദ്യ ദൗത്യം വിജയിപ്പിക്കാനായെന്ന് ആശ്വാസം കൊള്ളാം. 

കോൺഗ്രസിന് പുറമെ മുസ്്ലിം ലീഗിനും വിജയത്തിന്റെ ക്രെഡിറ്റ് അവകാശപ്പെടാം. മണ്ഡലത്തിൽ ലീഗിന്റെ സംഘടനാ സംവിധാനം ഇത്ര അടുക്കുംചിട്ടയിലും ഇതിന് മുമ്പ് പ്രവർത്തിച്ചിട്ടില്ലെന്ന് നേതാക്കൾ സാക്ഷ്യപ്പെടുത്തുന്നു. പി.വി അൻവർ ഉയർത്തിവിട്ട അസ്വസ്ഥതകൾക്ക് പിന്നാലെ പോകാലെ തെരഞ്ഞെടുപ്പിനെ ഇടതുമുന്നണിയുമായി നേരിട്ടുള്ള ഏറ്റുമുട്ടലായി മാറ്റാൻ യു.ഡി.എഫിന് സാധിച്ചു. ജമാഅത്തെ ഇസ്്ലാമിയുടെ പിന്തുണയും രാഹുൽ മാങ്കൂട്ടത്തിൽ പാതിരാത്രി അൻവറിന്റെ വീട്ടിലെത്തിയും പ്രതിരോധത്തിലാക്കിയെങ്കിലും പ്രചാരണരംഗത്ത് മുന്നിലെത്താൻ യു.ഡി.എഫിന് കഴിഞ്ഞിരുന്നു. 

അതേസമയം, എം. സ്വരാജ് നേരിയ മാർജിനെങ്കിലും കടന്നുകൂടിയാൽ യു.ഡി.എഫിലും കോൺഗ്രസിലും ഉണ്ടാകുന്ന അസ്വസ്ഥതകൾ ചെറുതാവില്ല. സ്ഥാനാർഥി നിർണയത്തിന്റെ പൂർണ ഉത്തരവാദിത്വം സതീശൻ ഒറ്റയ്ക്ക് ഏറ്റെടുക്കേണ്ടിവരും. അടുത്ത ഭരണം കിട്ടിയാൽ സർക്കാരിനെ ആരു നയിക്കണമെന്നത് നിലമ്പൂർ ഫലം വന്നശേഷം കോൺഗ്രസിൽ സജീവ ചർച്ചയും തർക്കവിഷയവുമാകും.