മലപ്പുറം: മലപ്പുറത്ത് തിരച്ചിലിനിടെ വീണ്ടും കടുവയുടെ ആക്രമണം. കരുവാരക്കുണ്ടിൽ കടുവയ്ക്കായുള്ള തിരച്ചിലിനിടെയാണ് വീണ്ടും ആക്രമണമുണ്ടായത്. ആക്രമണത്തിൽ കാളയെ ചത്ത നിലയിൽ കണ്ടെത്തി. കഴിഞ്ഞ മാസം കാളികാവിൽ വനത്തോട് ചേർന്ന് റബ്ബർ ടാപ്പിംഗിനിടെ 55 വയസ്സുള്ള ഗഫൂർ അലി എന്നയാളെ കടുവ കടിച്ചു കൊന്നിരുന്നു.   ചോക്കാട് പഞ്ചായത്തിലെ കല്ലമൂല സ്വദേശിയായ ഗഫൂർ എസ്റ്റേറ്റിൽ ജോലി ചെയ്യവേയാണ് ആക്രമണമുണ്ടായത്. “ഗഫൂറിന്റെ കഴുത്തിൽ കടിച്ച കടുവ കാട്ടിലേക്ക് വലിച്ചിഴച്ചു കൊണ്ടു പോവുകയായിരുന്നുവെന്ന് സഹ പ്രവർത്തകൻ വ്യക്തമാക്കിയിരുന്നു.

നാട്ടുകാരും പൊലീസും ഒന്നര മണിക്കൂർ തിരച്ചിൽ നടത്തിയ ശേഷം വനമേഖലയിൽ, സംഭവസ്ഥലത്ത് നിന്ന് അഞ്ച് കിലോമീറ്റർ അകലെയാണ് അന്ന് ​ഗഫൂറിന്റെ മൃതദേഹം കണ്ടെത്തിയത്. ഗതാഗത സൗകര്യമില്ലാത്തതിനാൽ പൊലീസിന് കാൽനടയായി സ്ഥലത്തെത്തേണ്ടി വന്നു. സംഭവം നടന്നയുടനെ പ്രദേശവാസികൾ തടിച്ചുകൂടുകയും വനംവകുപ്പിന്റെ അനാസ്ഥയിൽ പ്രതിഷേധിച്ച് അന്ന് മൃതദേഹം നീക്കം ചെയ്യാൻ അനുവദിച്ചിരുന്നുമില്ല. പിന്നെ വനം വകുപ്പും നാട്ടുകാരും ചേർന്ന് നടന്ന ചർച്ചയിലൂടെയാണ് മൃതദേഹം നീക്കം ചെയ്യാൻ ധാരണയായത്.

കേരള എസ്റ്റേറ്റിന് മൂന്ന് കിലോമീറ്റർ അകലെ കടുവയുടെ പുതിയ പാടുകൾ കണ്ടെത്തിയതോടെ, മൃഗം കൂടുതൽ ഉൾവനത്തിലേക്ക് നീങ്ങിയതായി വനംവകുപ്പ് സംശയിക്കുന്നു. “ക്യാമറ ട്രാപ്പുകൾ സ്ഥാപിച്ചിരുന്ന സ്ഥലത്ത് നിന്ന് കടുവ മാറിയിട്ടുണ്ട്. പുതിയ തെളിവുകളുടെ അടിസ്ഥാനത്തിൽ ക്യാമറകൾ മാറ്റിസ്ഥാപിക്കുകയാണ്,” കാളികാവ് ഫോറസ്റ്റ് റേഞ്ച് ഓഫീസർ പി. രാജീവ് പറഞ്ഞു.

വനംവകുപ്പ് 80 ക്യാമറ ട്രാപ്പുകളും തെർമൽ ഡ്രോണുകളും ഉപയോഗിക്കുന്നുണ്ട്. റാവുത്തർ കുന്നിലും സുൽത്താന എസ്റ്റേറ്റിലും മൂന്ന് കെണി കൂടുകൾ സ്ഥാപിച്ചിട്ടുണ്ട്. ഡോ. അരുൺ സക്കറിയയുടെ നേതൃത്വത്തിൽ 60-ലധികം അംഗങ്ങളുള്ള സംഘവും, പരിശീലനം ലഭിച്ച കുഞ്ചു, സുരേന്ദ്രൻ എന്നീ കുങ്കി ആനകളും തിരച്ചിലിൽ പങ്കെടുക്കുന്നു. എന്നിട്ടും, കുത്തനെയുള്ള ഭൂപ്രകൃതിയും കടുവയുടെ ചലനവും പിടികൂടൽ ദുഷ്കരമാക്കുന്നുവെന്ന് അധികൃതർ പറയുന്നു.

കടുവയെ പിടികൂടാൻ വൈകിയതിൽ നാട്ടുകാർ കടുത്ത പ്രതിഷേധവുമായി രംഗത്തെത്തിയിരുന്നു. കടുവയുടെ സാന്നിധ്യം പലതവണ വനംവകുപ്പിനെ അറിയിച്ചിരുന്നു. എന്നാൽ, ഫലപ്രദമായ നടപടിയുണ്ടായില്ല,” നാട്ടുകാർ ആരോപിച്ചു. നിലമ്പൂർ സൗത്ത് ഡിഎഫ്ഒയെ അറസ്റ്റ് ചെയ്യണമെന്നും അവർ ആവശ്യപ്പെട്ടു. കാളികാവ് പൊലീസ് സ്റ്റേഷനിൽ കേസ് രജിസ്റ്റർ ചെയ്ത് അന്വേഷണം ആരംഭിച്ചു. കടുവയുടെ ആക്രമണത്തിൽ കൊല്ലപ്പെട്ട ഗഫൂറിന്റെ മരണം പ്രദേശവാസികളെ ദുഃഖത്തിലാഴ്ത്തി. വന്യമൃഗ ആക്രമണങ്ങൾ തടയാൻ കൂടുതൽ ജാഗ്രത വേണമെന്ന് നാട്ടുകാർ ആവശ്യപ്പെട്ടിരുന്നു.