തിരുവനന്തപുരം: എഡിജിപി എം.ആർ. അജിത്കുമാറിനും പി. ശശിക്കും എതിരായ വിജിലൻസ് കോടതി വിധിയിൽ പ്രതികരിച്ച് കെപിസിസി അധ്യക്ഷൻ സണ്ണി ജോസഫ്. അഴിമതി കേസിലെ പ്രതികളെ സംരക്ഷിക്കാൻ മുഖ്യമന്ത്രി സ്വീകരിച്ച നടപടികൾ സത്യപ്രതിജ്ഞാ ലംഘനമാണെന്നും അദ്ദേഹം ആരോപിച്ചു. മുഖ്യമന്ത്രി പിണറായി വിജയൻ രാജിവയ്ക്കണമെന്നും കെപിസിസി അധ്യക്ഷൻ സണ്ണി ജോസഫ് ആവശ്യപ്പെട്ടു.  സർക്കാർ നടപടികൾ അഴിമതി കേസിലെ പ്രതികളെ സംരക്ഷിക്കാൻ ലക്ഷ്യമിട്ടുള്ളതാണെന്നും, ഇതിന്റെ ഉത്തരവാദിത്തം മുഖ്യമന്ത്രി ഏറ്റെടുക്കണമെന്നും അദ്ദേഹം ആവശ്യപ്പെട്ടു. "ഒരു മുഖ്യമന്ത്രിക്ക് ഇതുവരെ ലഭിക്കാത്ത വിധത്തിലുള്ള ഗുരുതര പരാമർശമാണ് വിജിലൻസ് കോടതിയിൽ നിന്നുണ്ടായത്," സണ്ണി ജോസഫ് ചൂണ്ടിക്കാട്ടി.

വിജിലൻസ് കോടതിയുടെ ഗുരുതര പരാമർശങ്ങൾ സർക്കാരിന്റെ അഴിമതി സംരക്ഷണ നിലപാടിനെ തുറന്നുകാട്ടുന്നതാണെന്ന് സണ്ണി ജോസഫ് പറഞ്ഞു. "നിയമത്തിന്റെ എല്ലാ ചട്ടങ്ങളും ചവിട്ടിമെതിക്കപ്പെട്ടിരിക്കുന്നു എന്നാണ് കോടതി വ്യക്തമാക്കിയത്. ഇതിന്റെ പശ്ചാത്തലത്തിൽ മുഖ്യമന്ത്രിയും സിപിഐഎമ്മും മൗനം പാലിക്കുകയാണ്," അദ്ദേഹം കുറ്റപ്പെടുത്തി.

കത്ത് ചോർന്ന സംഭവത്തിലും സണ്ണി ജോസഫ് രൂക്ഷ വിമർശനം ഉന്നയിച്ചു. സിപിഐഎം നേതൃത്വം ഈ വിഷയത്തിൽ ദീർഘനാളായി മൗനം പാലിക്കുകയാണെന്ന് അദ്ദേഹം ആരോപിച്ചു. "സർക്കാരിലേക്ക് വന്ന പണം സിപിഐഎം നേതാക്കൾ ദുരുപയോഗം ചെയ്തിട്ടുണ്ട്. പാർട്ടിക്കകത്തെ തർക്കങ്ങൾ എന്തുതന്നെയായാലും, ഈ വിഷയത്തിൽ ഗൗരവമായ അന്വേഷണം നടത്തി നടപടി സ്വീകരിക്കണം," അദ്ദേഹം ആവശ്യപ്പെട്ടു.

കടക്കലിൽ കോൺഗ്രസിന്റെ പൊതുയോഗത്തിനിടെ ഉണ്ടായ ആക്രമണത്തിലും സണ്ണി ജോസഫ് സർക്കാരിനെതിരെ ആഞ്ഞടിച്ചു. "സിപിഐഎം ക്രിമിനലുകൾ പൊലിസിന്റെ ഒത്താശയോടെ കോൺഗ്രസ് പ്രവർത്തകരെ പ്രകോപനമില്ലാതെ ആക്രമിക്കുകയാണ്. പൊലിസ് സിപിഐഎം ക്രിമിനലുകളെ സഹായിക്കുന്ന നിലപാടാണ് സ്വീകരിക്കുന്നത്," അദ്ദേഹം ആരോപിച്ചു.

നിഷ്പക്ഷമായ അന്വേഷണം നടക്കുന്നില്ലെന്നും, പൊലിസിന്റെ നിലപാട് പ്രതിഷേധാർഹമാണെന്നും അദ്ദേഹം പറഞ്ഞു. "മുഖ്യമന്ത്രിയുടെ ഒത്താശയോടെയാണ് ക്രിമിനൽ സംഘങ്ങൾ കേരളത്തിന്റെ പല ഭാഗങ്ങളിലും അഴിഞ്ഞാടുന്നത്. ജനങ്ങളുടെ ജീവനും സ്വത്തിനും സംരക്ഷണം നൽകാൻ പൊലിസ് തയ്യാറാവണം," സണ്ണി ജോസഫ് ആവശ്യപ്പെട്ടു.

KPCC leader Sunny Joseph demands the Chief Minister's resignation, alleging that actions to protect the accused in a corruption case, as noted in a vigilance court verdict, violate the oath of office. He criticized the government for shielding culprits and called for a serious investigation into related issues, including attacks on Congress workers