ന്യൂഡൽഹി: ഹരിതപ്രസ്ഥാനത്തെ ഹൃദയത്തിലേറ്റിയവർക്ക് അഭിമാനമേകി ഇന്ദ്രപ്രസ്ഥത്തിൽ പച്ചപ്പതാക ഉയർന്നു. രാജ്യതലസ്ഥാനത്ത് ആസ്ഥാന മന്ദിരമെന്ന മോഹം സഫലമായി. ഇന്ത്യൻ യൂനിയൻ മുസ്്ലിം ലീഗിന്റെ സ്ഥാപക നേതാവ് ഖാഇദെ മില്ലത്തിന്റെ നാമധേയത്തിലാണ് സെന്റർ സ്ഥാപിച്ചിരിക്കുന്നത്.   

മുസ് ലിം ലീഗ് ദേശീയ രാഷ്ട്രീയകാര്യ സമിതി ചെയർമാൻ പാണക്കാട് സയ്യിദ് സാദിഖലി ശിഹാബ് തങ്ങൾ ഉദ്ഘാടനം ചെയ്തു. ഡൽഹി ജവഹർലാൽ നെഹ്റു സ്റ്റേഡിയത്തിലെ ഇൻഡോർ സ്റ്റേഡിയത്തിൽ നടന്ന പ്രൗഢോജ്വല ചടങ്ങിൽ മുസ് ലിം ലീഗ് നേതൃത്വത്തിന്റെയും രാജ്യത്തിന്റെ വിവിധ ഭാഗങ്ങളിൽനിന്നുള്ള ആയിരക്കണക്കിന് പ്രതിനിധികളുടെയും സാന്നിധ്യത്തിൽ വെർച്വൽ സാങ്കേതിക വിദ്യയുടെ സഹായത്തോടെയായിരുന്നു ഉദ്ഘാടനം.

ഖാഇദെ മില്ലത്ത് സെന്റർ കേന്ദ്രീകരിച്ച് മുസ് ലിം ലീഗിന്റെ സാമൂഹിക ശാക്തീകരണ പദ്ധതികളും മതനിരപേക്ഷ ഇടപെടലുകളും കൂടുതൽ സജീവമായി നടപ്പാക്കുമെന്ന് സാദിഖലി തങ്ങൾ പറഞ്ഞു. ഭരണഘടനാ സംരക്ഷണം, നീതിയുടെ രാഷ്ട്രീയം, എല്ലാവിഭാഗങ്ങളുടെയും ശാക്തീകരണം എന്നിവ ഉറപ്പുവരുത്തുന്നതിൽ മുസ് ലിംലീഗ് ദേശീയ രാഷ്ട്രീയത്തിൽ വലിയ പങ്കുവഹിച്ചിട്ടുണ്ട്. രാജ്യത്തിന്റെ ഭരണഘടനാ നിർമിതിക്കും ന്യൂനപക്ഷങ്ങളുടെ സ്വതന്ത്ര രാഷ്ട്രീയത്തിനും ഖാഇദെ മില്ലത്ത് ഇസ്മാഈൽ സാഹിബ് നൽകിയ സംഭാവനകളും അദ്ദേഹം ചൂണ്ടിക്കാട്ടി. ആദിവാസികൾ, ദളിതർ, പീഡിതവർഗങ്ങൾ, ന്യൂനപക്ഷങ്ങൾ തുടങ്ങി എല്ലാവിഭാഗങ്ങളുടെയും പ്രശ്നങ്ങളിൽ കൂടെയുണ്ടാകും. സാധാരണക്കാരായ പ്രവർത്തകരുടെ സാമ്പത്തികവും വൈകാരികവുമായ പിന്തുണയിലൂടെയാണ് ദേശീയ ആസ്ഥാനമെന്ന സ്വപ്‌നം സാക്ഷാൽകരിക്കുന്നത്. 

കാലതാമസത്തിന്റെ കുറ്റബോധമില്ലാതെ ആത്മസംതൃപ്തിയോടൊണ് ഓഫിസ് തുറക്കുന്നത്. ദേശീയ ഓഫിസ് തലസ്ഥാനത്തെ ഒരു രാഷ്ട്രീയ ഓഫിസ് മാത്രമല്ല, മറിച്ച് സമൂഹങ്ങളുടെ ശാക്തീകരണത്തെയും ഐക്യത്തെയും പരിപോഷിപ്പിക്കുകയും സജീവമായ മതേതര ഇടപെടലുകളുടെ കേന്ദ്രത്തെ പ്രതിനിധീകരിക്കുകയും ചെയ്യുന്നു. ഇന്ത്യൻ യൂനിയൻ മുസ് ലിം ലീഗ് ന്യൂനപക്ഷങ്ങളുടെ അവകാശങ്ങൾക്ക് വേണ്ടി നിലകൊള്ളും. അതോടൊപ്പം രാജ്യത്തെ വൈവിധ്യത്തെ നിലനിർത്താനും നിലകൊള്ളും. ഏക സിവിൽകോഡിനെ എതിർക്കുന്നത് വൈവിധ്യത്തിന് എതിരായതിനാലാണെന്നും അദ്ദേഹം പറഞ്ഞു. 

പ്രിയങ്കാ ഗാന്ധിയുടെ സന്ദേശം ചടങ്ങിൽ വായിച്ചു. മുസ് ലിം ലീഗ് ദേശീയ പ്രസിഡന്റ് കെ.എം ഖാദർ മൊയ്തീൻ അധ്യക്ഷത വഹിച്ചു. എ.ഐ.സി.സി ജനറൽ സെക്രട്ടറി കെ.സി വേണുഗോപാൽ, തമിഴ്നാട് ന്യൂനപക്ഷകാര്യ മന്ത്രി തിരുഅവടി എസ്.എം നാസർ, മുസ് ലിം ലീഗ് ദേശീയ ഓർഗനൈസിങ് സെക്രട്ടറി ഇ.ടി മുഹമ്മദ് ബഷീർ എം.പി, ജാർഖണ്ഡ് മുക്തിമോർച്ച എം.പി സർഫറാസ് അഹമ്മദ്, മുസ് ലിംലീഗ് ദേശീയ സീനിയർ വൈസ് പ്രസിഡന്റ് ഡോ. അബ്ദുസ്സമദ് സമദാനി എം.പി, ദേശീയ സെക്രട്ടറിമാരായ ഖുർറം അനീസ് ഉമർ, അഡ്വ. ഹാരിസ് ബീരാൻ എം.പി, അബ്ദുൽ ബാസിദ്, നവാസ് കനി എം.പി, ദേശീയ അസി. സെക്രട്ടറി ഫാത്തിമ മുസഫർ, ജയന്തി രാജൻ, സമാജ് വാദി പാർട്ടി എം.പി മൗലാന മൊഹിബ്ബുല്ല നദ്വി പ്രസംഗിച്ചു. ദേശീയ ട്രഷറർ പി.വി അബ്ദുൽ വഹാബ് എം.പി നന്ദി പറഞ്ഞു. റാജിഅലി ശിഹാബ് തങ്ങൾ ഖിറാഅത്ത് നടത്തി.