ഏതു വിഷയമെടുത്ത് ഹയർ സെക്കൻഡറി പൂർത്തിയാക്കിയവർക്കും വിപുലമായ ജോലി സാധ്യതകൾ വാഗ്ദാനം ചെയ്യുന്ന, ശ്രദ്ധേയമായ കരിയർ മേഖലയാണ് നിയമം. ജൂനിയർ അഭിഭാഷകൻ മുതൽ സുപ്രിംകോടതി ജഡ്ജി വരെ നീളുന്നതാണ് നിയമപഠനത്തിന്റെ സാധ്യതകൾ. അഭിഭാഷക വൃത്തിയെന്ന ഏകലക്ഷ്യത്തിൽ നിന്ന് മാറി എല്ലാമേഖലകളിലും തൊഴിൽ സാധ്യതകളുള്ള പഠന മേഖലയായി നിയമം മാറി. അഞ്ച് വർഷത്തെ ഇന്റഗ്രേറ്റഡ് എൽ.എൽ.ബി പ്രോഗ്രാമിനു പുറമെ ബിരുദ വിദ്യാർഥികൾക്കു ചേരാവുന്ന മൂന്ന് വർഷ എൽ.എൽ.ബി പ്രോഗ്രാമുകളുമുണ്ട്. എൽ.എൽ.ബിക്കു ശേഷം ഇന്ത്യയിലും വിദേശത്തുമുള്ള വിവിധ സ്ഥാപനങ്ങളിൽ വിവിധ സ്‌പെഷലൈസേഷനോടെ എൽ.എൽ.എം, പിഎച്ച്.ഡി പഠനങ്ങൾക്കും അവസരമുണ്ട്. കോർപറേറ്റ് ലോ, ഇന്റർനാഷനൽ ലോ, ഇന്റലക്ച്ചൽ പ്രോപ്പർട്ടി റൈറ്റ്‌സ് (IPR), ടാക്‌സേഷൻ, ആർബിട്രേഷൻ, മാരിടൈം ലോ, എൻവയോൺമെന്റൽ ലോ, കോൺസ്റ്റിറ്റിയൂഷനൽ ലോ, സൈബർ ലോ, ഫിനാൻഷ്യൽ ലോ, ഹ്യൂമൺ റൈറ്റ്‌സ് ലോ, ലേബർ ലോ തുടങ്ങി നിരവധി മികച്ച കരിയർ സാധ്യതകളുള്ള സ്‌പെഷ്യലൈസേഷനുകളുണ്ട്.

കോമൺ ലോ അഡ്മിഷൻ ടെസ്റ്റ് (CLAT)

ദേശീയ നിയമ സർവകലാശാലകളിൽ നിയമ പഠനത്തിനുള്ള പ്രവേശന പരീക്ഷയാണ് 'ക്ലാറ്റ്'. പഞ്ചവത്സര എൽ.എൽ.ബി പ്രവേശനത്തിന് 45 ശതമാനം മാർക്കോടെയുള്ള പ്ലസ്ടുവാണ് യോഗ്യത (പട്ടിക, ഭിന്നശേഷി വിഭാഗക്കാർക്ക് 40 ശതമാനം) . ഇപ്പോൾ പ്ലസ് ടു പഠിക്കുന്നവർക്കും അപേക്ഷിക്കാം. കൊച്ചിയിലെ നുവാൽസ് (NUALS) അടക്കം 26 നിയമ സർവകലാശാലകളിലേക്കാണ് പ്രവേശനം. നുവാൽസിൽ ബി.എ എൽ.എൽ.ബിയും മറ്റു സർവകലാശാലകളിൽ ബി.എ/ബി.കോം/ബി.ബി.എ/ബി.എസ്.സി/ ബി.എസ്.ഡബ്ല്യു. എൽ.എൽ.ബി (ഓണേഴ്‌സ്) പ്രോഗ്രാമുകളും പഠിക്കാവുന്നതാണ്. ദേശീയ നിയമ സർവകലാശാലകളുടെ കൺസോർഷ്യമാണ് പരീക്ഷ നടത്തുന്നത്. ക്ലാറ്റ് പരീക്ഷക്ക് (CLAT 2026) ഒക്ടോബർ 31 വരെ

