തിരുപ്പൂര്‍: തമിഴ്‌നാട്ടില്‍ എംഎല്‍എയുടെ തോട്ടത്തില്‍ വച്ച് പൊലിസുകാരനെ വെട്ടിക്കൊന്നു. സ്‌പെഷ്യല്‍ എസ്‌ഐ ഷണ്മുഖസുന്ദരം ആണ് കൊല്ലപ്പെട്ടത്. തിരുപ്പൂരില്‍ ആണ് സംഭവം. എഐഎഡിഎംകെ എംഎല്‍എ മഹേന്ദ്രന്റെ തോട്ടത്തില്‍ വച്ചായിരുന്നു കൊലപാതകം നടന്നത്. തോട്ടത്തില്‍ ജോലി ചെയുന്ന അച്ഛനും മകനും തമ്മിലെ തര്‍ക്കം പരിഹരിക്കാന്‍ പോയതായിരുന്നു പൊലിസുകാരന്‍. നാലംഗ സംഘം ആണ് ആക്രമണത്തിന് പിന്നിലെന്നാണ് സൂചന. ഇന്നലെ രാത്രി പതിനൊന്നരയ്ക്കാണ് സംഭവം.

കണ്‍ട്രോള്‍ റൂമില്‍ നിന്നു ലഭിച്ച വിവരം അനുസരിച്ചാണ് പൊലിസുകാരന്‍ തോട്ടത്തിലെത്തിയത്. അങ്ങനെയാണ് പട്രോളിങ് ഡ്യൂട്ടിയിലുണ്ടായിരുന്ന ഷണ്മുഖസുന്ദരം സംഭവ സ്ഥലത്ത് എത്തിയത്. അച്ഛനും രണ്ട് ആണ്‍മക്കളും മറ്റൊരാളും ചേര്‍ന്നാണ് പൊലിസുകാരനെ കൊന്നത്. അച്ഛനും മകനും മദ്യപിച്ച് ബഹളമുണ്ടാക്കുന്നു എന്നായിരുന്നു കണ്‍ട്രോള്‍ റൂമില്‍ ലഭിച്ച വിവരം. ഇത് അന്വേഷിക്കാനെത്തിയ പൊലിസുകാരനെ ബഹളമുണ്ടാക്കിയവരും ബന്ധുക്കളും ചേര്‍ന്ന് കൊലപ്പെടുത്തിയ ശേഷം സംഭവ സ്ഥലത്ത് നിന്ന് രക്ഷപ്പെടുകയായിരുന്നു. ഇവര്‍ക്കായി അന്വേഷണം ഊര്‍ജ്ജിതമാക്കിയിട്ടുണ്ട്.