സുൽത്താൻ ബത്തേരി: വയനാട്- തമിഴ്നാട് വനമേഖലയിലെ ചേരമ്പാടിയിൽ മൃതദേഹം കുഴിച്ചിട്ട നിലയിൽ കണ്ടെത്തി. ഒന്നരവർഷം മുമ്പായി കാണാതായ ആളുടെ മൃതദേഹത്തിന്റെ ഭാഗങ്ങളാണ് കണ്ടെത്തിയതെന്നാണ് സംശയം. കാണാതായ ഹേമചന്ദ്രൻ എന്ന ആളുടെ  മൃതദേഹ ഭാഗങ്ങളാണ് ഇതെന്നാണ് നിലനിൽക്കുന്ന സംശയം. കേരള, തമിഴ്നാട് പൊലിസിന്റെ നേതൃത്വത്തിൽ മൃതദേഹം  പുറത്തെടുക്കാനുള്ള നടപടികൾ തുടങ്ങിയിട്ടുണ്ട്. 

 

വയനാട് സുൽത്താൻബത്തേരിയിൽ സ്വദേശിയായ ഹേമ ചന്ദ്രനെ  കഴിഞ്ഞ വർഷം മാർച്ച് 20നാണ് കാണാതാകുന്നത്. ഇതിന് പിന്നാലെ ഹേമചന്ദ്രന്റെ ഭാര്യയായ സുബിഷ കഴിഞ്ഞ വർഷം ഏപ്രിൽ ഒന്നിന്  കോഴിക്കോട് മെഡിക്കൽ കോളേജ് പൊലിസിൽ പരാതി നൽകിയിരുന്നു. ഈ കേസുമായി ബന്ധപ്പെട്ട് നിലവിൽ ജ്യോതിഷ്, അജേഷ് എന്നീ ആളുകളെ പൊലിസ് കസ്റ്റഡിയിലെടുത്തിട്ടുണ്ട്. മൃതദേഹം മറവ് ചെയ്യാനായി സഹായിച്ച രണ്ട് പേരാണ് അറസ്റ്റിലായത് എന്നാണ് സൂചന.

 

സംഭവത്തിൽ പ്രധാന പ്രതിയെന്ന സംശയിക്കപ്പെടുന്ന നൗഷാദ് വിദേശത്തേക്ക് കടന്നുവന്നാണ് പൊലിസ് പറഞ്ഞത്. ഹേമചന്ദ്രന്റെ ഭാര്യയുടെ പരാതിയെ തുടർന്ന് ഹേമ ചന്ദ്രന്റെ കോൾ റെക്കോർഡും സംഭവവുമായി ബന്ധപ്പെട്ടവരായി കരുതപ്പെടുന്ന ആളുകളുടെ ടവർ ലൊക്കേഷനുകൾ കേന്ദ്രീകരിച്ച് പൊലിസ് നടത്തിയ അന്വേഷണത്തിലാണ് വനത്തിൽ മൃതദേഹം ഭാഗം കണ്ടെത്തിയത്. ഈ മൃതദേഹ ഭാഗങ്ങൾ ഹേമ ചന്ദ്രന്റേതാണെന്ന് സ്ഥിരീകരിക്കാനായി ഡിഎൻഎ പരിശോധന നടത്തുമെന്നും പൊലിസ് വ്യക്തമാക്കി.