കൊച്ചി: ഐടി ജീവനക്കാരനെ തട്ടിക്കൊണ്ടുപോയി മര്‍ദ്ദിച്ച കേസില്‍ സിനിമാ താരത്തിനെതിരെ കേസ്. തെന്നിന്ത്യൻ നായികയായ ലക്ഷ്മി മേനോനും മറ്റു മൂന്നുപേർക്കുമെതിരെയാണ് കേസെടുത്തത്. മൂന്ന് പേരെ അറസ്റ്റ് ചെയ്തു. നടി ഒളിവിലാണെന്നാണ് സൂചന. കേസിൽ മൂന്നാം പ്രതിയായാണ് ഇവരെ പ്രതിചേർത്തത്. നടിക്കൊപ്പം മിഥുൻ, അനീഷ്, സോന മോള്‍ എന്നിവരാണ് മറ്റുള്ള പ്രതികൾ.

ബാറിൽ വച്ചുണ്ടായ തർക്കത്തെ തുടർന്ന് ഐടി ജീവനക്കാരനെ തട്ടിക്കൊണ്ടുപോയി മർദ്ദിച്ചു എന്നാണ് കേസ്. 25 നാണ് സംഭവം. ആലുവ സ്വദേശി അലിയാർ ഷാ സലീമാണു തന്നെ കടത്തിക്കൊണ്ടുപോയി മർദിച്ചെന്ന് പൊലിസിൽ പരാതി നൽകിയിരിക്കുന്നത്. തട്ടിക്കൊണ്ടു പോയ സംഘത്തില്‍ നടി ലക്ഷ്മി മേനോനും ഉണ്ടായിരുന്നെന്ന പരാതിക്കാരന്റെ മൊഴിയുടെ അടിസ്ഥാനത്തിലാണ് അവരെ ഉൾപ്പെടെ പ്രതിചേർത്തത്. നടിയെ പൊലിസ് ചോദ്യം ചെയ്യും. എന്നാൽ ഇവർ ഒളിവിലാണെന്നാണ് റിപ്പോർട്ട്. 

ALSO READ: ബലാത്സഗക്കേസില്‍ റാപ്പര്‍ വേടന് വ്യവസ്ഥകളോടെ മുന്‍കൂര്‍ ജാമ്യം അനുവദിച്ച് ഹൈക്കോടതി; 9ന് വീണ്ടും ഹാജരാകണം

ഞായറാഴ്ച കൊച്ചിയിലെ ബാനർജി റോഡിലുള്ള ബാറിൽ വച്ചായിരുന്നു നടിയുടെ സംഘവും പരാതിക്കാരന്റെ സംഘവും തമ്മിൽ തർക്കവും കയ്യാങ്കളിയുമുണ്ടായത്. റോഡിലേക്ക് നീങ്ങിയ തർക്കത്തിന് പിന്നാലെ പരാതിക്കാരനും സംഘവും ബാറിൽനിന്നു മടങ്ങി. എന്നാൽ ഇവരെ വിടാതെ മറ്റൊരു വാഹനത്തിൽ പ്രതികൾ പിന്തുടർന്നു. രാത്രി 11.45ഓടെ നോർത്ത് റെയിൽവേ പാലത്തിനു മുകളിൽ വച്ച് പരാതിക്കാരന്റെ കാർ തടഞ്ഞ് ഇയാളെ പ്രതികൾ കാറിൽനിന്ന് വലിച്ചിറക്കി കൊണ്ടുപോയി മർദ്ദിക്കുകയായിരുന്നു. പ്രതികളുടെ കാറിൽ വച്ച് മുഖത്തും ദേഹത്തുമെല്ലാം ആക്രമിച്ചെന്നും ഭീഷണിപ്പെടുത്തിയെന്നും പരാതിക്കാരൻ അലിയാർ ഷാ സലീം പറഞ്ഞു. പിന്നീട് ഇയാളെ ആലുവ പറവൂർ കവലയിൽ ഇറക്കിവിടുകയായിരുന്നു.  

തൊട്ടടുത്ത ദിവസം  നോർത്ത് പൊലീസ് സ്റ്റേഷനിൽ എത്തിയാണ് അലിയാർ ഷാ പരാതി നൽകിയത്. സിസിടിവി ദൃശ്യങ്ങൾ ഉൾപ്പെടെ പരിശോധിച്ചാണ് പൊലിസ് പ്രതികളെ കണ്ടെത്തിയത്.