കൊച്ചി: ഹേമ കമ്മിറ്റി റിപ്പോർട്ടുമായി ബന്ധപ്പെട്ടുള്ള എല്ലാ കേസുകളിലെയും അന്വേഷണം അവസാനിപ്പിച്ച് അന്വേഷണ സംഘം. 34 കേസുകളിലെയും അന്വേഷണം അവസാനിപ്പിച്ചുവെന്ന് സർക്കാർ ഹൈക്കോടതിയെ അറിയിച്ചു. ഹേമ കമ്മിറ്റിക്ക് മുന്നിൽ മൊഴി നൽകിയവർ പിന്നീട് അന്വേഷണവുമായി സഹകരിച്ചില്ല. ഈ മൊഴികളുമായി ബന്ധപ്പെട്ട് ആരെയും നിർബന്ധിക്കേണ്ടെന്ന് ഹൈക്കോടതി അറിയിക്കുകയും ചെയ്തിരുന്നു. ഈ സാഹചര്യത്തിലാണ് എല്ലാ കേസുകളിലെയും അന്വേഷണം അവസാനിപ്പിച്ചത്. അന്വേഷണ സംഘത്തിനു മുന്നിൽ മൊഴി നൽകാൻ സാധ്യമായ എല്ലാ സഹായവും സർക്കാർ നൽകിയിരുന്നു. 

ഹേമ കമ്മിറ്റി റിപ്പോർട്ടിന്റെ അടിസ്ഥാനത്തിൽ സിനിമാ മേഖലയുമായി ബന്ധപ്പെട്ട് നടപ്പിലാക്കാൻ പോകുന്ന നയത്തിന്റെ കരട് രൂപരേഖ ഒക്ടോബറിനുള്ളിൽ തയ്യാറാക്കുമെന്ന് സർക്കാർ ഹൈക്കോടതിയിൽ അറിയിച്ചു. തൊഴിൽ സ്ഥലങ്ങളിൽ സ്ത്രീകളുടെ സുരക്ഷ ഉറപ്പാക്കുന്നതിന് വേണ്ടിയുള്ള പോഷ് ആക്ടിന് സമാനമായ പ്രത്യേക നിയമമാണ് സിനിമ മേഖലയ്ക്കായി നടപ്പിലാക്കാൻ ഉദ്ദേശിക്കുന്നതെന്നും സർക്കാർ അറിയിച്ചു.

നീണ്ട നാളത്തെ പരിശ്രമങ്ങൾക്കൊടുവിലാണ് ഹേമ കമ്മിറ്റി റിപ്പോർട്ടിന്റെ ഭാഗങ്ങൾ പുറത്തുവന്നത്. തൊഴിലിടങ്ങളിൽ നേരിട്ട മോശം അനുഭവങ്ങളും സിനിമയിൽ അവസരം ലഭിക്കാനായി നേരിടേണ്ടി വന്ന ദുരിതാനുഭവങ്ങളും വിവരിക്കുന്നതായിരുന്നു ഹേമ കമ്മിറ്റിയിലെ മൊഴികൾ. മണിയൻപിള്ള രാജു, രഞ്ജിത്ത്, മുകേഷ്, ജയസൂര്യ, സിദ്ദിഖ് എന്നിവർക്കെതിരെയുള്ള കേസുകളിൽ ആയിരുന്നു കുറ്റപത്രം നൽകിയിരുന്നത്. എന്നാൽ പലരും കോടതിയിൽ മൊഴി നൽകാൻ വിമൂഖത കാണിക്കുകയായിരുന്നു. 

കമ്മിറ്റിയിൽ നൽകിയ മൊഴിയുടെ അടിസ്ഥാനത്തിലാണ് കോടതിയുടെ നിർദ്ദേശപ്രകാരം 34 കേസുകൾ പൊലിസ് രജിസ്റ്റർ ചെയ്തത്. മൊഴി നൽകിയ ആളുകൾക്ക് കേസുമായി മുന്നോട്ടു പോകാൻ താല്പര്യം ഇല്ല എന്നായിരുന്നു മറുപടി ലഭിച്ചിരുന്നത്. കോടതി വഴി നൽകിയ ആളുകൾക്ക് നോട്ടീസ് അയച്ചിരുന്നു. എന്നാൽ കേസുമായി മുന്നോട്ടു പോകാൻ താല്പര്യമില്ലെന്ന് ആയിരുന്നു സിനിമ പ്രവർത്തകരായ സ്ത്രീകൾ മൊഴി നൽകിയത്.

Hema Committee report Investigation team concludes investigation in all 34 cases