കോഴിക്കോട്:21 വയസ്സുകാരിയായ ഫിസിയോതെറാപ്പി വിദ്യാർത്ഥിനി ആയിഷ റഷയുടെ ആത്മഹത്യയുമായി ബന്ധപ്പെട്ട് ആൺസുഹൃത്ത് ബഷീറുദ്ദീൻ അറസ്റ്റിൽ. കണ്ണാടിക്കൽ സ്വദേശിയായ ബഷീറുദ്ദീനെ ആത്മഹത്യാപ്രേരണ കുറ്റം ചുമത്തിയാണ് നടക്കാവ് പൊലിസ് അറസ്റ്റ് ചെയ്തത്. ആയിഷയെ ബഷീറുദ്ദീൻ മാനസികമായി പീഡിപ്പിച്ചതിന്റെ തെളിവുകൾ പൊലിസിന് ലഭിച്ചിട്ടുണ്ട്. തന്റെ മരണത്തിന് ബഷീറുദ്ദീൻ ഉത്തരവാദിയാണെന്ന് സൂചിപ്പിക്കുന്ന ആയിഷയുടെ വാട്സാപ് സന്ദേശങ്ങൾ കേസിൽ നിർണായകമായി.

ALSO READ: ഓണാവധിക്ക് നാട്ടിലെത്തിയ വിദ്യാർഥിനി മരിച്ച നിലയിൽ; ആൺസുഹൃത്തിനെതിരെ ബ്ലാക്മെയിലിങ്ങ്, മർദന ആരോപണം

എരഞ്ഞിപ്പാലത്തെ ബഷീറുദ്ദീന്റെ വാടക വീട്ടിൽ ആയിഷയെ തൂങ്ങിമരിച്ച നിലയിൽ കണ്ടെത്തിയിരുന്നു. ആയിഷയുടെ മൊബൈൽ ഫോൺ നേരത്തെ പൊലിസ് കസ്റ്റഡിയിലെടുത്തിരുന്നു, ഇതിൽ നിന്നാണ് നിർണായക തെളിവുകൾ ലഭിച്ചത്. മൂന്ന് വർഷത്തിലേറെ നീണ്ട ബന്ധത്തിനിടെ ഇരുവർക്കും ഇടയിൽ പലപ്പോഴും പ്രശ്നങ്ങൾ ഉണ്ടായിരുന്നതായി വാട്സാപ് സന്ദേശങ്ങളിൽ നിന്ന് വ്യക്തമായി. തന്റെ മരണത്തിന് ബഷീറുദ്ദീനാണ് ഉത്തരവാദിയെന്ന് ആയിഷ വ്യക്തമാക്കുന്ന സന്ദേശവും പൊലിസിന് ലഭിച്ചു. ബഷീറുദ്ദീന്റെ ഫോണും ലാപ്ടോപ്പും പൊലിസ് കസ്റ്റഡിയിലെടുത്ത് ശാസ്ത്രീയ പരിശോധനയ്ക്ക് അയക്കാൻ തീരുമാനിച്ചിട്ടുണ്ട്.

നിലവിൽ ആത്മഹത്യാപ്രേരണക്കുറ്റം ചുമത്തിയാണ് ബഷീറുദ്ദീനെ അറസ്റ്റ് ചെയ്തിരിക്കുന്നത്. ആയിഷയുടെ സുഹൃത്തുക്കളുടെ മൊഴികൾ ഉൾപ്പെടെ രേഖപ്പെടുത്തിയ ശേഷം ആവശ്യമെങ്കിൽ കൂടുതൽ വകുപ്പുകൾ ചേർക്കുമെന്ന് പൊലിസ് അറിയിച്ചു. മംഗലൂരുവിലെ ശ്രീദേവി കോളേജിൽ മൂന്നാം വർഷ ഫിസിയോതെറാപ്പി വിദ്യാർത്ഥിനിയായ ആയിഷ, കഴിഞ്ഞ മാസം 24 മുതൽ എരഞ്ഞിപ്പാലത്തെ വാടക വീട്ടിൽ ബഷീറുദ്ദീനോടൊപ്പമാണ് താമസിച്ചിരുന്നതെന്ന് ബഷീറുദ്ദീൻ പൊലിസിനോട് വെളിപ്പെടുത്തിയിരുന്നു.

ബഷീറുദ്ദീന്റെ മൊഴി

ഫിസിക്കൽ ട്രെയിനറായ ബഷീറുദ്ദീൻ, ഞായറാഴ്ച രാവിലെ ജിമ്മിലെ ഓണാഘോഷ പരിപാടിയിൽ പങ്കെടുക്കാൻ പോകുന്നതിനെ ആയിഷ എതിർത്തിരുന്നു. എതിർപ്പ് അവഗണിച്ച് പരിപാടിയിൽ പങ്കെടുത്ത ശേഷം രാത്രി 8:30-ന് വീട്ടിലെത്തിയപ്പോഴാണ് ആയിഷയെ തൂങ്ങിയ നിലയിൽ കാണുകയായിരുന്നുവെന്നാണ് ബഷീറുദ്ദീന്റെ മൊഴി. 

പ്രാഥമിക പോസ്റ്റ്മോർട്ടം റിപ്പോർട്ട് ആയിഷയുടെ മരണം തൂങ്ങിമരണമാണെന്ന് സ്ഥിരീകരിക്കുന്നു.സംഭവത്തിൽ സമഗ്രമായ അന്വേഷണം ആവശ്യപ്പെട്ട് ആയിഷയുടെ ബന്ധുക്കൾ രംഗത്തെത്തിയിട്ടുണ്ട്.ബഷീറുദ്ദീൻ ആയിഷയെ ബ്ലാക്മെയിൽ ചെയ്തിരുന്നതായും മാനസികമായി പീഡിപ്പിച്ചിരുന്നതായും ബന്ധുക്കൾ ആരോപിക്കുന്നു. "മോർഫ് ചെയ്ത ഫോട്ടോകൾ കാണിച്ച് അവളെ ഭീഷണിപ്പെടുത്തി വിളിച്ചുവരുത്തിയതാണ്. ബ്ലാക്മെയിലിങ്ങ് നടത്തിയിട്ടുണ്ട്. ക്ലാസ് കട്ട് ചെയ്താൽ വീട്ടുകാർ അറിയുമെന്ന ഭയം കണക്കിലെടുത്താണ് അവധിക്കാലം തിരഞ്ഞെടുത്തത്. അത്തരം ഫോട്ടോകൾ കാണിച്ചാൽ ആയിഷ അവന്റെ വഴിക്ക് വരുമെന്ന് അവന് ഉറപ്പുണ്ടായിരുന്നു. അവൾക്ക് അതിനെ എതിർക്കാനുള്ള ശേഷിയും ഉണ്ടായിരുന്നില്ല," തുടങ്ങിയ ആരോപണങ്ങളാണ് ബന്ധുകൾ ഉന്നയിച്ചിരിക്കുന്നത്.