റിയാദ്: താമസ, തൊഴില്‍, അതിര്‍ത്തി സുരക്ഷാ നിയമങ്ങള്‍ ലംഘിച്ചതിന് സഊദി അറേബ്യയില്‍ ഒരാഴ്ച നീണ്ട പരിശോധനകളില്‍ 23,000-ത്തിലധികം പേര്‍ അറസ്റ്റിലായതായി ആഭ്യന്തര മന്ത്രാലയം അറിയിച്ചു.

ALSO READ: ആവര്‍ത്തിച്ചുള്ള ഇസ്‌റാഈല്‍ ആക്രമണങ്ങളെ അപലപിച്ചു; സിറിയയ്ക്ക് പിന്തുണ പ്രഖ്യാപിച്ച് അറബ് രാജ്യങ്ങള്‍ സംയുക്ത പ്രസ്താവന ഇറക്കി

ജൂലൈ 10 മുതല്‍ 16 വരെ നടന്ന സംയുക്ത ഫീല്‍ഡ് ക്യാമ്പെയ്നിന്റെ ഭാഗമായാണ് നടപടി. രാജ്യത്തെ കുടിയേറ്റ, തൊഴില്‍ നിയമങ്ങള്‍ കര്‍ശനമായി നടപ്പാക്കുന്നതിന്റെ ഭാഗമായി 23,167 പേരെ കസ്റ്റഡിയിലെടുത്തു. ഇതില്‍ 14,525 പേര്‍ താമസ നിയമങ്ങള്‍ ലംഘിച്ചവരും, 5,511 പേര്‍ അതിര്‍ത്തി സുരക്ഷാ ചട്ടങ്ങള്‍ ലംഘിച്ചവരും, 3,131 പേര്‍ തൊഴില്‍ നിയമങ്ങള്‍ ലംഘിച്ചവരുമാണ്.

അറസ്റ്റിലായവരില്‍ 69% എത്യോപ്യന്‍ പൗരന്മാരും 30% യെമന്‍ വംശജരും ബാക്കിയുള്ളവര്‍ മറ്റ് രാജ്യക്കാരുമാണ്. അനധികൃതമായി രാജ്യം വിടാന്‍ ശ്രമിച്ച 41 പേര്‍ കൂടി പിടിയിലായി. നിയമലംഘകര്‍ക്ക് ഗതാഗതം, താമസം, ജോലി, അല്ലെങ്കില്‍ മറ്റ് സഹായങ്ങള്‍ നല്‍കിയ 22 പേര്‍ക്കെതിരെയും അധികൃതര്‍ നടപടി സ്വീകരിച്ചു.

നിലവില്‍ 14,255 പുരുഷന്മാരും 2,186 സ്ത്രീകളും ഉള്‍പ്പെടെ 16,441 പേര്‍ രാജ്യത്ത് നിയമനടപടികള്‍ക്ക് വിധേയരാണ്. കസ്റ്റഡിയിലുള്ളവരില്‍ 8,622 പേരെ യാത്രാ രേഖകള്‍ ലഭിക്കുന്നതിനായി അതത് നയതന്ത്ര കാര്യാലയങ്ങളിലേക്ക് അയച്ചു. 3,393 പേര്‍ നാടുകടത്തല്‍ പ്രക്രിയയിലാണ്. ഇതുവരെ 10,587 പേരെ നാടുകടത്തിയതായും മന്ത്രാലയം അറിയിച്ചു.

ALSO READ: സഊദിയില്‍ പലയിടത്തും ശക്തമായ പൊടിക്കാറ്റിനും ഇടിമിന്നലിനും സാധ്യത | Saudi Weather Updates

നിയമവിരുദ്ധമായി രാജ്യത്തേക്ക് പ്രവേശിക്കുന്നവര്‍ക്ക്‌ സൗകര്യമൊരുക്കുന്നവര്‍ക്കും താമസം, ഗതാഗതം, അല്ലെങ്കില്‍ മറ്റ് പിന്തുണ നല്‍കുന്നവര്‍ക്കും കര്‍ശന ശിക്ഷ ലഭിക്കുമെന്ന് മന്ത്രാലയം മുന്നറിയിപ്പ് നല്‍കി. മക്ക, റിയാദ്, കിഴക്കന്‍ പ്രവിശ്യ, മദീന എന്നിവിടങ്ങളില്‍ ഉള്ളവര്‍ 911-ലും, രാജ്യത്തിന്റെ മറ്റ് പ്രദേശങ്ങളില്‍ ഉള്ളവര്‍ 999, 996 എന്നീ നമ്പറുകളിലും സംശയാസ്പദമായ നിയമലംഘനങ്ങള്‍ റിപ്പോര്‍ട്ട് ചെയ്യാന്‍ മന്ത്രാലയം പൊതുജനങ്ങളോട് അഭ്യര്‍ത്ഥിച്ചു.

Saudi authorities have arrested more than 23,000 individuals in just one week for violating residency, labor, and border security laws. The intensified crackdown highlights the kingdom’s ongoing efforts to regulate illegal residency and labor practices. Stay updated on this major enforcement campaign and its nationwide impact.