ദുബൈ: ദുബൈ അന്താരാഷ്ട്ര വിമാനത്താവളത്തിൽ യാത്രക്കാരുടെ പ്രവേശനത്തിനായി എ.ഐ പവേഡ് പാസഞ്ചർ കോറിഡോർ സേവനം ആരംഭിക്കുന്നു. ജനറൽ ഡയരക്ടറേറ്റ് ഓഫ് ഐഡന്റിറ്റി ആൻഡ് ഫോറീനേഴ്‌സ് അഫയേഴ്‌സ് (ജി.ഡി.ആർ.എഫ്.എ) ഡയരക്ടർ ജനറൽ ലഫ്.ജനറൽ മുഹമ്മദ് അഹമ്മദ് അൽ മർറിയാണ് ഇതുസംബന്ധിച്ച പ്രഖ്യാപനം നടത്തിയത്.

യാത്രക്കാർക്ക് നിമിഷങ്ങൾക്കുള്ളിൽ 'റെഡ് കാർപെറ്റ്' കടന്ന് പാസ്സേജ് വേ മുറിച്ചുകടന്ന് യാത്ര ആരംഭിക്കാം. യാത്രാ രേഖകളൊന്നും തന്നെ ഹാജരാക്കാതെ പാസ്‌പോർട്ട് കൺട്രോൾ പോയിന്റുകൾ മറികടക്കാൻ ഈ പാസഞ്ചർ കോറിഡോർ യാത്രക്കാരെ അനുവദിക്കും. പരമ്പരാഗത നടപടിക്രമങ്ങളിലൂടെ ഒരു യാത്രക്കാരന് മാത്രം കടന്നുപോകാൻ സാധിക്കുന്നിടത്ത് ഇവിടെ ഒരേ സമയം 10 പേർക്ക് വരെ പ്രവേശിക്കാനാകും.

ലോകത്തിലെ ഏറ്റവും തിരക്കേറിയ വിമാനത്താവളങ്ങളിലൊന്നായി ദുബൈ എയർപോർട്ട് തുടർച്ചയായ 11ാം വർഷവും മുന്നേറുന്ന ഘട്ടത്തിലെ ഈ നേട്ടം എടുത്തുപറയേണ്ടതാണ്. ഇത് കേവലമൊരു ട്രാൻസിറ്റ് പോയിന്റ് മാത്രമല്ലെന്ന് അഭിപ്രായപ്പെട്ട അൽ മർറി, യു.എ.ഇയുടെ ഊർജസ്വലമായ കവാടവും അഭിമാനകരമായ നേട്ടവുമാണിതെന്ന് വ്യക്തമാക്കി. ദശലക്ഷക്കണക്കിന് ആളുകൾ വ്യത്യസ്ത ഭൂഖണ്ഡങ്ങളിലേക്ക് ദുബൈയിലൂടെ സഞ്ചരിക്കുന്നു. ലോകത്തിലെ ഇത്തരത്തിലുള്ള ആദ്യത്തേതാണിതെന്നും 'അതിർത്തികളില്ലാത്ത യാത്ര' എന്ന അനുഭവം യാത്രക്കാരുടെ കൈയെത്തും ദൂരത്ത് എത്തിക്കുന്ന സംയോജിത സംവിധാനത്തിന്റെ ഭാഗമാണിതെന്നും അദ്ദേഹം അവകാശപ്പെട്ടു.

ഉന്നത നിലവാരത്തിലുള്ള സുരക്ഷ നിലനിർത്തി സുഗമ ഗതാഗതം ഉറപ്പാക്കാൻ അത്യാധുനിക സാങ്കേതിക വിദ്യകളുടെ സംയോജനത്തെ അടിസ്ഥാനമാക്കിയുള്ള ദീർഘകാല പദ്ധതിയനുസരിച്ചാണ് ജി.ഡി.ആർ.എഫ്.എ പ്രവർത്തിക്കുന്നതെന്നും അദ്ദേഹം വിശദീകരിച്ചു. നിർമിത ബുദ്ധി ഉപയോഗിച്ച് പാസ്‌പോർട്ട് പരിശോധനകൾ പൂർണമായും യാന്ത്രികമായതിനാൽ, ഭാവിയിൽ പരമ്പരാഗത രേഖകൾ ക്രമേണ ഉപേക്ഷിക്കേണ്ടി വരും. സംശയാസ്പദമായ ഏതൊരു പാസ്‌പോർട്ടും നേരിട്ട് വ്യാജരേഖാ വിദഗ്ധർക്ക് ഈ സംവിധാനങ്ങൾ റഫർ ചെയ്യുന്നു. ചെക്ക്‌ പോസ്റ്റുകളിൽ എത്തുന്നതിനുമുമ്പ് വിമാനത്താവള സംവിധാനങ്ങൾ യാത്രക്കാരുടെ ഡാറ്റ തിരിച്ചറിയുമെന്നും നടപടിക്രമങ്ങൾ വേഗത്തിലാക്കുമെന്നും അദ്ദേഹം പറഞ്ഞു. 10 യാത്രക്കാരെ ഒരേസമയം പ്രോസസ് ചെയ്യാൻ സംവിധാനത്തിലൂടെ കഴിയുമെന്നും അദ്ദേഹം പറഞ്ഞു.

ഈ നൂതനാശയ നടത്തിപ്പ് ദിവസവും വിമാനത്താവളത്തിലൂടെ കടന്നുപോകുന്ന ദശലക്ഷക്കണക്കിന് സന്ദർശകർക്ക് ഒരു പരിഷ്കൃത നഗരമെന്ന നിലയിലുള്ള ദുബൈയുടെ പ്രശസ്തി വർധിപ്പിക്കുന്നതാണ്. ദുബൈ അന്താരാഷ്ട്ര വിമാനത്താവളത്തിന്റെ പുതിയ എ.ഐ നിയന്ത്രിത ഇടനാഴിയോട് നിരവധി യാത്രക്കാർ ഇതിനകം മതിപ്പു പ്രകടിപ്പിച്ചു കഴിഞ്ഞിട്ടുണ്ട്.

ALSO READ: ഖാലിദ് ജമീലിന്റെ പ്രഥമ പരീക്ഷ കാഫ നാഷന്‍സ് കപ്പ്; ഞെട്ടിച്ച് ആദ്യ ടീം സെലക്ഷന്‍

Dubai Airport (DXB) is now home to an AI-powered corridor, allowing multiple travellers to pass through immigration controls within seconds. This service allows up to 10 people to pass through at the same time, without having to stop or present identification documents.