ന്യൂയോർക്ക്: കാറുകളും ബൈക്കുകളും ഇലക്ട്രിക് യുഗത്തിലേക്ക് കുതിക്കുമ്പോൾ, വിമാനങ്ങൾ എന്തുകൊണ്ട് പിന്നാലെ പോകുന്നില്ല ? ഈ ചോദ്യത്തിന് ഉത്തരമായി, ബീറ്റ ടെക്നോളജീസിന്റെ ആലിയ സിഎക്സ് 300, യാത്രക്കാരുമായി ആദ്യത്തെ പൂർണ വൈദ്യുത വിമാനമായി ചരിത്രം കുറിച്ചു. ഈസ്റ്റ് ഹാംപ്ടണിൽ നിന്ന് ന്യൂയോർക്കിലെ ജെഎഫ്‌കെ വിമാനത്താവളത്തിലേക്ക് 130 കിലോമീറ്റർ ദൂരം, വെറും ₹694 ($8) ചെലവിൽ 30 മിനിറ്റിനുള്ളിൽ പറന്നെത്തിയ ഈ വിമാനം, സുസ്ഥിര വ്യോമയാനത്തിന്റെ പുതിയ വാതിലുകൾ തുറക്കുന്നു.

നാല് യാത്രക്കാരുമായി നടത്തിയ ഈ യാത്ര, ന്യൂയോർക്ക് പോർട്ട് അതോറിറ്റിക്കും ഇലക്ട്രിക് വ്യോമയാന മേഖലയ്ക്കും നാഴികക്കല്ലാണ്. പരമ്പരാഗത ഹെലികോപ്റ്റർ യാത്രയ്ക്ക് ഇന്ധനച്ചെലവ് മാത്രം ₹13,000 ($160)-ന് മുകളിലാണെങ്കിൽ, ഈ വൈദ്യുത വിമാനത്തിന്റെ പ്രവർത്തനച്ചെലവ് അതിന്റെ ഒരു ചെറിയ ഒരു ശതമാനം മാത്രമാണ്. ഹ്രസ്വദൂര ബിസിനസ് യാത്രകൾക്കും പ്രാദേശിക യാത്രകൾക്കും ഇത് ഒരു വിപ്ലവകരമായ മാറ്റമാണ്. പൂജ്യം കാർബൺ പുറന്തള്ളലോടെ, പരിസ്ഥിതി സൗഹൃദ വ്യോമയാനത്തിന് CX300 വഴിയൊരുക്കുന്നു.വിലകുറഞ്ഞ യാത്രയ്‌ക്കൊപ്പം, ശബ്ദ മലിനീകരണം എന്ന മറ്റൊരു നേട്ടവും ഈ വിമാനം വാഗ്ദാനം ചെയ്യുന്നു. ശബ്ദമുണ്ടാക്കുന്ന എഞ്ചിനുകളോ ഇന്ധന ജ്വലനമോ ഇല്ലാത്തതിനാൽ, യാത്രക്കാർക്ക് സുഖകരമായി പരസ്പര ആശയ വിനിമയം നടത്താനും കഴിഞ്ഞു. ചാർജ് ചെയ്ത് പറക്കാൻ ഞങ്ങൾക്ക് $8 മാത്രമാണ് ചെലവായത്," ബീറ്റ ടെക്നോളജീസിന്റെ സ്ഥാപകനും സിഇഒയുമായ കൈൽ ക്ലാർക്ക് പറഞ്ഞു. 

ബീറ്റ ടെക്നോളജീസിന്റെ ദൗത്യം

വെർമോണ്ട് ആസ്ഥാനമായ ബീറ്റ ടെക്നോളജീസ് 2017 മുതൽ വൈദ്യുത വ്യോമയാന സാങ്കേതികവിദ്യയിൽ മുന്നേറുകയാണ്. അടുത്തിടെ 318 മില്യൺ ഡോളർ ധനസഹായം സമാഹരിച്ച കമ്പനി, വിമാനനിർമ്മാണവും എഫ്എഎ സർട്ടിഫിക്കേഷനും വാണിജ്യ വിപണനവും ത്വരിതപ്പെടുത്താനുള്ള ശ്രമത്തിലാണ്. CX300-ന് ഈ വർഷാവസാനം എഫ്എഎ അംഗീകാരം ലഭിക്കുമെന്നാണ് പ്രതീക്ഷ. ഒറ്റ ചാർജിൽ 463 കിലോമീറ്റർ (250 നോട്ടിക്കൽ മൈൽ) വരെ പറക്കാൻ ശേഷിയുള്ള ഈ വിമാനം, ഇന്റർ-സിറ്റി, ഇൻട്രാ-സിറ്റി റൂട്ടുകൾക്ക് ശക്തമായ ഒരു ബദലാണ്.

ഇലക്ട്രിക് എയർ ടാക്സി യുഗത്തിന്റെ തുടക്കം?

CX300-ന് പുറമേ, നഗര ഗതാഗതത്തിനായി ലംബ ടേക്ക് ഓഫ്-ലാൻഡിംഗ് (eVTOL) സാങ്കേതികവിദ്യയുള്ള ആലിയ 250 എന്ന വിമാനവും ബീറ്റ വികസിപ്പിക്കുന്നുണ്ട്. ഇലക്ട്രിക് വ്യോമയാന മേഖലയിൽ മത്സരം ശക്തമാകുമ്പോൾ, ആർച്ചർ ഏവിയേഷൻ പോലുള്ള കമ്പനികളും 2026-ഓടെ വാണിജ്യ സേവനങ്ങൾ ആരംഭിക്കാനുള്ള പദ്ധതിയിലാണ്. 2028-ലെ ലോസ് ഏഞ്ചൽസ് ഒളിമ്പിക്‌സിന്റെ ഔദ്യോഗിക എയർ ടാക്സി പങ്കാളിയായി ആർച്ചർ തിരഞ്ഞെടുക്കപ്പെട്ടിട്ടുണ്ട്.

ഭാവിയിലേക്കുള്ള വഴി

നഗരങ്ങളിലെ ഗതാഗതക്കുരുക്കിന് ബദലായി, വൃത്തിയുള്ളതും വേഗതയേറിയതുമായ യാത്രകൾ വാഗ്ദാനം ചെയ്യുന്ന വൈദ്യുത വിമാനങ്ങൾ ഉയർന്നുവരുകയാണ്. കുറഞ്ഞ പ്രവർത്തനച്ചെലവ്, ശബ്ദരഹിത യാത്ര, പൂജ്യം പുറന്തള്ളൽ എന്നിവയോടെ, റോഡ് ഗതാഗതത്തെ വൈദ്യുത വാഹനങ്ങൾ മാറ്റിമറിച്ചതുപോലെ, വ്യോമയാന മേഖലയിലും വിപ്ലവം സൃഷ്ടിക്കാൻ ഈ സാങ്കേതികവിദ്യയ്ക്ക് കഴിയും. ബീറ്റ ടെക്നോളജീസിന്റെ ഈ നേട്ടം, സുസ്ഥിര ഭാവിയിലേക്കുള്ള ഒരു വലിയ ചുവടുവയ്പാണ്.

Beta Technologies' Alia CX300, the first fully electric passenger plane, made history by flying 130 km from East Hampton to JFK Airport in just 30 minutes for only ₹694 ($8). This eco-friendly flight marks a new era in sustainable aviation with low costs and near-silent travel.