അബൂദബി: യു.എ.ഇയുടെ ബഹിരാകാശ സാങ്കേതികവിദ്യാ വികസനം ലക്ഷ്യമിട്ട് അബൂദബിയില്‍ 20 ആളില്ലാ ആകാശ വാഹനങ്ങള്‍ നിര്‍മിക്കുന്നു. മിഡില്‍ ഈസ്റ്റ്, ഉത്തരാഫ്രിക്കന്‍ മേഖലയിലെ ആദ്യ സംരംഭമാണിത്. സ്‌പേസ് 42ന്റെ അനുബന്ധ സ്ഥാപനമായ മിറ എയ്‌റോസ്‌പേസ് സ്ഥാപിച്ച മേഖലയിലെ ആദ്യ ആകാശ പ്ലാറ്റ്‌ഫോമിന് 4,500 ചതുരശ്ര മീറ്റര്‍ വിസ്തൃതിയുണ്ട്. സിവില്‍, പരിസ്ഥിതി, പ്രതിരോധ മേഖലകളിലെ വിവിധ ആപ്ലിക്കേഷനുകളെ പ്ലാറ്റ്‌ഫോം പിന്തുണയ്ക്കും.

'ഹൈ ആള്‍ട്ടിറ്റിയൂഡ് പ്ലാറ്റ്‌ഫോം സാങ്കേതിക വിദ്യകള്‍ക്കായുള്ള ആഗോള ആവശ്യം വര്‍ധിച്ചുവരികയാണ്. തന്ത്രപരമായ നിക്ഷേപങ്ങളിലൂടെ ഈ മേഖലയില്‍ തങ്ങളുടെ നേതൃത്വം ഏകീകരിക്കാന്‍ സ്‌പേസ് 42 ശ്രമിക്കുകയാണ്' മിറ എയ്‌റോസ്‌പേസ് സി.ഇ.ഒ ഖാലിദ് അല്‍ മര്‍സൂഖി പറഞ്ഞു. 2030ലെ ദേശീയ ബഹിരാകാശ നയത്തിന്റെ ലക്ഷ്യങ്ങള്‍ക്കനുസൃതമായി ബഹിരാകാശ സാങ്കേതികവിദ്യ, നിര്‍മാണം, ഗവേഷണം എന്നിവ വികസിപ്പിക്കാനുള്ള യു.എ.ഇയുടെ നീക്കത്തിന്റെ ഭാഗമായാണ് സൗകര്യം സ്ഥാപിക്കുന്നത്.

വായുവിനേക്കാള്‍ ഭാരമേറിയ പ്ലാറ്റ്‌ഫോമുകള്‍ വഴി സ്ട്രാറ്റോസ്ഫിയറില്‍ നിന്ന് 5ജി കണക്ടിവിറ്റി പ്രദര്‍ശിപ്പിച്ച ആദ്യ കമ്പനിയാണ് സ്‌പേസ് 42. ഈ വര്‍ഷം ഫെബ്രുവരിയില്‍ സമുദ്രനിരപ്പില്‍ നിന്ന് ഉയരത്തിലുള്ളതും ദീര്‍ഘ നേരമെടുക്കുന്നതുമായ ഡ്രോണ്‍ പറക്കല്‍ പരീക്ഷണങ്ങള്‍ക്കായി സ്ഥിരമായ പരീക്ഷണ കേന്ദ്രം സ്ഥാപിക്കുന്നതിന് വേണ്ടി കമ്പനി മെയ്ദാന്‍ എക്‌സുമായി സഹകരണ കരാറില്‍ ഒപ്പുവച്ചു. 2024 ഒക്ടോബറില്‍ പരിസ്ഥിതി നിരീക്ഷണം, ദുരന്ത നിവാരണം, നഗര ആസൂത്രണം, കൃഷി എന്നിവയിലെ ആപ്ലിക്കേഷനുകളെ പിന്തുണയ്ക്കുന്നതിനായി കമ്പനി രണ്ട് നവീന പേലോഡുകള്‍ വികസിപ്പിച്ചെടുത്തിരുന്നു.

ALSO READ: യുഎഇയിലെ പാനീയങ്ങളുടെ വില ഇനി അതിലെ പഞ്ചസാരയെ ആശ്രയിച്ച്; പഞ്ചസാരയുടെ അളവ് കൂടുന്തോറും നികുതി കൂടും

Abu Dhabi has established a new facility, the first-of-its-kind in Mena, which aims to produce more than 20 high-altitude unmanned aerial vehicles (UAVs).