ദുബൈ: യുണൈറ്റഡ് അറബ് എമിറേറ്റ്‌സ് (യുഎഇ) എന്നത് ഏഴ് എമിറേറ്റുകളുടെ ഒരു കൂട്ടായ്മയാണ്. അബൂദബി, ദുബൈ, ഷാര്‍ജ, അജ്മാന്‍, ഉമ്മുല്‍ ഖുവൈന്‍, റാസല്‍ഖൈമ, ഫുജൈറ എന്നിവയാണ് യുഎഇയിലെ 7 എമിറേറ്റുകള്‍. ഓരോ എമിറേറ്റിനും ഒരു ഭരണകൂടവും ചരിത്രവും ഉണ്ട്. 1971ല്‍ രൂപീകരിച്ച ഈ ഫെഡറേഷന്‍, ഭരണ കുടുംബങ്ങള്‍ തമ്മിലുള്ള വിശ്വാസത്തിലും ഐക്യത്തിലുമാണ് നിലനില്‍ക്കുന്നത്. ഓരോ എമിറേറ്റും ആഭ്യന്തര കാര്യങ്ങള്‍ സ്വന്തമായി നിയന്ത്രിക്കുമ്പോള്‍, ദേശീയ ഭരണത്തിനായി ഒന്നിച്ച് പ്രവര്‍ത്തിക്കുന്നു. 7 എമിറേറ്റിലെയും ഭരണാധികാരികള്‍ യുഎഇയുടെ ഫെഡറല്‍ സുപ്രീം കൗണ്‍സിലില്‍ അംഗങ്ങളാണ്.

1. അബൂദബി: അല്‍ നഹ്യാന്‍ രാജവംശം
പ്രധാന സവിശേഷത: യുഎഇയുടെ തലസ്ഥാനവും ഏറ്റവും സമ്പന്നവുമായ എമിറേറ്റ്.
ഭരണാധികാരി: ഷെയ്ഖ് മുഹമ്മദ് ബിന്‍ സായിദ് ആല്‍ നഹ്യാന്‍, യുഎഇ പ്രസിഡന്റ്.
വംശം: ബനി യാസ്.

1800കളില്‍ മുതല്‍ ഭരണത്തിലുള്ള അല്‍ നഹ്യാന്‍ കുടുംബം അബൂദബിയുടെ എണ്ണസമ്പത്തിന്റെ മേല്‍നോട്ടം വഹിക്കുന്നു. ഷെയ്ഖ് മുഹമ്മദ് ബിന്‍ സായിദ് ആല്‍ നഹ്യാന്‍, ശാന്തനും തന്ത്രശാലിയുമായ നേതാവാണ്. മകന്‍ ഷെയ്ഖ് ഖാലിദ് 2023ല്‍ അബൂദബിയുടെ കിരീടാവകാശിയായി.

2. ദുബൈ: അല്‍ മക്തൂം രാജവംശം
പ്രധാന സവിശേഷത: ടൂറിസം, വ്യാപാരം, സാമ്പത്തിക കേന്ദ്രം.
ഭരണാധികാരി: ഷെയ്ഖ് മുഹമ്മദ് ബിന്‍ റാഷിദ് ആല്‍ മക്തൂം, യുഎഇ വൈസ് പ്രസിഡന്റും പ്രധാനമന്ത്രിയും.
വംശം: ബനി യാസ്.

1833 മുതല്‍ ദുബൈ ഭരിക്കുന്ന അല്‍ മക്തൂം കുടുംബം ബുര്‍ജ് ഖലീഫ, പാം ഐലന്‍ഡ്‌സ് തുടങ്ങിയവയിലൂടെ ദുബൈയെ ആഗോള ഹബ്ബാക്കി മാറ്റി. ഷെയ്ഖ് മുഹമ്മദിന്റെ മകന്‍ ഷെയ്ഖ് ഹംദാന്‍ (ഫസ്സ) സാഹിത്യത്തിലും സാഹസികതയിലും പ്രശസ്തനാണ്.

3. ഷാര്‍ജ: അല്‍ ഖാസിമി രാജവംശം
പ്രധാന സവിശേഷത: യുഎഇയുടെ സാംസ്‌കാരിക തലസ്ഥാനം.
ഭരണാധികാരി: ഷെയ്ഖ് ഡോ. സുല്‍ത്താന്‍ ബിന്‍ മുഹമ്മദ് അല്‍ ഖാസിമി.
വംശം: അല്‍ ഖാസിമി.

1700കളില്‍ മുതല്‍ ഷാര്‍ജ ഭരിക്കുന്ന ഈ കുടുംബം സംസ്‌കാരത്തിനും വിദ്യാഭ്യാസത്തിനും ഊന്നല്‍ നല്‍കുന്നു. പണ്ഡിതനും ചരിത്രകാരനുമായ ഷെയ്ഖ് സുല്‍ത്താന്‍, ചരിത്ര സ്ഥലങ്ങള്‍ പുനഃസ്ഥാപിക്കുകയും സര്‍വകലാശാലകള്‍ സ്ഥാപിക്കുകയും ചെയ്തു. അദ്ദേഹത്തിന്റെ മകന്‍ ഷെയ്ഖ് സുല്‍ത്താന്‍ ബിന്‍ മുഹമ്മദാണ് കിരീടാവകാശി.

