ഇന്ത്യ-ഇംഗ്ലണ്ട് മൂന്നാം ടെസ്റ്റ് മത്സരത്തിന് ജൂൺ പത്തിനാണ് തുടക്കമാവുന്നത്. ലോർഡ്സിലാണ് മൂന്നാം മത്സരം നടക്കുന്നത്. നിലവിൽ പരമ്പരയിൽ ഓരോ മത്സരങ്ങൾ വീതം വിജയിച്ചുകൊണ്ട് ഇരു ടീമുകളും ഒപ്പത്തിനൊപ്പമാണ്. ആദ്യ മത്സരം പരാജയപ്പെട്ട ഇന്ത്യ രണ്ടാം ടെസ്റ്റിൽ ശക്തമായി തിരിച്ചുവരവ് നടത്തി വിജയം കൈപ്പിടിയിലാക്കുകയായിരുന്നു. മൂന്നാം മത്സരത്തിലും ഈ വിജയ പരമ്പര തുടരാനായിരിക്കും ഇന്ത്യ ലക്ഷ്യം വെക്കുക. 

മൂന്നാം മത്സരത്തിൽ ഇന്ത്യൻ നായകൻ ശുഭ്മൻ ഗില്ലിന് ഒരു ചരിത്ര റെക്കോർഡും തന്റെ പേരിലാക്കി മാറ്റാൻ സാധിക്കും. ഒരു ടെസ്റ്റ് പരമ്പരയിൽ ഏറ്റവും കൂടുതൽ റൺസ് നേടുന്ന നായകനായി മാറാനുള്ള അവസരമാണ് ഗില്ലിന്റെ മുന്നിലുള്ളത്. ഇതിനു വേണ്ടത് വെറും 225 റൺസ് മാത്രമാണ്. നിലവിൽ ഈ റെക്കോർഡ് ഇതിഹാസ താരം ഡോൺ ബ്രാഡ്മാന്റെ പേരിലാണുള്ളത്. 1930ൽ ഇംഗ്ലണ്ടിനെതിരെ 810 റൺസ് നേടിയാണ് ബ്രാഡ്മാൻ ഈ റെക്കോർഡ് കൈവരിച്ചത്. നിലവിൽ ഈ പരമ്പരയിൽ രണ്ടു മത്സരങ്ങൾ പിന്നിട്ടപ്പോൾ തന്നെ നാല് ഇന്നിംഗ്സുകളിൽ നിന്നും 585 റൺസ് ആണ് ഗിൽ നേടിയിയുള്ളത്.

ഇംഗ്ലണ്ടിനെതിരായ രണ്ടാം ടെസ്റ്റിൽ രണ്ട് ഇന്നിങ്സിലും തകർപ്പൻ പ്രകടനമാണ് നായകൻ ഗിൽ നടത്തിയത്. ആദ്യ ഇന്നിങ്സിൽ ഡബിൾ സെഞ്ച്വറിയും രണ്ടാം ഇന്നിങ്സിൽ സെഞ്ച്വറി നേടിയുമാണ് ഗിൽ തിളങ്ങിയത്.ആദ്യ ഇന്നിങ്സിൽ 387 പന്തിൽ നിന്നും 269 റൺസാണ് ഗില്ലിന്റെ ബാറ്റിൽ നിന്നും പിറന്നത്. 30 ഫോറുകളും മൂന്ന് സിക്സുകളും അടങ്ങുന്നതാണ് ഗില്ലിന്റെ ഇന്നിംഗ്സ്. രണ്ടാമത്തെ ഇന്നിങ്സിൽ  161 പന്തിൽ 162 റൺസുമാണ് ഇന്ത്യൻ നായകൻ നേടിയത്. 13 ഫോറുകളും എട്ട് സിക്സുകളുമാണ് ഗിൽ നേടിയത്. 

രണ്ടാം ടെസ്റ്റ് മത്സരത്തിൽ 336 റൺസിന്റെ കൂറ്റൻ വിജയമാണ് ഇന്ത്യ സ്വന്തമാക്കിയത്. എഡ്ജ്ബാസ്റ്റൺ സ്റ്റേഡിയത്തിൽ ചരിത്ര വിജയമാണ് ഇന്ത്യ നേടിയത്. ഈ വേദിയിലെ ഇന്ത്യയുടെ ആദ്യ ടെസ്റ്റ് വിജയമായിരുന്നു ഇത്. ഇതിനു മുമ്പ് ഈ വേദിയിൽ ഇതുവരെ എട്ട് മത്സരങ്ങളിലാണ് ഇന്ത്യ കളിച്ചിട്ടുള്ളത്. ഇതിൽ ഏഴ് മത്സരങ്ങൾ പരാജയപ്പെട്ടപ്പോൾ ഒരു മത്സരം സമനിലയിൽ പിരിയുകയും ചെയ്തു. എന്നാൽ രണ്ടാം ടെസ്റ്റ് വിജയത്തോടെ ഇന്ത്യയുടെ ചരിത്ര നായകനായും ഗിൽ  മാറിയിരിക്കുകയാണ്. 

Shubhman Gill need 225 Runs to Break Don Bradman Record in Test Cricket