ദുബൈ/റിയാദ്: ഒമാന്‍ ഒഴികെയുള്ള ജിസിസി രാജ്യങ്ങളില്‍ ഇന്ന് മുഹറം ഒന്ന്. ഇതോടെ ഈ രാജ്യങ്ങളില്‍ ഇസ്‌ലാമിക പുതുവര്‍ഷത്തിന് തുടക്കമായി. സഊദി അറേബ്യയില്‍ മാസപ്പിറവി ദൃശ്യമായതിനെ തുടര്‍ന്ന്, മുഹറം 1447 ജൂണ്‍ 25ന് മഗ്‌രിബ് നമസ്‌കാരത്തോടെ തന്നെ ആരംഭിച്ചതായി പ്രഖ്യാപിച്ചിരുന്നു. യുഎഇ, കുവൈത്ത്, ബഹ്‌റൈന്‍, സഊദി അറേബ്യ എന്നിവിടങ്ങളില്‍ ജൂണ്‍ 27, വെള്ളിയാഴ്ച പൊതുഅവധിയായി പ്രഖ്യാപിച്ചിരുന്നു. യുഎഇയില്‍ ഫെഡറല്‍ അതോറിറ്റി ഫോര്‍ ഗവണ്‍മെന്റ് ഹ്യൂമന്‍ റിസോഴ്‌സസും മിനിസ്ട്രി ഓഫ് ഹ്യൂമന്‍ റിസോഴ്‌സസ് ആന്റ് എമിറേറ്റൈസേഷനും അവധി പ്രഖ്യാപിച്ചിരുന്നു.

യുഎഇയില്‍, ദുബൈയില്‍ പുതുവര്‍ഷ ദിനത്തില്‍ പൊതു പാര്‍ക്കിംഗ് സൗജന്യമായിരിക്കുമെന്ന് ദുബൈ ആര്‍ടിഎ അറിയിച്ചിരുന്നു.

എഡി 622ല്‍ പ്രവാചകന്‍ മുഹമ്മദ് നബി മക്കയില്‍ നിന്ന് മദീനയിലേക്ക് നടത്തിയ ഹിജ്‌റ, അഥവാ കുടിയേറ്റം, മുസ്‌ലിം സമൂഹത്തിന്റെ മതപരവും സാമൂഹികവും രാഷ്ട്രീയവുമായ ഏകീകരണത്തിന് അടിത്തറയിട്ടു. ഈ ചരിത്ര സംഭവത്തോടെയാണ് ഹിജ്‌റ കലണ്ടര്‍ ആരംഭിക്കുന്നത്.

ഇസ്‌ലാമില്‍ യുദ്ധം നിരോധിക്കപ്പെട്ട നാല് പുണ്യ മാസങ്ങളില്‍ ഒന്നാണ് മുഹറം. ഈ ദിനം ഉത്സവപരിവേഷത്തേക്കാള്‍ ഗൗരവപൂര്‍ണമാണ്. യുഎഇ, മൊറോക്കോ, സിറിയ ഉള്‍പ്പെടെ 20ലധികം രാജ്യങ്ങള്‍ ഹിജ്‌റ പുതുവര്‍ഷ ദിനം ദേശീയ അവധിയായി ആചരിക്കുന്നു.

The Islamic New Year begins today with 1st Muharram 1447 AH observed in Gulf countries including Saudi Arabia, UAE, Qatar, Kuwait, and Bahrain. Oman will mark Muharram 1 tomorrow due to delayed moon sighting.