4. റാസല്‍ഖൈമ: അല്‍ ഖാസിമി രാജവംശം
പ്രധാന സവിശേഷത: മലനിരകളും പ്രകൃതി ഭംഗിയും.
ഭരണാധികാരി: ഷെയ്ഖ് സൗദ് ബിന്‍ സഖ്ര്‍ അല്‍ ഖാസിമി.
വംശം: അല്‍ ഖാസിമി.

2010 മുതല്‍ ഷെയ്ഖ് സൗദാണ് റാസല്‍ഖൈമ ഭരിക്കുന്നത്. സാമ്പത്തികരാഷ്ട്രീയ പഠനം നടത്തിയ അദ്ദേഹം ടൂറിസത്തിനും വ്യവസായത്തിനും ഊന്നല്‍ നല്‍കുന്നു. അദ്ദേഹത്തിന്റെ മകന്‍ ഷെയ്ഖ് മുഹമ്മദാണ് റാസല്‍ഖൈമയുടെ കിരീടാവകാശി.

5. അജ്മാന്‍: അല്‍ നുഐമി രാജവംശം

പ്രധാന സവിശേഷത: ഏറ്റവും ചെറിയ എമിറേറ്റ്, സാംസ്‌കാരിക പൈതൃകം.
ഭരണാധികാരി: ഷെയ്ഖ് ഹുമൈദ് ബിന്‍ റാഷിദ് ആല്‍ നുഐമി.
വംശം: ആല്‍ ബുഖറൈബാന്‍ (നുഐമി).

1816 മുതല്‍ അജ്മാനില്‍ ഭരണം നടത്തുന്ന ഈ കുടുംബം 1981 മുതല്‍ ശൈഖ് ഹുമൈദിന്റെ നേതൃത്വത്തില്‍ എമിറേറ്റില്‍ ആധുനികവല്‍ക്കരണം നടപ്പിലാക്കി. അദ്ദേഹത്തിന്‍രെ മകന്‍ ഷെയ്ഖ് അമ്മാറാണ് അജ്മാന്റെ കിരീടാവകാശി.

6. ഫുജൈറ: അല്‍ ശര്‍ഖി രാജവംശം

പ്രധാന സവിശേഷത: ഒമാന്‍ ഗള്‍ഫ് തീരം, വ്യാപാര കേന്ദ്രം.
ഭരണാധികാരി: ഷെയ്ഖ് ഹമദ് ബിന്‍ മുഹമ്മദ് ആല്‍ ശര്‍ഖി.
വംശം: ശര്‍ഖിയിന്‍.

20ാം നൂറ്റാണ്ടിന്റെ തുടക്കം മുതല്‍ ഭരണം നടത്തുന്ന ഈ കുടുംബം 1974 മുതല്‍ ശൈഖ് ഹമദിന്റെ നേതൃത്വത്തില്‍ വളര്‍ച്ച കൈവരിച്ചു. അദ്ദേഹത്തിന്റെ മകന്‍ ഷെയ്ഖ് മുഹമ്മദാണ് കിരീടാവകാശി.

7. ഉമ്മുല്‍ ഖുവൈന്‍: അല്‍ മുഅല്ല രാജവംശം

പ്രധാന സവിശേഷത: ശാന്തമായ ജീവിതവും മത്സ്യബന്ധനവും.
ഭരണാധികാരി: ഷെയ്ഖ് സൗദ് ബിന്‍ റാഷിദ് ആല്‍ മുഅല്ല.
വംശം: അല്‍ അലി.

1700കളില്‍ മുതല്‍ ഉമ്മുല്‍ഖുവൈന്റെ ഭരണം നടത്തുന്നത് ഈ കുടുംബമാണ്. 2009 മുതല്‍ ശൈഖ് സൗദാണ് ഭരണ നേതൃത്വത്തില്‍. അദ്ദേഹത്തിന്റെ മകന്‍ ഷെയ്ഖ് റാഷിദാണ് കിരീടാവകാശി.

ഭരണാധികാരികളുടെ ഒത്തുചേരല്‍

ഏഴ് ഭരണാധികാരികളും യുഎഇയുടെ ഫെഡറല്‍ സുപ്രീം കൗണ്‍സിലില്‍ അംഗങ്ങളാണ്. ഈ കൗണ്‍സില്‍ ഓരോ അഞ്ച് വര്‍ഷത്തിലും പ്രസിഡന്റിനെയും വൈസ് പ്രസിഡന്റിനെയും തിരഞ്ഞെടുക്കുന്നു. അബൂദബി ഭരണാധികാരി പ്രസിഡന്റും ദുബൈ ഭരണാധികാരി വൈസ് പ്രസിഡന്റും പ്രധാനമന്ത്രിയുമാകാറാണ് പതിവ്. എമിറേറ്റുകള്‍ക്കിടെയിലെയും ഭരണാധികാരികള്‍ക്കിടെയിലെയും ഐക്യമാണ് രാജ്യത്തെ മുന്നോട്ട് നയിക്കുന്നത്.

Explore the powerful legacy, unity, and leadership of the UAE’s royal families. From Abu Dhabi to Fujairah, discover how the rulers of the seven emirates shaped a nation with one shared vision.