തിരുവനന്തപുരം: ഓണത്തിന് ആശ്വസ പ്രഖ്യാപനവുമായി വീണ്ടും സര്‍ക്കാര്‍. സപ്ലൈകോ വഴി വിതരണം ചെയ്യുന്ന വെളിച്ചെണ്ണയുടെ വില വീണ്ടും കുറച്ചതായി മന്ത്രി ജി.ആര്‍ അനില്‍ അറിയിക്കുന്നു.  ഒരു കിലോ വെള്ളിച്ചെണ്ണ 339 രൂപക്ക് നല്‍കും. സപ്ലൈകോയുടെ എല്ലാ ഔട്ട്‌ലെറ്റുകളിലും ആവശ്യത്തിന് വെളിച്ചെണ്ണ സ്റ്റോക്കുണ്ടെന്നും മന്ത്രി അറിയിച്ചു.

അതേസമയം, പൊതുവിപണിയിലും വെളിച്ചെണ്ണ വില കുറയുന്നതായാണ് റിപ്പോര്‍ട്ട്. 449 രൂപയില്‍ നിന്ന് 405 രൂപയിലേക്ക് വരെ പലയിടത്തും വെളിച്ചെണ്ണ വില ഇടിഞ്ഞിട്ടുണ്ടെന്ന് വ്യാപാരികള്‍ പറയുന്നു.  വരും ദിവസങ്ങളിലും എണ്ണവില കുറയാന്‍ സാധ്യതയുണ്ടെന്നും ഇവര്‍ വ്യക്തമാക്കുന്നു. മറ്റു സാധനങ്ങള്‍ക്കും വിപണിയില്‍ വില കുറഞ്ഞിട്ടുണ്ടെന്നാണ് വ്യാപാരികള്‍ പറയുന്നത്. 

സപ്ലൈകോ ഓണച്ചന്തകളുടെ സംസ്ഥാനതല ഉദ്ഘാടനം തിങ്കളാഴ്ച മുഖ്യമന്ത്രി പിണറായി വിജയന്‍ നിര്‍വഹിക്കും. കിഴക്കേകോട്ടയിലെ ഇ.കെ. നായനാര്‍ പാര്‍ക്കില്‍ നടക്കുന്ന ചടങ്ങില്‍ ഭക്ഷ്യമന്ത്രി ജി.ആര്‍. അനില്‍ അധ്യക്ഷത വഹിക്കും. ചൊവ്വാഴ്ച മുതലാണ് ജില്ല തലങ്ങളില്‍ ഓണം ഫെയറുകള്‍ ആരംഭിക്കും. മഞ്ഞ കാര്‍ഡുകാര്‍ക്കും ക്ഷേമ സ്ഥാപനങ്ങള്‍ക്കുമുള്ള ഓണക്കിറ്റ് വിതരണവും ചൊവ്വാഴ്ച ആരംഭിക്കും. സെപ്റ്റംബര്‍ നാലുവരെയാണ് കിറ്റ് വിതരണം.

ALSO READ: രാഹുല്‍ മാങ്കൂട്ടത്തിലിന്റെ കോണ്‍ഗ്രസ് പ്രാഥമിക അംഗത്വം സസ്‌പെന്‍ഡ് ചെയ്തു; എം.എല്‍.എ സ്ഥാനം രാജിവെക്കില്ല

ഓണത്തിനായി സപ്ലൈകോ രണ്ടര ലക്ഷത്തോളം ക്വിന്റല്‍ ഭക്ഷ്യധാന്യങ്ങള്‍ സംഭരിച്ചിട്ടുണ്ട്. ഓണക്കാലത്ത് നിലവില്‍ നല്‍കിവരുന്ന എട്ട് കിലോ സബ്‌സിഡി അരിക്ക് പുറമെ കാര്‍ഡൊന്നിന് 20 കിലോ പച്ചരിയോ/പുഴുക്കലരിയോ 25 രൂപ നിരക്കില്‍ സ്‌പെഷല്‍ അരിയായി ലഭിക്കും. സബ്‌സിഡി നിരക്കില്‍ നല്‍കുന്ന മുളകിന്റെ അളവ് അരക്കിലോയില്‍നിന്ന് ഒരു കിലോയായി വര്‍ധിപ്പിച്ചിട്ടുണ്ട്. 

സെപ്റ്റംബര്‍ നാലുവരെയാണ് ജില്ല ഫെയറുകള്‍ സംഘടിപ്പിക്കുക. കൂടാതെ സഞ്ചരിക്കുന്ന ഓണച്ചന്തകളും ഒരുക്കിയിട്ടുണ്ട്. ജൂലൈ മാസത്തില്‍ 168 കോടിയുടെ വിറ്റുവരവാണ് സപ്ലൈകോക്ക് ഉണ്ടായത്. 

kerala government announces onam relief by reducing coconut oil price via supplyco. minister g.r. anil confirms one kg coconut oil now available at ₹339 with sufficient stock across all outlets.