അബൂദബി: ഭക്ഷണവുമായി ബന്ധപ്പെട്ട നിയമം ലംഘിക്കുകയും പൊതുജനാരോഗ്യത്തിന് അപകടമുണ്ടാക്കുകയും ചെയ്തതിന് അബൂദബിയില്‍ ഭക്ഷ്യ സ്ഥാപനം അടച്ചു പൂട്ടി. 2008ലെ ലോ നമ്പര്‍ 2 ലംഘിച്ചത് കണ്ടെത്തിയതിനെ തുടര്‍ന്നാണ് അബൂദബി അഗ്രികള്‍ച്ചര്‍ ആന്‍ഡ് ഫുഡ് സേഫ്റ്റി അതോറിറ്റി (അഡാഫ്‌സ) അഡ്മിനിസ്‌ട്രേറ്റിവ് ഉത്തരവിലൂടെ എംഎസ് ഫുഡ് ട്രേഡിങ് എന്ന സ്ഥാപനം പൂട്ടിച്ചത്.
റസ്റ്ററന്റുകള്‍, ഭക്ഷ്യ വ്യാപാരം, പലചരക്ക് കടകള്‍, ഭക്ഷണം കൈകാര്യം ചെയ്യുന്ന കമ്പനികള്‍ എന്നിവയുള്‍പ്പെടെയുള്ള സ്ഥാപനങ്ങളില്‍ അഡാഫ്‌സ പലപ്പോഴും പരിശോധന നടത്താറുണ്ട്.

അടച്ചു പൂട്ടിയ സ്ഥാപനത്തിന്റെ ഉടമ ലംഘനം മറികടക്കുന്നതു വരെ നടപടി നിലനില്‍ക്കും. ഒരിക്കല്‍ പൂട്ടിയ സ്ഥാപനം ഔദ്യോഗിക അനുമതിയില്ലാതെ വീണ്ടും തുറക്കാന്‍ പാടില്ല. ഭക്ഷണത്തില്‍ വിഷാംശം കൂടുതലുള്ള വസ്തുക്കള്‍, ഉയര്‍ന്ന കീടനാശിനി അവശിഷ്ടങ്ങള്‍, നിരോധിത ഭക്ഷ്യ ഘടകങ്ങള്‍ ചേര്‍ക്കല്‍, റേഡിയോ ആക്ടിവ് മലിനീകരണം, ദോഷകരമായ അലര്‍ജികള്‍ തുടങ്ങിയവ ആരോഗ്യത്തിന് ഹാനികരമായി കണക്കാക്കപ്പെടുന്നു. ഭക്ഷണം കാലഹരണപ്പെട്ടതാണെങ്കിലോ; ബാക്ടീരിയ, പുഴുക്കള്‍ എന്നിവയാല്‍ മലിനമാണെങ്കിലോ എന്നത് അടക്കമുള്ള സാഹചര്യങ്ങള്‍, രോഗിയായ ഒരു മൃഗത്തില്‍ നിന്നോ, കശാപ്പിന് മുമ്പ് മരിച്ച മൃഗത്തില്‍ നിന്നോ എന്നിവയുള്‍പ്പെടെയുള്ള കാര്യങ്ങള്‍ ലംഘനമായി കണക്കാക്കുന്നതാണ്. കൂടാതെ, തെറ്റിദ്ധരിപ്പിക്കുന്ന ലേബലുകള്‍, വ്യത്യസ്ത തരം വസ്തുക്കളില്‍ മായം കലര്‍ന്ന ഭക്ഷണം എന്നിവയടക്കം നിരവധി വ്യവസ്ഥകള്‍ സ്ഥാപനം അടച്ചു പൂട്ടുന്നതിലേക്ക് നയിച്ചേക്കാവുന്ന സാഹചര്യത്തെ എടുത്തു കാട്ടി അധികൃതര്‍ പട്ടികപ്പെടുത്തിയിട്ടുണ്ട്.

Abu Dhabi closed MS Food Trading for violating a law related to food, and posing a risk to public health. The emirate often inspects establishments including restaurants, food trading, groceries, and other businesses that deal with food in any manner