പാലക്കാട്: പാലക്കാട് ആർഎസ്എസ് നിയന്ത്രണത്തിലുള്ള സ്‌കൂളിൽ സ്ഫോടനം നടന്ന സംഭവത്തിൽ ബിജെപി പ്രവർത്തകന്റെ വീട്ടിൽ പൊലിസ് പരിശോധന നടത്തി. ബിജെപി പ്രവർത്തകനായ കല്ലേക്കാട് സ്വദേശി സുരേഷിൻ്റെ വീട്ടിലാണ് പരിശോധന നടന്നത്. പരിശോധനയിൽ ഇയാളുടെ വീട്ടിൽ നിന്ന് സ്‌ഫോടക വസ്തു കണ്ടെത്തി. സുരേഷിന് പുറമെ സ്‌ഫോടക വസ്തു നിർമാണ തൊഴിലാളികളായ മറ്റ് രണ്ട് പേരെയും പൊലിസ് കസ്റ്റഡിയിലെടുത്തിട്ടുണ്ട്. ഇവരും ബിജെപി പ്രവർത്തകരാണെന്ന് പൊലിസ്.
 
കല്ലേക്കാട് സ്വദേശിയായ സുരേഷ്, ശശീന്ദ്രൻ, ഉണ്ണികൃഷ്ണൻ എന്നിവരെയാണ് പൊലിസ് കസ്റ്റഡിയിൽ എടുത്തത്.  24 ഇലക്ട്രിക് ഡിറ്റനേറ്റർ, 12 സ്‌ഫോടക വസ്തുക്കൾ എന്നിവയാണ് സുരേഷിന്റെ വീട്ടിൽ നിന്നു പിടികൂടിയത്. ലൈസൻസ് ഇല്ലാതെയാണ് സുരേഷ് വീട്ടിൽ ഡിറ്റനേറ്റർ സൂക്ഷിച്ചിരുന്നത്. 

ഓഗസ്റ്റ് 20 നാണ് പാലക്കാട് വ്യാസാ വിദ്യാപീഠം പ്രീപ്രൈമറി സിബിഎസ്ഇ സ്‌കൂളിൽ സ്ഫോടനം നടന്നത്. അപകടത്തിൽ പത്ത് വയസുകാരനും മറ്റൊരു സ്ത്രീക്കും പരിക്കേറ്റിരുന്നു. ആർഎസ്എസ് ശാഖ പതിവായി നടക്കുന്ന സ്ഥലമാണ് സ്‌കൂൾ. സ്ഫോടന ദിവസവും ഇവിടെ ശാഖ നടന്നിരുന്നു. പത്തുവയസുകാരനായ വിദ്യാർഥി സ്‌കൂൾ കോമ്പൗണ്ടിനകത്ത് കിടന്നിരുന്ന വസ്തു പന്താണെന്ന് കരുതി തട്ടിത്തെറിപ്പിച്ചപ്പോഴാണ് വലിയ ശബ്ദത്തോടെ ഇത് പൊട്ടിത്തെറിച്ചത്. സ്‌ഫോടനത്തിൽ കുട്ടിയ്ക്കും ആ സമയത്ത് കൂടെ നിന്നിരുന്ന സ്ത്രീക്കും പരുക്കേറ്റു.

ALSO READ: പാലക്കാട് ആർഎസ്എസ് നിയന്ത്രണത്തിലുള്ള സ്‌കൂളിലെ സ്‌ഫോടനം: കേസ് അന്വേഷിക്കാൻ പ്രത്യേക സംഘം

സ്‌കൂൾ കോമ്പൗണ്ടിനകത്ത് സ്‌ഫോടക വസ്തുക്കൾ എങ്ങനെ എത്തിയെന്നതടക്കം ദുരൂഹത നിലനിന്ന സംഭവം ഏറെ വിവാദമായിരുന്നു. പിന്നാലെ കേസ് അന്വേഷിക്കാൻ പ്രത്യേക സംഘത്തെ നിയോഗിച്ചു. പാലക്കാട് ടൗൺ നോർത്ത് സിഐയുടെ നേതൃത്വത്തിലുള്ള സംഘത്തെയാണ് നിയോഗിച്ചത്.  പാലക്കാട് വ്യാസാ വിദ്യാപീഠം പ്രീപ്രൈമറി സിബിഎസ്ഇ സ്കൂളിന് സമീപം സ്ഫോടക വസ്തു എങ്ങനെ എത്തി എന്ന കാര്യമാകും അന്വേഷിക്കുക. 

സ്‌ഫോടക വസ്തുക്കളുടെ നിർമ്മാണം സംബന്ധിച്ചും പൊലിസ് വിവരങ്ങൾ ശേഖരിക്കുന്നതിനിടെയാണ് പുതിയ കണ്ടെത്തൽ ഉണ്ടായിരിക്കുന്നത്. ഉപജില്ല വിദ്യാഭ്യാസ ഓഫീസ് പാലക്കാട് വ്യാസാ വിദ്യാപീഠം പ്രീപ്രൈമറി സിബിഎസ്ഇ സ്കൂളിന് സംഭവത്തിൽ കാരണം കാണിക്കൽ നോട്ടീസ് നൽകിയിട്ടുണ്ട്. സംഭവത്തിൽ തുടക്കം മുതലേ ആർഎസ്എസ് - ബിജെപി പങ്ക് അന്വേഷിക്കണമെന്ന് ആവശ്യപ്പെട്ട് സിപിഎമ്മും കോൺ​ഗ്രസും രംഗത്തുണ്ടായിരുന്നു.