ഇസ്ലാമാബാദ്: പാകിസ്താനിലെ ഖൈബർ പഷ്തൂൺഖ്വ പ്രവിശ്യയിൽ വടക്കൻ വസീറിസ്ഥാൻ ജില്ലയിൽ നടന്ന ചാവേർ ആക്രമണത്തിൽ 16 പാകിസ്ഥാൻ സൈനികർ കൊല്ലപ്പെടുകയും 24ലധികം പേർക്ക് പരുക്കേൽക്കുകയും ചെയ്തതായി പ്രാദേശിക സർക്കാർ ഉദ്യോഗസ്ഥരും പൊലീസും എഎഫ്‌പി വാർത്താ ഏജൻസിയോട് വെളിപ്പെടുത്തി. പാകിസ്താൻ താലിബാന്റെ ഹാഫിസ് ഗുൽ ബഹാദൂർ വിഭാഗം ആക്രമണത്തിന്റെ ഉത്തരവാദിത്തം ഏറ്റെടുത്തു.

സ്ഫോടക വസ്തുക്കൾ നിറച്ച വാഹനം ഒരു ചാവേർ ബോംബർ സൈനിക വാഹനവ്യൂഹത്തിലേക്ക് ഇടിച്ചുകയറ്റിയാണ് ആക്രമണം നടത്തിയതെന്ന് ഒരു പ്രാദേശിക സർക്കാർ ഉദ്യോഗസ്ഥൻ വ്യക്തമാക്കി. മാധ്യമങ്ങളോട് സംസാരിക്കാൻ അധികാരമില്ലാത്തതിനാൽ പേര് വെളിപ്പെടുത്താൻ അദ്ദേഹം വിസമ്മതിച്ചു. ആക്രമണത്തിൽ 16 സൈനികർ കൊല്ലപ്പെട്ടതായി അദ്ദേഹം സ്ഥിരീകരിച്ചു, മുമ്പ് 13 പേർ മരിച്ചതായി റിപ്പോർട്ട് ചെയ്തിരുന്നു. സ്ഫോടനത്തിന്റെ ആഘാതത്തിൽ സമീപത്തെ രണ്ട് വീടുകളുടെ മേൽക്കൂരകൾ തകർന്നു, ആറ് കുട്ടികൾ ഉൾപ്പെടെ നിരവധി പ്രദേശ വാസികൾക്ക് പരുക്കേറ്റതായി ജില്ലയിലെ പൊലീസ് ഉദ്യോഗസ്ഥൻ എഎഫ്‌പിയോട് പറഞ്ഞു.

2021-ൽ അഫ്ഗാനിസ്ഥാനിൽ താലിബാൻ അധികാരത്തിൽ തിരിച്ചെത്തിയതിനുശേഷം, അതിർത്തി പങ്കിടുന്ന ഖൈബർ പഷ്തൂൺഖ്വയിലും ബലൂചിസ്ഥാനിലും അക്രമസംഭവങ്ങൾ വർധിച്ചതായി റിപ്പോർട്ടുകൾ സൂചിപ്പിക്കുന്നു. പാകിസ്ഥാനെതിരായ ആക്രമണങ്ങൾക്ക് അഫ്ഗാൻ മണ്ണ് ഉപയോഗിക്കുന്നതായി ഇസ്ലാമാബാദ് ആരോപിച്ചെങ്കിലും, താലിബാൻ ഈ ആരോപണം നിഷേധിച്ചിട്ടുണ്ട്. ഈ വർഷം ഇതുവരെ ഖൈബർ പഷ്തൂൺഖ്വയിലും ബലൂചിസ്ഥാനിലും നടന്ന ആക്രമണങ്ങളിൽ ഏകദേശം 290 പേർ കൊല്ലപ്പെട്ടിട്ടുണ്ടെന്ന് എഎഫ്‌പി കണക്കുകൾ വ്യക്തമാക്കുന്നു. ഇതിൽ ഭൂരിഭാഗവും സുരക്ഷാ ഉദ്യോഗസ്ഥരാണ്.

In a suicide attack in Pakistan's North Waziristan, Khyber Pakhtunkhwa, a vehicle laden with explosives rammed into a military convoy, killing 16 soldiers and injuring over 24 people, including civilians. The attack, claimed by the Hafiz Gul Bahadur faction of the Pakistani Taliban, also damaged nearby houses, with six children among the wounded, according to local officials and police.