കൊച്ചി: എറണാകുളം കോട്ടുവള്ളിയിൽ വട്ടിപ്പലിശക്കാരുടെ നിരന്തര ഭീഷണിയെ തുടർന്ന് വീട്ടമ്മ ആത്മഹത്യ ചെയ്തു. കോട്ടുവള്ളി സ്വദേശിനി ആശ ബെന്നി (42) ആണ് മരിച്ചത്. ഇന്ന് ഉച്ച മുതൽ വീട്ടിൽ നിന്ന് ആശയെ കാണാതാവുകയായിരുന്നു. തുടർന്ന് നടത്തിയ അന്വേഷണത്തിൽ  സമീപത്തെ പുഴയിൽ നിന്ന് ആശയുടെ മൃതദേഹം കണ്ടെത്തുകയായിരുന്നു. 

പ്രദേശവാസിയായ റിട്ടയേർഡ് പൊലിസ് ഉദ്യോഗസ്ഥന്റെ ഭാര്യയിൽ നിന്ന് ആശ വട്ടിപ്പലിശയ്ക്ക് പണം വാങ്ങിയിരുന്നു. പത്ത് ലക്ഷത്തോളമാണ് പല തവണകളായി പലിശയ്ക്ക് ആശ പണം വാങ്ങിയിരുന്നത്. എന്നാൽ മുതലും പലിശയും പൂർണമായി തിരിച്ചടച്ചെങ്കിലും പൊലിസ് ഉദ്യോ​ഗസ്ഥനും സംഘവും ഭീഷണി മുഴക്കുകയായിരുന്നുവെന്ന് ആശയുടെ ആത്മഹത്യാക്കുറിപ്പിൽ പറയുന്നുണ്ട്. ഇതിൽ മനംനൊന്തായിരിക്കാം ആശ ജീവനൊടുക്കിയതെന്ന് കുടുംബം ആരോപിക്കുന്നത്. സംഭവത്തിൽ അസ്വാഭാവിക മരണത്തിന് പൊലിസ് കേസെടുത്തിട്ടുണ്ട്.

ALSO READ: എല്ലാവർക്കും സുരക്ഷ: കുറഞ്ഞ വിലയിലുള്ള വോൾവോ വരുന്നു; പക്ഷെ മീറ്റർ കോൺസോൾ ഇല്ല

ഇന്നലെ, വട്ടിപ്പലിശക്കാർക്കെതിരെ ആശ ആലുവ റൂറൽ എസ്.പി.ക്ക് പരാതി നൽകിയിരുന്നു. പരാതിയെ തുടർന്ന് പറവൂർ പൊലിസ് ഇരുകൂട്ടരെയും സ്റ്റേഷനിലേക്ക് വിളിപ്പിച്ചിരുന്നു. എന്നാൽ, അതിനുശേഷം രാത്രി ഉദ്യോ​ഗസ്ഥനും സംഘവും വീണ്ടും ആശയുടെ വീട്ടിലെത്തി ഭീഷണി മുഴക്കിയതായാണ് കുടുംബം പറയുന്നത്.

ആശയുടെ ആത്മഹത്യാക്കുറിപ്പിൽ റിട്ടയേർഡ് പൊലിസ് ഉദ്യോഗസ്ഥനായ പ്രദീപ് എന്നയാളെയും ഭാര്യ ബിന്ദുവിന്റെയും പേര് പരാമർശിക്കുന്നുണ്ട്. മൃതദേഹം ആശുപത്രിയിലേക്ക് മാറ്റി. പോസ്റ്റ്‌മോർട്ടത്തിന് ശേഷം മൃതദേഹം ബന്ധുക്കൾക്ക് വിട്ടുനൽകും.

ALSO READ: കോഴിക്കോട് ഓടിക്കൊണ്ടിരുന്ന കാറിന് തീപിടിച്ചു; യാത്രക്കാർ രക്ഷപ്പെട്ടത് തലനാരിഴയ്ക്ക്; തുടരെ റെനോയുടെ ഡസ്റ്റർ കാർ തീപിടിക്കുന്നതിന് പിന്നിലെ കാരണമെന്ത് ?

( കുറിപ്പ്: ആത്മഹത്യ ഒരു പരിഹാരമല്ല. മാനസിക പിന്തുണ തേടുക. 'ദിശ' ഹെൽപ്‌ലൈൻ നമ്പറുകൾ: 1056, 0471-2552056 )

In Kochi, Asha Benny, a 42-year-old housewife, took her life by jumping into a river after alleged threats from a retired police officer's wife, who lent her money at high interest. Despite repaying the loan and interest, the threats continued, as mentioned in Asha's suicide note