ഒരു ദിവസം ആരംഭിക്കാന്‍ ഏറ്റവും നല്ല സ്ഥലമാണ് മലപ്പുറത്തെ വിനോദസഞ്ചാര കേന്ദ്രമായ കോട്ടക്കുന്ന്. നഗരത്തിന്റെ ഹൃദയഭാഗത്തായി സ്ഥിതി ചെയ്യുന്ന കോട്ടക്കുന്ന് ജില്ലയിലെ ഏറ്റവും പ്രശസ്തമായ പിക്നിക് സ്ഥലങ്ങളില്‍ ഒന്നാണ്. കോട്ടയുള്ള മല എന്നര്‍ത്ഥം വരുന്ന കോട്ടക്കുന്ന് നിരവധി ബ്രിട്ടീഷ് വിരുദ്ധ സമരങ്ങള്‍ക്ക് സാക്ഷ്യം വഹിച്ച ചരിത്ര പ്രാധാന്യമുള്ള പ്രദേശമാണ്.  

ബ്രിട്ടീഷുകാരോട് പോരാടിയതിന് വാരിയം കുന്നത്ത് കുഞ്ഞഹമ്മദ് ഹാജി വെടിയേറ്റു മരിച്ചത് ഇവിടെയാണ്. പഴയ കോട്ടയുടെ അവശിഷ്ടങ്ങള്‍ക്ക് പേരുകേട്ട കോട്ടക്കുന്ന് കോഴിക്കോട് സാമൂതിരിമാരുടെ വകയായിരുന്നു. കോട്ടയ്ക്കുള്ളില്‍ വേട്ടക്കൊരുമകന്‍, ശിവക്ഷേത്രം തുടങ്ങിയ സ്മാരകങ്ങളും കാണാം. കോട്ടക്കുന്നില്‍ ആകര്‍ഷകമായ പൂന്തോട്ടമുണ്ട്, കൂടാതെ മുതിര്‍ന്നവര്‍ക്കും കുട്ടികള്‍ക്കും ഇഷ്ടപ്പെടുന്ന വൈവിധ്യമാര്‍ന്ന ആകര്‍ഷണങ്ങളും പ്രവര്‍ത്തനങ്ങളും ഉണ്ട്.  

കുട്ടികളുടെ പാര്‍ക്ക്, അഡ്വഞ്ചര്‍ പാര്‍ക്ക്, സൈക്കിള്‍ ട്രാക്ക്, അരങ്ങ് ഓപ്പണ്‍ എയര്‍ ഓഡിറ്റോറിയം, 12 ഡി തിയേറ്റര്‍, ബലൂണ്‍ പാര്‍ക്ക്, ഫണ്‍പാര്‍ക്ക്, ബമ്പര്‍ പാര്‍ക്ക് എന്നിവ കോട്ടക്കുന്നിലെ ആകര്‍ഷണങ്ങളാണ്. കൂടാതെ, പാര്‍ക്കില്‍ 30 ലധികം റൈഡുകളുമുണ്ട്. അതിനാല്‍ കുട്ടികള്‍ക്ക് ഇവിടെ ആഘോഷമാക്കാം. വാരാന്ത്യങ്ങളിലും ഉത്സവ ദിവസങ്ങളിലും ഒരു സംഗീത ജലധാരയും ലേസര്‍ ഷോയുമാണ് ആകര്‍ഷണങ്ങള്‍. മിറാക്കിള്‍ ഗാര്‍ഡനാണ് കോട്ടക്കുന്നിലെ മറ്റൊരു കാഴ്ച. പൂക്കളും പൂമ്പാറ്റകളും മരമനുഷ്യനും മരുഭൂമിയുമെല്ലാം ഒരുക്കിയ കോട്ടക്കുന്നില്‍ കുടിലും റേഷന്‍കടയും ഗ്രന്ഥശാലയും മരത്തണലത്ത് കട്ടന്‍ കുടിക്കുന്ന ബഷീറുമൊക്കെയായി ഗൃഹാതുരത്വമുണര്‍ത്തുന്ന ഓര്‍മകളാണ് ഈ കോട്ടക്കുന്ന്.