ന്യൂഡൽഹി: പ്രധാനമന്ത്രി നരേന്ദ്ര മോദിക്കും, ആർഎസ്എസിനുമെതിരെ ആക്ഷേപാർഹമായ കാർട്ടൂണുകൾ സമൂഹ മാധ്യമങ്ങളിൽ പങ്കുവെച്ചെന്ന കേസിൽ കാർട്ടൂണിസ്റ്റ് ഹേമന്ത് മാളവ്യക്ക് സുപ്രീം കോടതി മുൻകൂർ ജാമ്യം അനുവദിച്ചു. ഫേസ്ബുക്ക്, ഇൻസ്റ്റഗ്രാം അക്കൗണ്ടുകളിലൂടെ മാളവ്യ ക്ഷമാപണം നടത്തിയത് പരിഗണിച്ചാണ് കോടതി ജാമ്യം അനുവദിച്ചത്. 

ജസ്റ്റിസുമാരായ അരവിന്ദ് കുമാർ, എൻ.വി അഞ്ജരി എന്നിവരടങ്ങിയ ബെഞ്ചാണ് ജാമ്യ ഹരജി പരിഗണിച്ചത്. അന്വേഷണവുമായി സഹകരിച്ചില്ലെങ്കിൽ പൊലിസിന് ജാമ്യം റദ്ദാക്കാനുള്ള അധികാരമുണ്ടെന്നും കോടതി വ്യക്തമാക്കി. 

വിവാദ കാർട്ടൂൺ

2021ലെ കോവിഡ് കാലത്ത് പുറത്തിറങ്ങിയ കാർട്ടൂൺ സോഷ്യൽ മീഡിയയിൽ വീണ്ടും വൈറലായതിനെ തുടർന്നാണ് മാളവ്യക്കെതിരെ കേസ് രജിസ്റ്റർ ചെയ്തത്. ആർഎസ്എസ് പ്രവർത്തകനും, അഭിഭാഷകനുമായ വിനയ് ജോഷിയുടെ പരാതിയിലാണ് മധ്യപ്രദേശ് പൊലിസ് 2025 മേയിൽ മാളവ്യക്കെതിരെ കേസെടുക്കുകയായിരുന്നു. കാർട്ടൂൺ ഹിന്ദു വികാരം വ്രണപ്പെടുത്തിയെന്നും, മതസൗഹാർദ്ദം തകർത്തെന്നും ആരോപിച്ചാണ് കേസ്. 

ഹിന്ദു ദൈവമായ പരമശിവനെ കുറിച്ചുള്ള പരാമർശങ്ങളും, പ്രധാനമന്ത്രി നരേന്ദ്ര മോദി, ആർഎസ്എസ് പ്രവർത്തകർ എന്നിവരുടെ കാരിക്കേച്ചറുകളും കാർട്ടൂണിൽ ഉൾപ്പെട്ടിരുന്നു.

Cartoonist Hemant Malavya received anticipatory bail from the Supreme Court over a case involving cartoons shared against PM Modi and the RSS on social media.