കോഴിക്കോട്: കേരളമുൾപ്പെടെയുള്ള ദക്ഷിണേന്ത്യൻ സംസ്ഥാനത്തേക്കെത്തുന്ന രാസലഹരിയുടെ ഉറവിടം കണ്ടെത്തി. ഡൽഹി, ഹരിയാന പൊലിസിനൊപ്പം കോഴിക്കോട് ടൗൺപൊലിസ് നടത്തിയ അന്വേഷണത്തിലാണ് ദക്ഷിണേന്ത്യയിലേക്ക് ഒഴുകിയിരുന്ന രാസലഹരിയുടെ കേന്ദ്രം കണ്ടെത്താൻ സാധിച്ചത്. ഹരിയാനയിലെ ഗുർഗോണിലെ ഇൻഡസ്ട്രിയൽ എസ്‌റ്റേറ്റിലാണ് രാസലഹരി ഉൽപാദിപ്പിക്കുന്ന കിച്ചണുകൾ പ്രവർത്തിച്ചിരുന്നതെന്നാണ് വിവരം.

ഇതിന് നേതൃത്വം നൽകിയ മൂന്ന് ആഫ്രിക്കൽ സ്വദേശികളെയും പൊലിസ് പിടികൂടിയതായാണ് സൂചന. പ്രതികളെ ടൗൺ ഇൻസ്പെക്ടർ പി.ജിതേഷിന്റെ നേതൃത്വത്തിലുള്ള സംഘം ഇന്ന് കോഴിക്കോടെത്തിക്കും. ആദ്യമായാണ് രാസലഹരി ഉൽപാദിപ്പിക്കുന്ന കിച്ചണുകൾ കണ്ടെത്തുന്നത്. ബംഗളൂരുവിലും ഡൽഹിയിലും ഇവ  ഉണ്ടെന്ന വിവരം ലഭിച്ചതല്ലാതെ  അന്വേഷണ ഏജൻസികൾക്ക് കിച്ചണുകൾ കണ്ടെത്താൻ സാധിച്ചിരുന്നില്ല. അതിനിടെയാണ് മൂന്ന് സംസ്ഥാന പൊലിസ് സംയുക്തമായി നടത്തിയ അന്വേഷണത്തിൽ കിച്ചണുകൾ തിരിച്ചറിഞ്ഞത്. 

ഈ വർഷം ഫെബ്രുവരിയിൽ കോഴിക്കോട് റെയിൽവേ സ്‌റ്റേഷൻ ഭാഗത്ത് നിന്ന് 778 ഗ്രാം എം.ഡി.എം.എയുമായി മലപ്പുറം പുതുക്കോട്ട് സ്വദേശി കെ.സിറാജിനെ പിടികൂടിയതിനെ തുടർന്ന് നടത്തിയ അന്വേഷണമാണ് നിർണായകമായത്. ഹിമാചൽ പ്രദേശിൽ ഉൾപ്പെടെ ലഹരിക്കേസിൽ പ്രതിയായ സിറാജ് ഡൽഹി, ഗോവ കേന്ദ്രീകരിച്ച് പ്രവർത്തിക്കുന്ന ലഹരി മാഫിയ സംഘത്തിലെ മുഖ്യകണ്ണിയാണെന്ന് അന്വേഷണത്തിൽ വ്യക്തമായിരുന്നു. 

ടൗൺ പൊലിസ് രണ്ട് ടീമുകളായാണ് അന്വേഷണം നടത്തിയത്. എസ്.ഐ സജിഷിനോബും സംഘവും ഡൽഹിയിലും ഹരിയാനയിലുമായിരുന്നു അന്വേഷിച്ചത്. മറ്റൊരു സംഘം ഹിമാചൽപ്രദേശിലും അന്വേഷണം നടത്തി. അന്വേഷണത്തിൽ ഡൽഹി കേന്ദ്രീകരിച്ച് മയക്കുമരുന്ന് വിൽപന നടത്തുന്ന ആഫ്രിക്കൽ സ്വദേശി ഹെൻട്രിയെ തിരിച്ചറിഞ്ഞു. ഇയാളെ സംബന്ധിച്ച  വിവരങ്ങൾ  ഡൽഹി, ഹരിയാന പൊലിസിന്  കൈമാറി. തുടർന്ന് നടത്തിയ അന്വേഷണത്തിലാണ് ഹരിയാനയിലെ ഗുർഗോണിൽ രാസലഹരി ഉൽപാദിപ്പിക്കുന്ന കിച്ചൺ കണ്ടെത്തിയത്.