ദുബൈ: ദുബൈയില്‍ അനധികൃത പാര്‍ട്ടീഷന്‍ മുറികള്‍ക്കെതിരെ അധികൃതര്‍ കര്‍ശന നടപടികള്‍ സ്വീകരിച്ചതോടെ, നിരവധി താമസക്കാര്‍ താമസസ്ഥലം നഷ്ടപ്പെട്ട് ഷാര്‍ജ, അജ്മാന്‍ തുടങ്ങിയ അയല്‍ എമിറേറ്റുകളിലേക്ക് മാറുകയാണ്. ഇവിടെ കുറഞ്ഞ വാടകയില്‍ മുറികള്‍ ലഭ്യമാണെങ്കിലും ദീര്‍ഘദൂര യാത്രയും പൊതുഗതാഗതത്തിന്റെ അസൗകര്യവും ഇവരുടെ ദൈനംദിന ജീവിതത്തെ ദുഷ്‌കരമാക്കുന്നു.

ALSO READ: മേഖലയില്‍ സ്ഥിരതയും സമാധാനവും ഉറപ്പാക്കും; യുഎഇയുടെ ഷെയ്ഖ് മുഹമ്മദ് ഇറാന്‍ പ്രസിഡന്റിനെയും ഖത്തര്‍ അമീറിനെയും വിളിച്ചു

ജെഎല്‍ടിയിലെ റസ്റ്റോറന്റ് ജീവനക്കാരനായ മുഹമ്മദ് ഇര്‍ഫാന്‍, മുമ്പ് അല്‍ റിഗ്ഗയില്‍ 1,400 ദിര്‍ഹത്തിന് പാര്‍ട്ടീഷന്‍ മുറിയിലാണ് താമസിച്ചിരുന്നത്. റെയ്ഡിനെ തുടര്‍ന്ന് ഷാര്‍ജയിലെ അബു ഷഗാരയിലേക്ക് മാറി. ഇപ്പോള്‍ 700 ദിര്‍ഹത്തിന് മൂന്ന് പേര്‍ക്കൊപ്പം മുറി പങ്കിടുന്നു. 

'ഇപ്പോള്‍ പണം ലാഭിക്കുന്നുണ്ട്, പക്ഷേ ജോലിസ്ഥലത്തേക്ക് 90 മിനിറ്റിലധികം യാത്ര ചെയ്യണം,' അദ്ദേഹം പറഞ്ഞു.

ദെയ്‌റയിലെ സെയില്‍സ് ജീവനക്കാരിയായ മേരി മുറാഖബത്തില്‍ 13 പേര്‍ക്കൊപ്പം 800 ദിര്‍ഹത്തിനാണ് താമസിച്ചിരുന്നത്. ഇപ്പോള്‍ അല്‍ നഹ്ദയില്‍ 1,000 ദിര്‍ഹത്തിന് മറ്റു ചിലരുമായി മുറി പങ്കിടുന്നു. 

'വാടകയും യാത്രാസമയവും വര്‍ധിച്ചു,' അവര്‍ പറഞ്ഞു. സലൂണ്‍ ജീവനക്കാരിയായ രൂപ 600 ദിര്‍ഹത്തിന് താമസിച്ചിരുന്ന സ്ഥലം നഷ്ടമായതോടെ ഷാര്‍ജയില്‍ 850 ദിര്‍ഹത്തിന് പുതിയ മുറി തേടുകയാണ്.

ദുബൈയില്‍ 1,500 ദിര്‍ഹത്തിന് താമസിച്ചിരുന്ന ഫരീദ അവിടെ നിന്ന് ഷാര്‍ജയിലേക്ക് മാറി. ഇപ്പോള്‍ 1,200 ദിര്‍ഹമാണ് ഇവര്‍ വാടക നല്‍കുന്നത്. 

'മകളുടെ സ്‌കൂള്‍ വളരെ ദൂരെയാണ്, പുതിയൊരിടത്തേക്ക് താമസം മാറുന്നതിനെക്കുറിച്ച് ആലോചിക്കേണ്ടി വരും,' അവര്‍ പറഞ്ഞു. ഡെലിവറി റൈഡറായ ഷാഹിദ്, ഷാര്‍ജയില്‍ 450 ദിര്‍ഹത്തിന് റൂമാക്കി മാറ്റിയ ഒരു സ്റ്റോര്‍ റൂമിലാണ് താമസിക്കുന്നത്. ഇങ്ങനെ താമസിക്കുന്നവര്‍ വായുസഞ്ചാരമില്ലാത്ത അവസ്ഥയില്‍ ബുദ്ധിമുട്ടുന്നു.

ALSO READ: വന്‍ വിസാ തട്ടിപ്പ്: ദുബൈ കോടതി 21 പേരെ ശിക്ഷിച്ചു; പിഴയിട്ടത് 25.21 മില്യണ്‍ ദിര്‍ഹം

'നിയമപരമായ, എന്നാല്‍ താങ്ങാനാകുന്ന വിലയില്‍ ലഭ്യമാകുന്ന താമസസൗകര്യങ്ങള്‍ ഞങ്ങള്‍ക്ക് ആവശ്യമാണ്,' ഷാര്‍ജയിലേക്ക് മാറിയ സെയില്‍സ്മാന്‍ ജാവേദ് പറഞ്ഞു. അധികൃതരുടെ നടപടികള്‍ തുടരുന്നതിനാല്‍ താമസക്കാര്‍ക്ക് കുറഞ്ഞ ചെലവില്‍ സുരക്ഷിതമായ താമസസ്ഥലങ്ങള്‍ കണ്ടെത്തുക എന്നത് വെല്ലുവിളിയായി തുടരുകയാണ്.

Authorities intensify action against illegal partitioned accommodations in Dubai, prompting many residents to move to more affordable emirates like Sharjah and Ajman.