ന്യൂഡൽഹി: പാകിസ്ഥാനുമായുള്ള അടുത്ത ബന്ധം കാരണം ഇന്ത്യ ആഗോള വേദികളിൽ പ്രതികാര നടപടികൾ സ്വീകരിക്കുന്നുവെന്ന ആരോപണവുമായി അസർബൈജാൻ. ഷാങ്ഹായ് സഹകരണ സംഘടനയിൽ (എസ്‌സി‌ഒ) പൂർണ അംഗത്വത്തിനുള്ള അസർബൈജാന്റെ ശ്രമങ്ങളെ ഇന്ത്യ തടഞ്ഞുവെന്നാണ് ആരോപണം. ഇന്ത്യ ബഹുരാഷ്ട്ര നയതന്ത്ര തത്വങ്ങൾ ലംഘിക്കുകയാണെന്നും, ഓപ്പറേഷൻ സിന്ദൂരിനിടെ പാകിസ്ഥാനെ പിന്തുണച്ചതിന്റെ പ്രതികാരമായാണ് ഇന്ത്യ ഇത്തരം നടപടികൾ പ്രതികാരമായി കൈക്കൊള്ളുന്നതെന്നും അസർബൈജാൻ മാധ്യമങ്ങൾ ആരോപിച്ചു.

ചൈനയിലെ ടിയാൻജിൻ നഗരത്തിൽ പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫുമായി നടത്തിയ കൂടിക്കാഴ്ചയിൽ അസർബൈജാൻ പ്രസിഡന്റ് ഇൽഹാം അലിയേവ്, ഈ വർഷം ആദ്യം നടന്ന സൈനിക സംഘർഷത്തിൽ പാകിസ്ഥാനെ അഭിനന്ദിച്ചിരുന്നു. ഇന്ത്യയുടെ നടപടികൾക്കിടയിലും പാകിസ്ഥാനുമായുള്ള സാഹോദര്യ ബന്ധത്തിന് തങ്ങൾ മുൻഗണന നൽകുമെന്ന് അലിയേവ് അവകാശപ്പെട്ടതായി തുർക്കി ദിനപത്രമായ ഡെയ്‌ലി സബാഹ് റിപ്പോർട്ട് ചെയ്തു.

അസർബൈജാനും പാകിസ്ഥാനും തമ്മിലുള്ള ബന്ധം രാഷ്ട്രീയ, സാംസ്കാരിക, തന്ത്രപരമായ തലങ്ങളിൽ ആഴത്തിൽ വേരൂന്നിയതാണെന്ന് അലിയേവ് വ്യക്തമാക്കി. അസർബൈജാൻ-പാകിസ്ഥാൻ അന്തർ ഗവൺമെന്റൽ കമ്മീഷന്റെ ഭാഗമായി വ്യാപാരവും സാമ്പത്തിക സഹകരണവും വർധിപ്പിക്കുന്നതിനെക്കുറിച്ചും അദ്ദേഹം ഷെരീഫുമായി ചർച്ച ചെയ്തതായി റിപ്പോർട്ടിൽ പറയുന്നു.

പഹൽഗാം ഭീകരാക്രമണത്തിന് ശേഷം പാകിസ്ഥാനിലെയും പാക് അധിനിവേശ കശ്മീരിലെയും ഭീകരവാദ കേന്ദ്രങ്ങളെ ലക്ഷ്യമിട്ട് ഇന്ത്യ നടത്തിയ സൈനിക നടപടിയായ ഓപ്പറേഷൻ സിന്ദൂരിനെ പിന്തുണച്ചതിനാണ് ഇന്ത്യ എസ്‌സി‌ഒയിൽ അസർബൈജാന്റെ പൂർണ അംഗത്വം തടഞ്ഞതെന്ന് ആരോപണം.