റിയാദ്: യുകെയിലെ കേംബ്രിജിൽ കുത്തേറ്റ് മരിച്ച 20 വയസ്സുകാരനായ സഊദി വിദ്യാർഥി മുഹമ്മദ് അൽ ഖാസിം മക്കയിലെ മസ്ജിദ് അൽ ഹറാമിൽ തീർഥാടകർക്കായി നിസ്വാർഥ സേവനം നടത്തിയ സന്നദ്ധപ്രവർത്തകനായിരുന്നുവെന്ന് ‘ഇൻസൈഡ് ദി ഹറമൈൻ’ എന്ന എക്സ് ഹാൻഡിൽ വെളിപ്പെടുത്തി. കഴിഞ്ഞ വെള്ളിയാഴ്ച രാത്രി കേംബ്രിജിലെ മിൽ പാർക്ക് പ്രദേശത്ത് വെച്ചാണ് അക്രമി അൽ ഖാസിമിനെ യാതൊരു പ്രകോപനവുമില്ലാതെ കുത്തിക്കൊലപ്പെടുത്തിയത്. സംഭവത്തിൽ ഒരു പ്രതി പിടിയിലായതായി പൊലീസ് അറിയിച്ചു.

കേംബ്രിഡ്ജ്ഷെയർ പൊലിസിന്റെ റിപ്പോർട്ട് പ്രകാരം, വെള്ളിയാഴ്ച അർധരാത്രിക്ക് തൊട്ടുമുമ്പാണ് മിൽ പാർക്കിന് സമീപം അക്രമം നടന്നത്. ഗുരുതര പരുക്കുകളോടെ കണ്ടെത്തിയ അൽ ഖാസിമിനെ രക്ഷിക്കാനുള്ള ശ്രമങ്ങൾ നടന്നിരുന്നു. എന്നാൽ എല്ലാ ശ്രമങ്ങളെയും വിഫലമാക്കിക്കൊണ്ട് ശനിയാഴ്ച പുലർച്ചെ 12:01ന് അൽ ഖാസിമിന്റെ മരണം സ്ഥിരീകരിക്കുകയായിരുന്നു. 10 ആഴ്ചത്തെ ഇംഗ്ലീഷ് ഭാഷാ പ്രോഗ്രാമിനായി കേംബ്രിജിലെ ഇ.എഫ് ഇന്റർനാഷണൽ ലാംഗ്വേജ് കാമ്പസിൽ ചേർന്നിരുന്ന അൽ ഖാസിം, ആക്രമണത്തിന് ഇരയാകുമ്പോൾ തന്റെ വസതിക്ക് സമീപമായിരുന്നു.

ALSO READ: തിങ്കളാഴ്ച രണ്ട് പേരുടെ വധശിക്ഷ നടപ്പാക്കി സഊദി അറേബ്യ; മൂന്ന് ദിവസത്തിനുള്ളിൽ രാജ്യം നടപ്പാക്കിയത് 17 പേരുടെ വധശിക്ഷ

മക്കയിലെ നിസ്വാർഥ സേവനം

മക്കയിലെ ഗ്രാൻഡ് മോസ്കിൽ വർഷങ്ങളോളം തീർഥാടകർക്ക് സേവനം ചെയ്ത അൽ ഖാസിമിന്റെ സമർപ്പണം ‘ഇൻസൈഡ് ദി ഹറമൈൻ’ അനുസ്മരിച്ചു. “ഹജ്ജ്, ഉംറ സീസണുകളിൽ പ്രായമായവരെ സഹായിക്കുകയും വഴിതെറ്റിയവർക്ക് മാർഗനിർദേശം നൽകുകയും ചെയ്ത അദ്ദേഹം, എല്ലാവർക്കും ആത്മീയമായ അനുഭവം ഉറപ്പാക്കി,” അവർ എക്സിൽ കുറിച്ചു. “മുഹമ്മദ് ശാന്തമായ സമർപ്പണത്തിന്റെയും ഹൃദയംഗമമായ സേവനത്തിന്റെയും മാതൃകയായിരുന്നു.” അവർ ഓർത്തെടുത്തു. അൽ ഖാസിമിന്റെ മൃതദേഹം സഊദി അറേബ്യയിലേക്ക് കൊണ്ടുവന്ന് മക്കയിൽ ഖബറടക്കും.

നിയമനടപടികൾ

സംഭവവുമായി ബന്ധപ്പെട്ട് 21 വയസ്സുള്ള ഒരു യുവാവിനെ കൊലപാതകത്തിനും പൊതുസ്ഥലത്ത് കത്തി കൈവശം വച്ചതിനും കേസെടുത്ത് അറസ്റ്റ് ചെയ്തതായി പൊലിസ് വ്യക്തമാക്കി. കുറ്റവാളിയെ സഹായിച്ചെന്ന് സംശയിക്കപ്പെടുന്ന 50 വയസ്സുള്ള മറ്റൊരു വ്യക്തിയും കസ്റ്റഡിയിലാണ്. മൂന്നാമത്തെ പ്രതി ഒളിവിലാണെന്നും അന്വേഷണം തുടരുകയാണെന്നും പൊലിസ് അറിയിച്ചു. തിങ്കളാഴ്ച പീറ്റർബറോ മജിസ്ട്രേറ്റ് കോടതിയിൽ പ്രതി ഹാജരായി. യുകെയിലെ സഊദി എംബസി, സംഭവത്തിൽ തുടർനടപടികൾ സ്വീകരിക്കുമെന്ന് അറിയിച്ചിട്ടുണ്ട്. 

Saudi student Mohammed Al-Qassim, known for his volunteer work in Mecca, was tragically stabbed to death in the UK. Tributes pour in for his dedication and kindness.