ഓൺലൈനായി അപേക്ഷിക്കാം. ഡിസംബർ ഏഴിനാണ് പരീക്ഷ. രണ്ടു മണിക്കൂർ ദൈർഘ്യമുള്ള ഓഫ് ലൈൻ പരീക്ഷയാണ്. 120 മൾട്ടിപ്പിൾ ചോയ്‌സ് ചോദ്യങ്ങൾ. ശരിയുത്തരത്തിന് ഒരു മാർക്ക്. ഉത്തരം തെറ്റിയാൽ 0.25 മാർക്ക് കുറയും. കേരളത്തിലും പരീക്ഷയെഴുതാം. 4000 രൂപയാണ് അപേക്ഷാ ഫീസ്. പട്ടിക, ഭിന്നശേഷി, ബി.പി.എൽ വിഭാഗക്കാർക്ക് 3500 രൂപ മതി. ഐ.ഐ.എം റോത്തക്ക്, നാഷനൽ ഫോറൻസിക് സയൻസ് യൂനിവേഴ്‌സിറ്റി (ഡൽഹി കാംപസ്), മഹാരാഷ്ട്ര നാഷനൽ ലോ യൂനിവേഴ്‌സിറ്റി നാഗ്പൂർ, സേവിയർ ലോ സ്‌കൂൾ ഭുവനേശ്വർ, രാമയ്യ ഇൻസ്റ്റിറ്റ്യൂട്ട് ഓഫ് ലീഗൽ സ്റ്റഡീസ് ബെംഗളൂരു, ഏഷ്യൻ ലോ കോളജ് നോയിഡ, നർസി മോൻജി ഇൻസ്റ്റിറ്റ്യൂട്ട് ബെംഗളൂരു, നിർമ യൂനിവേഴ്‌സിറ്റി അഹമ്മദാബാദ് തുടങ്ങിയ സ്ഥാപനങ്ങളും വിവിധ പ്രോഗ്രാമുകൾക്ക് ക്ലാറ്റ് സ്‌കോർ പരിഗണിക്കാറുണ്ട്. 50 ശതമാനം മാർക്കോടു കൂടി (പട്ടിക, ഭിന്നശേഷി വിഭാഗക്കാർക്ക് 45 ശതമാനം) എൽ.എൽ.ബി വിജയിച്ചവർക്ക് ഒരു വർഷ എൽ.എൽ.എം പ്രവേശനത്തിനും അപേക്ഷിക്കാം വെബ്‌സൈറ്റ്: consortiumofnlus.ac.in 

ഓൾ ഇന്ത്യ ലോ എൻട്രസ് ടെസ്റ്റ് (AILET)

ന്യൂഡൽഹിയിലുള്ള ദേശീയ നിയമ സർവകലാശാലയിൽ അഞ്ചു വർഷ നിയമ ബിരുദ പ്രോഗ്രാമായ ബി.എ എൽ.എൽ.ബി (ഓണേഴ്‌സ്) പ്രോഗ്രാമിനുള്ള പ്രവേശന പരീക്ഷയാണ് 'ഐലറ്റ്'. 45 ശതമാനം മാർക്കോടെയുള്ള പ്ലസ്ടുവാണ് യോഗ്യത. നിയമ ബിരുദ പഠനം പൂർത്തിയാക്കിയവർക്ക് എൽ.എൽ.എം പ്രോഗ്രാമിനും 'ഐലറ്റ് 'വഴി പ്രവേശനം നേടാം. വെബ്‌സൈറ്റ്: www.nludelhi.ac.in. 

ALSO READ: ശുചിത്വ മിഷനില്‍ പ്രോഗ്രാം ഓഫീസര്‍; അരലക്ഷത്തിനടുത്ത് ശമ്പളം; അപേക്ഷ ആഗസ്റ്റ് 19 വരെ 

കേരളത്തിൽ പഠിക്കാം

നാല് സർക്കാർ ലോ കോളജുകളിലും (തിരുവനന്തപുരം, കോഴിക്കോട്, എറണാകുളം, തൃശൂർ) മറ്റു സ്വകാര്യ ലോ കോളജുകളിലും കേരള ലോ എൻട്രൻസ് പരീക്ഷ വഴി അഞ്ച് വർഷ എൽ.എൽ.ബി പ്രോഗ്രാമുകൾ പഠിക്കാം. ബി.എ/ബി.കോം/ബി.ബി.എ എൽ.എൽ.ബി പ്രോഗ്രാമുകളുണ്ട്. 45 ശതമാനം മാർക്കോടെയുള്ള പ്ലസ്ടു വിജയമാണ് പ്രവേശന യോഗ്യത. ബിരുദം കഴിഞ്ഞവർക്ക് ത്രിവത്സര പ്രോഗ്രാമുകളുമുണ്ട്. വെബ്‌സൈറ്റ്: cee.kerala.gov.in.

