ടെസ്റ്റ് ക്രിക്കറ്റിലെ ഗോട്ട് ആരാണെന്ന് പറയുകയാണ് ഇംഗ്ലണ്ട് ടെസ്റ്റ് ക്യാപ്റ്റൻ ബെൻ സ്റ്റോക്സ്. ഇംഗ്ലണ്ടിലെ തന്റെ സഹതാരമായ റൂട്ടിനെയാണ് ബെൻ സ്റ്റോക്സ് ടെസ്റ്റിലെ ഗോട്ട് എന്ന് വിശേഷിപ്പിച്ചത്. ഇന്ത്യക്കെതിരായ നാലാം ടെസ്റ്റിന് മുന്നോടിയായാണ് ബെൻ സ്റ്റോക്സ് റൂട്ടിനെ പ്രശംസിച്ചത്. 

''ഞാൻ കൂടുതലൊന്നും പറയേണ്ടതില്ല. റൂട്ട് ടെസ്റ്റിലെ സമ്പൂർണ ഗോട്ടാണ്'' ഇംഗ്ലണ്ട് നായകൻ പറഞ്ഞതായി ഫോക്സ്സ്പോർട്ട് റിപ്പോർട്ട് ചെയ്തു. 

ടെസ്റ്റ് ക്രിക്കറ്റിൽ റൂട്ട് 156 മത്സരങ്ങളിൽ നിന്ന് 50.80 എന്ന മികച്ച ശരാശരിയിൽ 13259 റൺസ് ആണ് നേടിയിട്ടുള്ളത്. ടെസ്റ്റ് ക്രിക്കറ്റിൽ ഏറ്റവും കൂടുതൽ റൺസ് നേടിയ താരങ്ങളുടെ പട്ടികയിൽ നാലാം സ്ഥാനത്താണ് റൂട്ട്. 37 സെഞ്ച്വറികളും 66 അർദ്ധ സെഞ്ച്വറികളും റൂട്ട് റെഡ് ബോൾ ക്രിക്കറ്റിൽ സ്വന്തമാക്കിയിട്ടുണ്ട്. 

നിലവിൽ നടന്നുകൊണ്ടിരിക്കുന്ന ഇന്ത്യക്കെതിരായ മൂന്നാം ടെസ്റ്റിൽ ഇംഗ്ലണ്ടിനായി സെഞ്ച്വറി നേടിയും റൂട്ട് തിളങ്ങിയിരുന്നു. 199 പന്തിൽ 104 റൺസ് നേടിയാണ് റൂട്ട് തിളങ്ങിയത്. 10 ഫോറുകൾ അടങ്ങുന്നതാണ് താരത്തിന്റെ ഇന്നിംഗ്സ്. തന്റെ ടെസ്റ്റ് കരിയറിലെ മുപ്പത്തി ഏഴാം സെഞ്ച്വറിയാണ് റൂട്ട് ലോർഡ്‌സിൽ നേടിയത്. ലോർഡ്‌സിൽ റൂട്ട് നേടുന്ന എട്ടാം സെഞ്ച്വറി ആണിത്. ഇതോടെ ടെസ്റ്റിൽ ഒരേ വേദോയിൽ ഏറ്റവും കൂടുതൽ സെഞ്ച്വറി നേടുന്ന താരങ്ങളുടെ പട്ടികയിൽ ഇടം നേടാനും റൂട്ടിന് സാധിച്ചു.

ഈ പട്ടികയിൽ നിലവിൽ മൂന്നാം സ്ഥാനത്താണ് റൂട്ട്. കൊളബോയിൽ എട്ട് സെഞ്ച്വറികൾ നേടിയ മുൻ ശ്രീലങ്കൻ താരം കുമാർ സംഗക്കാരയുടെ നേട്ടത്തിനൊപ്പമാണ് റൂട്ട് ഉള്ളത്. ഡോൺ ബ്രാഡ്മാൻ, ജാക് കാലിസ് എന്നിവരാണ് രണ്ടാം സ്ഥാനത്തുള്ളത്.

ഇരുവരും ഒമ്പത് തവണയാണ് ഒരേ വേദിയിൽ സെഞ്ച്വറികൾ നേടിയിട്ടുമുള്ളത്. ബ്രാഡ്മാൻ മെൽബണിലും കാലിസ് കേപ് ടൗണിലുമാണ് സെഞ്ച്വറികൾ നേടിയത്. മുൻ ലങ്കൻ താരം മഹേള ജയവർധനെയാണ്‌ പട്ടികയിലെ ഒന്നാമൻ. കൊളോമ്പോയിൽ 11 സെഞ്ച്വറികളാണ് ജയവർധനെ നേടിയത്.  

England Test captain Ben Stokes has named his England teammate Root as the goat of Test cricket. Ben Stokes praised Root ahead of the fourth Test against India.