കൊല്ലം: കൊട്ടിയത്ത് പുലർച്ചെ ഒഴിഞ്ഞ സ്ഥലത്ത് രണ്ട് കാറുകളിൽ സംശയാസ്പദമായി കണ്ടെത്തിയ ഏഴംഗ സംഘത്തെ പൊലീസ് പരിശോധനയിൽ എംഡിഎംഎയുമായി പിടികൂടി. യുവതി ഉൾപ്പെടെ തിരുവനന്തപുരം, കൊല്ലം സ്വദേശികളായ ഏഴുപേരിൽ നിന്ന് 2.3 ഗ്രാം എംഡിഎംഎ പിടിച്ചെടുത്തു.

പിടിയിലായവർ വർക്കല മേൽവെട്ടൂർ സ്വദേശി മാഹിൻ (28), കൊല്ലം ഉമയനല്ലൂർ സ്വദേശി ഷാനു (27), തിരുവനന്തപുരം പാലോട് കരിമൻകോട് സ്വദേശിനി അൻസിയ (35), വർക്കല വെട്ടൂർ സ്വദേശി തസ്ലീം (23), ചാത്തന്നൂർ സ്വദേശി സൂരജ് (27), വർക്കല വെട്ടൂർ സ്വദേശി താരിഖ് (20), കൊല്ലം പാരിപ്പള്ളി സ്വദേശി ഗോകുൽ ജി നാഥ് (32) എന്നിവരാണ്.

കൊട്ടിയം പൊലീസും ഡാൻസാഫ് (ഡിസ്ട്രിക്ട് ആന്റി-നാർക്കോട്ടിക് സ്പെഷ്യൽ ആക്ഷൻ ഫോഴ്സ്) ടീമും ചേർന്നാണ് പ്രതികളെ പിടികൂടിയത്. പുലർച്ചെ കൊട്ടിയത്ത് ഒഴിഞ്ഞ സ്ഥലത്ത് രണ്ട് കാറുകൾ നിർത്തിയിട്ടിരിക്കുന്നത് ശ്രദ്ധയിൽപ്പെട്ടതിനെ തുടർന്ന് നടത്തിയ പരിശോധനയിലാണ് ലഹരിമരുന്ന് കണ്ടെടുത്തത്. പ്രതികളിൽ ചിലർ മുമ്പും ലഹരി കേസുകളിൽ ഉൾപ്പെട്ടിട്ടുള്ളവരാണെന്ന് പൊലീസ് വ്യക്തമാക്കി.

നിലവിൽ പ്രതികൾക്കെതിരെ കേസെടുത്ത് അന്വേഷണം പുരോഗമിക്കുകയാണ്. ലഹരിമരുന്ന് വിതരണവുമായി ബന്ധപ്പെട്ട കൂടുതൽ വിവരങ്ങൾ ശേഖരിക്കാൻ പൊലീസ് ശ്രമിക്കുന്നു.

Kollam Kottiyam police and DANSAF arrested seven individuals, including a woman, with 2.3 grams of MDMA in an early morning raid. The group, comprising four from Thiruvananthapuram and three from Kollam, was apprehended after a suspicious check of two cars in an isolated area. Some suspects have prior drug-related cases. Investigation is ongoing.