കൊച്ചി ശാസ്ത്ര സർവകലാശാലയുടെ (CUSAT) കീഴിൽ സ്‌കൂൾ ഓഫ് ലീഗൽ സ്റ്റഡീസിൽ അഞ്ച് വർഷ ബി.ബി.എ/ബി.കോം എൽ.എൽ.ബി (ഓണേഴ്‌സ് ) ,ബി.എസ്.സി എൽ.എൽ.ബി (ഓണേഴ്‌സ്) കംപ്യൂട്ടർ സയൻസ് പ്രോഗ്രാമുകളുണ്ട്. സർവകലാശാല നടത്തുന്ന കോമൺ അഡ്മിഷൻ ടെസ്റ്റ് (CAT ) അടിസ്ഥാനമാക്കിയാണ് പ്രവേശനം. വെബ്‌സൈറ്റ്: admissions.cusat.ac.in. 

അലിഗഡ് യൂനിവേഴ്‌സിറ്റിയുടെ മലപ്പുറം കാംപസിൽ അഞ്ചു വർഷ ബി.എ എൽ.എൽ.ബി പ്രോഗ്രാമുണ്ട്. മഹാത്മാ ഗാന്ധി സർവകലാശാലയ്ക്കു കീഴിൽ സ്‌കൂൾ ഓഫ് ഇന്ത്യൻ ലീഗൽ തോട്ട് , കണ്ണൂർ സർവകലാശാലയിലെ സ്‌കൂൾ ഓഫ് ലീഗൽ സ്റ്റഡീസ്, കേരള ലോ അക്കാദമി തിരുവനന്തപുരം എന്നിവിടങ്ങളിലും പഠനാവസരങ്ങളുണ്ട്.

എവിടെയൊക്കെ പഠിക്കാം
രാജ്യത്തെ വിവിധ സർവകലാശാലകളിൽ സി.യു.ഇ.ടി (യു.ജി) അടക്കം വ്യത്യസ്തമായ പ്രവേശന പരീക്ഷകൾ വഴി നിയമ പഠനം നടത്താൻ അവസരമുണ്ട്. അലിഗഡ് മുസ്്‌ലിം സർവകലാശാല, ബനാറസ് ഹിന്ദു സർവകലാശാല, ജാമിഅ മില്ലിയ്യ ഇസ്്‌ലാമിയ്യ, സൗത്ത് ബിഹാർ സെൻട്രൽ സർവകലാശാല, ഗവൺമെന്റ് ലോ കോളജ് മുംബൈ, ഡോ. ബി.ആർ അംബേദ്കർ ലോ കോളജ് വിശാഖപട്ടണം, ക്രൈസ്റ്റ് സർവകലാശാല, ലവ് ലി പ്രൊഫഷനൽ സർവകലാശാല, ജിൻഡാൽ ലോ സ്‌കൂൾ, സിംബയോസിസ് ലോ സ്‌കൂൾ, ലക്‌നൗ സർവകലാശാല തുടങ്ങിയവ ഉദാഹരണങ്ങളാണ്.

ലോ സ്‌കൂൾ അഡ്മിഷൻ ടെസ്റ്റ് (LSAT) പോലുള്ള പരീക്ഷകൾ വഴി വിദേശ രാജ്യങ്ങളിലെ മികച്ച സർവകലാശാലകളിലും നിയമ പഠനം നടത്താം. (www.lsac.org)

തൊഴിലവസരങ്ങൾ നിരവധി

സർക്കാർ സർവിസുകൾ, പൊതുമേഖലാ സ്ഥാപനങ്ങൾ, വ്യവസായ വാണിജ്യ ധനകാര്യ സ്ഥാപനങ്ങൾ, പബ്ലിക് പ്രോസിക്യൂഷൻ, മീഡിയ, ജുഡിഷ്യൽ സർവിസ്, ടാക്‌സ് കൺസൾട്ടൻസി, നോട്ടറി, ആർബിട്രേഷൻ, പാരാലീഗൽ സർവിസ്, ലീഗൽ പ്രോസസ്സ് ഔട്ട്‌സോഴ്‌സിങ് (LPO), ഇൻഷൂറൻസ്, ഇന്റലക്ചൽ പ്രോപ്പർട്ടി റൈറ്റ്‌സ് (IPR), നിയമ വിശകലനം, ലീഗൽ ജേർണലിസം, ലീഗൽ കോൺട്രാക്റ്റുകളുടെ ഡ്രാഫ്റ്റിങ്, ഫാമിലി കൗൺസലിങ് തുടങ്ങി മേഖലകളിൽ വിശാലമായ തൊഴിലവസരങ്ങളുണ്ട്. ഇന്റർനാഷനൽ ഓർഗനൈസേഷനുകൾ, കൺസ്യൂമർ ഫോറങ്ങൾ, ലോകായുക്ത, എൻ.ജി.ഒകൾ, റെയിൽവേ, എൻ.ഐ.എ, സി.ബി.ഐ, പാർലമെന്റ് തുടങ്ങിയ മേഖലകളിലും ജോലി സാധ്യതകളുണ്ട്.

