കൊച്ചി: കൈക്കൂലി വാങ്ങുന്നതിനിടെ എസ്.ഐയെ വിജിലന്‍സ് അറസ്റ്റ് ചെയ്തു. കൊച്ചി മരട് സ്റ്റേഷനിലെ ഗ്രേഡ് എസ്.ഐ ഗോപകുമാറാണ് പിടിയിലായത്. പിടിച്ചെടുത്ത വാഹനം വിട്ടുകിട്ടാനായി പരാതിക്കാരനില്‍ നിന്ന് പതിനായിരം രൂപയാണ് ഇയാള്‍ കൈക്കൂലി ആവശ്യപ്പെട്ടത്. സ്റ്റേഷനില്‍ വെച്ച് പണം കൈമാറുന്നതിനിടെയാണ് എസ്.ഐയെ വിജിലന്‍സ് സംഘം പിടികൂടിയത്. 

വാഹനം വിട്ടുതരണമെങ്കില്‍ പതിനായിരം രൂപ നല്‍കണമെന്ന് ഇയാള്‍ ഉടമയോട് പറഞ്ഞിരുന്നു. കൈക്കൂലി നല്‍കാതെ വാഹനം വിടില്ലെന്ന് ഗോപകുമാര്‍ തറപ്പിച്ച് പറഞ്ഞതോടെ ഉടമ വിജിലന്‍സിനെ വിവരം അറിയിച്ചു. 

തുടര്‍ന്ന് വിജിലന്‍സ് സംഘം നല്‍കിയ നിര്‍ദേശത്തെ തുടര്‍ന്ന് ഉടമ കൈക്കൂലിയുമായി മരട് സ്റ്റേഷനിലെത്തി. പണം ഗോപകുമാറിന് കൈമാറിയതിന് തൊടുപിന്നാലെ വിജിലന്‍സ് സംഘം സ്റ്റേഷനകത്ത് കയറി ഇയാളെ കൈയോടെ പിടികൂടുകയായിരുന്നു. ഇയാളെ ഉടന്‍ കോടതിയില്‍ ഹാജരാക്കുമെന്ന് അന്വേഷണ സംഘം അറിയിച്ചു.

ALSO READ: തന്റെ മരണത്തിന് അവൻ ഉത്തരവാദിയാണ്; ആയിഷ റഷയുടെ മരണത്തിൽ ആൺ സുഹൃത്ത് ആത്മഹത്യാപ്രേരണക്കുറ്റത്തിന് അറസ്റ്റിൽ