കീഴുദ്യോഗസ്ഥയുമായുള്ള പ്രണയബന്ധത്തെ തുടർന്ന് ചീഫ് എക്‌സിക്യൂട്ടീവ് ഓഫീസർ ലോറന്റ് ഫ്രീക്‌സെയെ പുറത്താക്കി പ്രമുഖ ബ്രാൻഡായ നെസ്‌ലെ. കമ്പനിയുടെ ബിസിനസ് പെരുമാറ്റച്ചട്ടം ലംഘിച്ചതിനാണ് നടപടി. കിറ്റ്കാറ്റ് മുതൽ നെസ്‌കാഫെ വരെയുള്ള ഉൽപ്പന്നങ്ങളുടെ നിർമ്മാതാക്കളാണ് ലോകോത്തര ബ്രാൻഡായ നെസ്‌ലെ. 

നെസ്‌ലെയുടെ ചെയർമാൻ പോൾ ബൾക്കെയുടെയും ലീഡ് ഇൻഡിപെൻഡന്റ് ഡയറക്ടർ പാബ്ലോ ഇസ്‌ലയുടെയും നേതൃത്വത്തിൽ അന്വേഷണം നടത്തിയതിന് പിന്നാലെയാണ് സിഇഒയെ കമ്പനി പുറത്താക്കിയത്. കമ്പനിയുടെ ബിസിനസ് പെരുമാറ്റച്ചട്ടം ലംഘിച്ചുകൊണ്ട്, നേരിട്ടുള്ള ഒരു കീഴുദ്യോഗസ്ഥയുമായി വെളിപ്പെടുത്താത്ത പ്രണയബന്ധത്തിൽ ഏർപ്പെട്ടതായി ഇന്റേണൽ അന്വേഷണത്തിൽ വ്യക്തമായിരുന്നു. കഴിഞ്ഞ വർഷം സെപ്റ്റംബറിലാണ് അദ്ദേഹം സിഇഒ ആയി ചുമതലയേറ്റത്.

"ഇതൊരു അനിവാര്യമായ തീരുമാനമായിരുന്നു. നെസ്‌ലെയുടെ മൂല്യങ്ങളും ഭരണനിർവ്വഹണവുമാണ് ഞങ്ങളുടെ കമ്പനിയുടെ ശക്തമായ അടിത്തറ. നെസ്‌ലെയിലെ വർഷങ്ങളുടെ സേവനത്തിന് ലോറന്റിന് ഞാൻ നന്ദി പറയുന്നു" പോൾ ബൾക്കെ ഒരു പ്രസ്താവനയിൽ പറഞ്ഞു. നെസ്‌ലെയുടെ പുതിയ സിഇഒ ആയി ഫിലിപ്പ് നവരാറ്റിലിനെ ഉടൻ നിയമിച്ചതായും ഡയറക്ടർ ബോർഡ് പ്രഖ്യാപിച്ചു.

 

 

ആരാണ് ലോറന്റ് ഫ്രീക്സ്? Laurent Freixe

പാരിസിൽ ജനിച്ച ലോറന്റ് ഫ്രീക്സ് 1986-ലാണ് ഫ്രീക്സെ ഫ്രാൻസിലെ നെസ്‌ലെയിൽ ചേർന്നത്. അവിടെ അദ്ദേഹം മാർക്കറ്റിംഗിലും വിൽപ്പനയിലും ആയിരുന്നു പ്രവർത്തിച്ചിരുന്നത്. 2003-ൽ ഹംഗറിയുടെയും പിന്നീട് 2007-ൽ നെസ്‌ലെ ഐബീരിയൻ മേഖലയുടെയും സിഇഒ ആയി. 2022 ജനുവരിയിൽ നെസ്‌ലെ അതിന്റെ ഭൂമിശാസ്ത്രപരമായ ഘടന നവീകരിച്ചപ്പോൾ, ഫ്രീക്‌സെ സോൺ ലാറ്റിൻ അമേരിക്കയുടെ സിഇഒ ആയി. 2024 ഓഗസ്റ്റിൽലാണ് കമ്പനിയുടെ സിഇഒ പോസ്റ്റിലേക്ക് അദ്ദേഹത്തെ തെരഞ്ഞെടുക്കുന്നത്. മാർക്ക് ഷ്നൈഡറിന് പകരമായി എത്തിയ അദ്ദേഹം 2024 സെപ്റ്റംബർ 1 നാണ് ചുമതലയേറ്റത്. കൃത്യം ഒരുവർഷത്തിനിപ്പുറം അദ്ദേഹം സ്ഥാപനത്തിൽ നിന്ന് പുറത്താക്കപ്പെട്ടു.