നിയമ ബിരുദത്തോടൊപ്പം എം.ബി.എ കമ്പനി സെക്രട്ടറിഷിപ്പ്, എം.സ്.ഡബ്ല്യു പോലുള്ള അധിക യോഗ്യതകൾ നേടുന്നവർക്ക് കോർപറേറ്റ് മേഖലയിൽ മികച്ച അവസരങ്ങളുണ്ട്. സിവിൽ സർവിസ് മേഖലയിലേക്ക് പ്രവേശിക്കാനാഗ്രഹിക്കുന്ന വിദ്യാർഥികൾക്ക് തിരഞ്ഞെടുക്കാവുന്ന മികച്ച ബിരുദ കോഴ്‌സുകളിലൊന്നാണ് എൽ.എൽ.ബി. വിവിധ നിയമ കലാലയങ്ങളിൽ അധ്യാപകരായും ജോലി സാധ്യതയുണ്ട്. ബിരുദാനന്തര ബിരുദം പൂർത്തിയാക്കിയ ശേഷം യു.ജി.സിയുടെ നാഷനൽ എലിജിബിലിറ്റി ടെസ്റ്റ് കൂടി വിജയിച്ചാൽ മതി. റിസർച്ച് മേഖലകളിലും അവസരങ്ങളുണ്ട്. കേരള ഹൈക്കോടതി നടത്തുന്ന മുൻസിഫ്/ മജിസ്‌ട്രേറ്റ് പരീക്ഷ വഴി നേരിട്ട് ജഡ്ജിയാകാൻ അവസരമുണ്ട്. ഐ.ബി.പി.എസ് (IBPS) നടത്തുന്ന സ്‌പെഷലിസ്റ്റ് ഓഫിസർ (SO) പരീക്ഷ വഴി ലോ ഓഫിസർ തസ്‌കിതയിലെത്താം. ബാർ കൗൺസിലിൽ എൻറോൾ ചെയ്ത ശേഷം സുപ്രിംകോടതി, ഹൈക്കോടതി, കീഴ്‌ക്കോടതി എന്നിവിടങ്ങളിൽ വക്കീലായി പ്രാക്ടീസ് ചെയ്യാം. ലീഗൽ പ്രാക്ടീസിന് പ്രായ പരിധിയില്ല. വക്കീലായി മൂന്ന് വർഷത്തെ പരിചയമുണ്ടെങ്കിൽ ആർ.ബി.ഐ, എസ്.ബി.ഐ എന്നിവിടങ്ങളിലെ ലീഗൽ തസ്തികളിൽ അപേക്ഷിക്കാം. സീനിയർ അഡ്വക്കേറ്റായി പ്രവർത്തിക്കുന്നവർക്ക് സർക്കാറിന്റെ പല കമ്മിഷനുകൾക്കും നേതൃത്വം നൽകാം. വിവിധ സർക്കാർ വകുപ്പുകളിൽ നിയമ ബിരുദധാരികൾക്ക് മുൻഗണനയുണ്ട്. സ്ഥാനക്കയറ്റത്തിനുള്ള അധിക യോഗ്യതയായും നിയമ ബിരുദം പരിഗണിക്കാറുണ്ട്. നമ്മുടെ സേനാ വിഭാഗങ്ങളിൽ ജഡ്ജ് അഡ്വക്കേറ്റ് ജനറൽ (JAG) തസ്തികയിലേക്കുള്ള അടിസ്ഥാന യോഗ്യത 55 ശതമാനത്തോടെയുള്ള നിയമ ബിരുദമാണ്. സർവിസ് സെലക്ഷൻ ബോർഡ് (SSB) ഇന്റർവ്യൂവിന്റെ അടിസ്ഥാനത്തിലായിരിക്കും നിയമനം.

കൂടുതൽ ​ജോലിയൊഴിവുകൾക്ക് ​ഗ്രൂപ്പിൽ ജോയിൻ ചെയ്യുക