ദുബൈ: ഗാർഹിക ഗ്യാസ് സിലിണ്ടർ വിതരണവുമായി ബന്ധപ്പെട്ട് നടത്തിയ വ്യാപകമായ പരിശോധനകളിൽ 170 വാഹനങ്ങൾ പിടിച്ചെടുത്തതായും 1,098 നിയമലംഘനങ്ങൾ രേഖപ്പെടുത്തിയതായും ദുബൈ റോഡ്‌സ് ആൻഡ് ട്രാൻസ്‌പോർട്ട് അതോറിറ്റി (ആർടിഎ)  അറിയിച്ചു. 2023 മുതൽ 2025-ന്റെ ആദ്യ പകുതി വരെ 4,322 ഫീൽഡ് പരിശോധനകളാണ് ആർടിഎയും മറ്റ് അധികാരികളും ചേർന്ന് നടത്തിയത്.

ALSO READ: ഫുഡ് ഡെലിവറി ആപ്പുകള്‍ക്ക് നിയന്ത്രണങ്ങള്‍ ഏര്‍പ്പെടുത്തി ദുബൈ; നടപടി ഡിജിറ്റല്‍ പ്ലാറ്റ്‌ഫോമുകളിലെ ഉപഭോക്തൃ വിശ്വാസം വര്‍ധിപ്പിക്കാന്‍ 

“ഗാർഹിക ഗ്യാസ് വിതരണം പൊതുജനാരോഗ്യം, സുരക്ഷ, പരിസ്ഥിതി എന്നിവയെ നേരിട്ട് ബാധിക്കുന്ന ഒരു പ്രവർത്തനമാണ്. വ്യാജമോ തിരിച്ചറിയാൻ കഴിയാത്തതോ ആയ ഗ്യാസ് സിലിണ്ടറുകൾ കണ്ടെത്താനും ലൈസൻസിംഗ് മാനദണ്ഡങ്ങൾ പാലിക്കപ്പെടുന്നുണ്ടെന്ന് ഉറപ്പാക്കാനും കർശനമായ മേൽനോട്ടം ആവശ്യമാണ്. ഇത് ഗുരുതര അപകടങ്ങൾ തടയാൻ സഹായിക്കും,” ആർടിഎയുടെ ലൈസൻസിംഗ് ആക്ടിവിറ്റീസ് മോണിറ്ററിംഗ് വിഭാഗം ഡയറക്ടർ സയീദ് അൽ റംസി വ്യക്തമാക്കി.

ഗുരുതര നിയമലംഘനങ്ങൾ

വ്യാജമോ ലൈസൻസ് ഇല്ലാത്തതോ ആയ ഗ്യാസ് സിലിണ്ടറുകൾ കൈവശം വച്ചതും ആവശ്യമായ പെർമിറ്റുകളില്ലാതെ അനധികൃതമായി ​ഗ്യാസ് സിലിണ്ടറുകൾ വിതരണം ചെയ്തതുമാണ് നിയമലംഘനങ്ങളിൽ ഭൂരിഭാ​ഗവും. 

”നിയമലംഘനങ്ങൾക്ക് പുറമേ, നിയമങ്ങൾ പാലിക്കാത്ത 170 വാഹനങ്ങളും പിടിച്ചെടുത്തു,” അൽ റംസി കൂട്ടിച്ചേർത്തു.

ഗാർഹിക ഗ്യാസ് വിതരണത്തിൽ ഏർപ്പെട്ട എല്ലാ സ്ഥാപനങ്ങളും കർശനമായി നിയമങ്ങൾ പാലിക്കണമെന്നും ലൈസൻസുള്ള വാഹനങ്ങൾ മാത്രം ഉപയോഗിക്കണമെന്നും ആർടിഎ ആവശ്യപ്പെട്ടു. “പൊതുജന സുരക്ഷ ഉറപ്പാക്കാൻ കർശനമായ പരിശോധനകൾ തുടരും. നിയമലംഘകർക്കെതിരെ കർക്കശമായ നിയമനടപടികൾ സ്വീകരിക്കും,” അൽ റംസി മുന്നറിയിപ്പ് നൽകി.

ALSO READ: കണ്ടന്റ് ക്രിയറ്റർ മാർക്ക് സുവർണാവസരം; ദുബൈ എക്സ്പോ സിറ്റിയിലെ ആലിഫ് ചലഞ്ച്; 100,000 ദിർഹം സമ്മാനവും മികച്ച ജോലിയും നേടാം 

അതിനിടെ, അൽ ഖൂസ് ഇൻഡസ്ട്രിയൽ ഏരിയയിൽ ഡസൻ കണക്കിന് ഗ്യാസ് സിലിണ്ടറുകൾ കൊണ്ടുപോകാൻ ഉപയോ​ഗിച്ചിരുന്ന മിനിബസ് തിങ്കളാഴ്ച ദുബൈ പൊലിസ് പിടിച്ചെടുത്തിരുന്നു. ട്രാഫിക് പട്രോളിംഗിനിടെ നടത്തിയ പരിശോധനയിലാണ് വാഹനം പിടിച്ചെടുത്തത്. കൂടുതൽ സിലിണ്ടറുകൾ വയ്ക്കാൻ വാഹനത്തിലെ സീറ്റുകൾ നീക്കം ചെയ്തിരുന്നതായി ഉദ്യോഗസ്ഥർ കണ്ടെത്തിയിരുന്നു. ഇത് ഡ്രൈവർമാർക്കും റോഡ് ഉപയോക്താക്കൾക്കും “ഗുരുതരമായ അപകടസാധ്യത” വരുത്തിവയ്ക്കുമെന്ന  വിലയിരുത്തലിലാണ് പൊലിസ് മിനിബസ് പിടിച്ചെടുത്തത്.

dubai authorities seized 170 vehicles used for distributing unsafe gas cylinders, reinforcing strict safety measures to protect residents and communities.