മാഞ്ചസ്റ്റർ യുണൈറ്റഡിൽ കളിക്കുന്ന കാലങ്ങളിൽ കളിക്കളത്തിൽ മികച്ച കൂട്ടുകെട്ടുകൾ സൃഷ്ടിച്ചത് ഏത് താരത്തിനോടൊപ്പമാണെന്ന് തുറന്നു പറഞ്ഞിരിക്കുകയാണ് ഇംഗ്ലീഷ് ഇതിഹാസം വെയ്ൻ റൂണി. മുൻ അർജന്റീന താരം കാർലോസ് ടെവസിനെയാണ് റൂണി കളത്തിലെ ഏറ്റവും മികച്ച പങ്കാളിയായി തെരഞ്ഞെടുത്തത്. ബിബിസി സ്പോർട്സ് നൽകിയ അഭിമുഖത്തിലാണ് റൂണി ഇക്കാര്യം പറഞ്ഞത്.

"അദ്ദേഹത്തെ ടീമിൽ എത്തിച്ചപ്പോൾ എനിക്ക് വളരെ ആവേശമായിരുന്നു. കളിക്കളത്തിൽ ഞങ്ങൾ കളിച്ച രീതികൾ ഒരുപോലെയായിരുന്നു. ഞങ്ങൾ രണ്ടു പേരും വളരെ നന്നായി കഠിനാധ്വാനം ചെയ്തു. രണ്ടു പേർക്കും ഒമ്പതാം നമ്പറിലും ഫോർവേഡിലും കളിക്കാൻ സാധിച്ചു. കളിക്കളത്തിൽ ഞങ്ങൾ തമ്മിൽ മികച്ച ഒരു കെമിസ്ട്രി ഉണ്ടായിരുന്നു. ഞാൻ കളിക്കുന്ന ടീമിൽ എപ്പോഴും ഉണ്ടായിരിക്കണം എന്ന് ആഗ്രഹിക്കുന്ന ഒരു കളിക്കാരനാണ് അദ്ദേഹം. ഞങ്ങൾക്കു വേണ്ടി മികച്ച ഗോളുകൾ അദ്ദേഹം നേടി. ഇവിടെ കളിച്ച രണ്ടു വർഷങ്ങളിൽ രണ്ട് ലീഗ് കിരീടങ്ങൾ, ചാമ്പ്യൻസ് ലീഗ് എന്നിവയും അദ്ദേഹം സ്വന്തമാക്കി. ഇതെല്ലാം നേടാൻ അദ്ദേഹം വലിയൊരു പങ്കു വഹിച്ചു. അതുകൊണ്ടുതന്നെ കളിക്കളത്തിലെ എന്റെ പ്രിയപ്പെട്ട പങ്കാളി കാർലോസ് ആണെന്ന് ഞാൻ കരുതുന്നു. ഞങ്ങൾക്കെതിരെ കളിക്കുന്ന ഡിഫൻഡർമാർ ഞങ്ങളെ ഇഷ്ടപ്പെട്ടിട്ടില്ല. അത് കൃത്യമായി ഞങ്ങൾ മനസ്സിലാക്കുമായിരുന്നു" വെയ്ൻ റൂണി പറഞ്ഞു.

മാഞ്ചസ്റ്റർ യുണൈറ്റഡിനൊപ്പം 61 മത്സരങ്ങളിൽ ആണ് ടെവസും റൂണിയും ഒരുമിച്ച് കളിച്ചത്. ഇതിൽ പത്ത് ഗോളുകളും ഇരുവരും സ്വന്തമാക്കി. അതേസമയം പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോക്ക് ഒപ്പവും ഓൾഡ് ട്രാഫോഡിൽ അവിസ്മരണീയമായ ഒരു കൂട്ടുകെട്ട് സൃഷ്ടിച്ചെടുക്കാൻ റൂണിക്ക് സാധിച്ചിട്ടുണ്ട്. റൊണാൾഡോയും റൂണിയും 25 മത്സരങ്ങളിലാണ് മാഞ്ചസ്റ്റർ യുണൈറ്റഡിനു വേണ്ടി ഒരുമിച്ച് കളിക്കളത്തിൽ ബൂട്ട് കെട്ടിയത്. ഇതിൽ 26 ഗോളുകളും പിറവിയെടുത്തു. റൊണാൾഡോക്കൊപ്പം മികച്ച കൂട്ടുകെട്ട് സൃഷ്ടിച്ചിട്ടും റൂണി മുൻ അർജന്റീന താരത്തെ തെരഞ്ഞെടുത്തത് ഏറെ ശ്രദ്ധേയമായിരിക്കുകയാണ്.

English legend Wayne Rooney has revealed which player he formed the best partnerships with on the pitch during his time playing for Manchester United